Lucknow: కార్ పార్కింగ్ వివాదం.. కాల్పుల్లో ఒకే కుటుంబానికి చెందిన ముగ్గురు దారుణ హత్య!

Lucknow: ఉత్తరప్రదేశ్ రాజధాని లక్నోలో కార్ పార్కింగ్ విషయంలో తలెత్తిన చిన్నపాటి వివాదం రక్తపాతానికి దారితీసింది. వాహనం నిలపడంపై రెండు పొరుగు కుటుంబాల మధ్య మొదలైన వాగ్వాదం క్షణాల్లో తీవ్ర ఘర్షణగా మారి, విచక్షణారహిత కాల్పులకు దారితీసింది. ఈ ఘటనలో ఒకే కుటుంబానికి చెందిన తండ్రి, కొడుకు, సోదరుడు అక్కడికక్కడే ప్రాణాలు కోల్పోయారు. ఈ దారుణానికి పాల్పడిన నిందితుడు రిషభ్ శుక్లాను పోలీసులు అదుపులోకి తీసుకుని విచారిస్తున్నారు.

పోలీసులు తెలిపిన వివరాల ప్రకారం.. లక్నో నగరంలోని సఆదత్‌గంజ్ పోలీస్ స్టేషన్ పరిధిలోని నౌబస్తా ప్రాంతంలో ఈ విషాదం చోటుచేసుకుంది. ఇంటి సమీపంలో కారు నిలపడంపై శివాజీ తివారీ, రిషభ్ శుక్లా కుటుంబాల మధ్య గొడవ ప్రారంభమైంది. మాటమాట పెరగడంతో సహనం కోల్పోయిన రిషభ్ శుక్లా తన వద్ద ఉన్న తుపాకీతో విచక్షణారహితంగా పలు రౌండ్ల కాల్పులు జరిపాడు. ఈ కాల్పుల్లో శివాజీ తివారీ, ఆయన కుమారుడు సుయశ్ తివారీ, శివాజీ సోదరుడు శంభు తీవ్రంగా గాయపడ్డారు. వీరిలో ఇద్దరు సంఘటనా స్థలంలోనే మృతి చెందగా, మరొకరు ఆసుపత్రిలో చికిత్స పొందుతూ ప్రాణాలు విడిచారు.

బాధిత తివారీ కుటుంబానికి, పొరుగున ఉండే శుక్లా కుటుంబానికి మధ్య గత పదేళ్లుగా భూమి, స్థల వివాదాలు ఉన్నట్లు స్థానికులు చెబుతున్నారు. ఇంటి సమీపంలోని మర్రిచెట్టు కింద శివాజీ తివారీ చబుత్రా (అరుగు) నిర్మిస్తుండగా శుక్లా కుటుంబం తీవ్రంగా వ్యతిరేకిస్తోంది. గతంలోనూ దీనిపై గొడవలు జరిగి పోలీస్ స్టేషన్ వరకు వెళ్లినా, సర్దిచెప్పి పంపించారు. అయితే సోమవారం ఆ చబుత్రా ముందు కారు పార్క్ చేసే విషయంలో మళ్లీ వివాదం మొదలై ఘర్షణగా మారింది. పరస్పర దూషణల అనంతరం రిషభ్ ఉన్నట్టుండి తుపాకీతో తూటాల వర్షం కురిపించాడు.

కాల్పులకు తెగబడిన నిందితుడు రిషభ్ శుక్లా మర్చంట్ నేవీలో ఉద్యోగం చేస్తున్నట్లు సమాచారం అందిందని, దీనిపై అధికారిక వివరాలను ధృవీకరిస్తున్నామని డీసీపీ జితేంద్ర శ్రీవాస్తవ తెలిపారు. ఘటనా స్థలానికి చేరుకున్న ఉన్నతాధికారులు నిందితుడిని అదుపులోకి తీసుకుని హత్యకు ఉపయోగించిన ఆయుధాన్ని స్వాధీనం చేసుకున్నారు. ఈ కాల్పుల్లో ఇంకా ఎవరైనా పాలుపంచుకున్నారా అనే కోణంలో పోలీసులు దర్యాప్తు వేగవంతం చేశారు.

లక్నోలోని సఆదత్‌గంజ్‌లో కార్ పార్కింగ్ విషయంలో పాత కక్షలు భగ్గుమనడంతో ముగ్గురు వ్యక్తులు కాల్పుల్లో ప్రాణాలు కోల్పోయారు. ఘటనా స్థలానికి చేరుకున్న పోలీసులు నిందితుడు రిషభ్ శుక్లాను అదుపులోకి తీసుకుని కఠిన చర్యలకు ఉపక్రమించారు.