Cinema Ticket Prices: తెలంగాణలో సినిమా టికెట్ ధరలు, థియేటర్ల నిబంధనలపై కీలక జీవో

• కొత్తగా ‘స్పెషల్ థియేటర్స్’ కేటగిరీ: ఆధునిక సౌకర్యాలు ఉన్న సింగిల్ స్క్రీన్లకు ప్రత్యేక గుర్తింపునిచ్చారు. 7.1 సరౌండ్ సౌండ్ సిస్టమ్, 2K లేదా 4K ప్రొజెక్షన్, 75 అడుగులు లేదా అంతకంటే పెద్ద స్క్రీన్లు కలిగిన సింగిల్ స్క్రీన్లను ఇకపై ‘స్పెషల్ థియేటర్లు’గా వర్గీకరిస్తారు.
• పేద, మధ్యతరగతి కోసం 25% ‘నాన్-ప్రీమియం’ సీట్లు: సామాన్యులపై అధిక ధరల భారం పడకుండా ఉండేందుకు మల్టీప్లెక్స్‌లతో సహా రాష్ట్రంలోని ప్రతి థియేటర్‌లో కనీసం 25 శాతం సీట్లను ‘నాన్-ప్రీమియం’ కేటగిరీగా ఉంచడం తప్పనిసరి చేశారు.
• రోజుకు 5 షోల ప్రదర్శన: థియేటర్లలో ఉదయం 8:00 గంటల నుంచి అర్ధరాత్రి 1:00 గంట వరకు రోజుకు 5 షోలు వేసుకునేందుకు అనుమతి ఇచ్చారు.
• చిన్న సినిమాలకు ప్రైమ్ టైమ్ రక్షణ: పెద్ద చిత్రాలతో పాటు చిన్న బడ్జెట్ సినిమాలు విడుదలైనప్పుడు.. ఆ చిన్న చిత్రాలకు కచ్చితంగా ఉదయం 11:00 గంటల నుంచి రాత్రి 9:00 గంటల మధ్య ప్రైమ్ టైమ్‌లో ప్రతిరోజూ కనీసం ఒక షో కేటాయించాలని ఆదేశాలు జారీ చేశారు.

రూ. 100 కోట్ల భారీ చిత్రాలు & కార్మికుల సంక్షేమ నిధి:

భారీ వ్యయంతో తెరకెక్కే సినిమాలకు సంబంధించి ప్రభుత్వం ప్రత్యేక నిబంధనలను పొందుపరిచింది..

1. సూపర్ హై బడ్జెట్ హోదా: రూ. 100 కోట్లకు పైగా నిర్మాణ వ్యయంతో తీసే సినిమాలను ‘సూపర్ హై బడ్జెట్ సినిమాలు’గా గుర్తిస్తారు.
2. మొదటి 10 రోజులు ధరల పెంపు: ఈ చిత్రాలు విడుదలైన తొలి 10 రోజుల పాటు టికెట్ రేట్లు పెంచుకునేందుకు వెసులుబాటు కల్పించారు.

3. కార్మికుల సంక్షేమానికి విరాళం: టికెట్ ధరలు పెంచుకోవాలనుకునే నిర్మాతలు.. సినీ కార్మికుల సంక్షేమ నిధికి రూ. 1 కోటి వరకు విరాళం ఇవ్వాలని లేదా అదనపు ఆదాయం నుంచి నిర్ణీత వాటాను తెలంగాణ ఫిల్మ్ డెవలప్‌మెంట్ కార్పొరేషన్ (TGFDC), సినీ కార్మికుల సంక్షేమానికి జమ చేయాలని ప్రభుత్వం షరతు విధించింది.