Prakash Raj: ఓటరు నమోదు సవరణ ప్రక్రియ (SIR)లో భాగంగా కర్ణాటక రాజధాని బెంగళూరులో ప్రముఖ సినీ నటుడు, రాజకీయ విశ్లేషకుడు ప్రకాశ్ రాజ్ (Prakash Raj) ఓటు గల్లంతైంది. గతంలో ఎంపీగా పోటీ చేసిన తన స్వస్థలంలోనే ఓటు హక్కు తొలగించబడటంపై ఆయన తీవ్ర ఆగ్రహం వ్యక్తం చేశారు.
తనదైన శైలిలో #JustAsking హ్యాష్ట్యాగ్తో సోషల్ మీడియా వేదికగా ఒక వీడియాను విడుదల చేస్తూ ప్రధాని నరేంద్ర మోదీ, కేంద్ర ప్రభుత్వంపై సంచలన వ్యాఖ్యలు చేశారు.
నేను ఇక్కడే పుట్టాను.. ఇక్కడే పెరిగాను!.. ప్రకాశ్ రాజ్ ఫైర్
తన ఓటు తొలగించడంపై ప్రకాశ్ రాజ్ సెటైరికల్ వీడియో ద్వారా స్పందిస్తూ వ్యంగ్యాస్త్రాలు సంధించారు..
ప్రియమైన మిత్రులారా.. మీతో ఒక జోక్ పంచుకోవాలనుకుంటున్నాను. బెంగళూరులో ఎస్ఐఆర్ (SIR) ప్రక్రియ తర్వాత ఓటు హక్కు కోల్పోయిన 65 లక్షల మందిలో నేను కూడా ఒకడిని. నేను ఇక్కడే పుట్టాను, ఇక్కడే పెరిగాను, చదువుకున్నాను. నా రంగుల ప్రపంచం, నా నాటక రంగం అంతా ఇక్కడే సాగింది. అంతేకాదు, గతంలో ఇదే బెంగళూరు సెంట్రల్ నియోజకవర్గం నుంచి ఎంపీ అభ్యర్థిగా పోటీ చేశాను. నా ఓటును తిరిగి తెచ్చుకోవడానికి ఇంకెన్ని కాగితాలు చూపించాలో చూద్దాం.. గేమ్ ఆన్! మీ మాట వినని పౌరుల ఓటు హక్కును తొలగించే అధికారం మీ వద్ద ఉండవచ్చు.. కానీ మిమ్మల్ని గద్దె దించే మా హక్కును, ప్రయత్నాన్ని మీరు ఆపగలరా?— నటుడు ప్రకాశ్ రాజ్
అయితే ప్రకాశ్ రాజ్పై వేర్వేరు చోట్ల నాలుగు ఓట్లు ఉన్నాయనే ఆరోపణల నేపథ్యంలోనే ఈసీ (Election Commission) బెంగళూరులోని ఓటును తొలగించిందని సమాచారం.
జార్ఖండ్ నిరుద్యోగులపై దాడిని ఖండించిన ప్రకాశ్ రాజ్!
మరోవైపు జార్ఖండ్ రాజధాని రాంచిలో JPSC-JSSC పరీక్షల కుంభకోణానికి వ్యతిరేకంగా ఆందోళన జరుపుతున్న నిరుద్యోగ అభ్యర్థులపై పోలీసులు టియర్ గ్యాస్, లాఠీచార్జ్ ప్రయోగించడాన్ని ప్రకాశ్ రాజ్ తీవ్రంగా నిరసించారు..
-
క్రూరత్వం చెల్లదు: శాంతియుతంగా నిరసన తెలుపుతున్న అభ్యర్థులపై నీటి ఫిరంగులు, లాఠీలు వాడటం అహంకార పూరిత పాలనకు, పతనానికి నిదర్శనమని మండిపడ్డారు.
-
అక్రమాలపై విచారణ డిమాండ్: JSSC-CGL పోటీ పరీక్షల లీకేజీ అక్రమాలపై వెంటనే సీబీఐ (CBI) విచారణ జరిపించి, నియామక ప్రక్రియలో పారదర్శకత తేవలసిన బాధ్యత ప్రభుత్వంపై ఉందన్నారు.