Film Federation Council: టాలీవుడ్ డ్యాన్సర్స్ యూనియన్లో గత కొద్దిరోజులుగా కొనసాగుతున్న అంతర్గత విభేదాలు, వివాదాల నేపథ్యంలో తెలుగు ఫిల్మ్ ఫెడరేషన్ అత్యవసర సమావేశం నిర్వహించి కఠిన నిర్ణయాలు తీసుకుంది. ఫెడరేషన్ ప్రెసిడెంట్ అనిల్ వల్లభనేని అధ్యక్షతన జరిగిన ఈ కీలక భేటీకి అనుబంధంగా ఉన్న 23 క్రాఫ్ట్స్ ప్రతినిధులు హాజరయ్యారు.
డాన్సర్స్ అసోసియేషన్ అధ్యక్షురాలు సుమలత (జానీ మాస్టర్ భార్య) తీసుకుంటున్న ఏకపక్ష నిర్ణయాలు, వ్యవహారశైలిపై ఫెడరేషన్ కౌన్సిల్ సభ్యులు తీవ్ర ఆగ్రహం వ్యక్తం చేశారు. దేశంలోనే అత్యున్నత స్థానంలో ఉన్న తెలుగు ఫిల్మ్ ఫెడరేషన్ నిబంధనలను ఉల్లంఘిస్తూ వ్యవహరించడాన్ని తీవ్రంగా తప్పుబట్టారు.
డాన్సర్స్ అసోసియేషన్ కార్యవర్గానికి సహాయ నిరాకరణ..
సమావేశంలో ఫెడరేషన్ ప్రెసిడెంట్ అనిల్ వల్లభనేని ప్రధాన నిర్ణయాలను వెల్లడించారు:
-
మద్దతు ఉపసంహరణ: ఫెడరేషన్ నిబంధనలను లెక్కచేయకుండా పనిచేస్తున్న ప్రస్తుత డాన్సర్స్ అసోసియేషన్ కార్యవర్గానికి ఫెడరేషన్ నుంచి పూర్తి సహాయ నిరాకరణ (Non-Cooperation) అమల్లో ఉంటుందని స్పష్టం చేశారు.
-
మిగతా 23 క్రాఫ్ట్స్కు పూర్తి సహకారం: డాన్సర్స్ యూనియన్ మినహా మిగిలిన 23 క్రాఫ్ట్స్ కార్యకలాపాలు ఎప్పటిలాగే కొనసాగుతాయని, ఫెడరేషన్ నిర్ణయాన్ని వ్యతిరేకించే డాన్సర్స్ అసోసియేషన్ సభ్యులకు కూడా ఎలాంటి సహకారం ఉండదని స్పష్టం చేశారు.
-
సాధారణ డ్యాన్సర్లకు భరోసా: సంఘంలోని వివాదాలతో సంబంధం లేని సాధారణ డ్యాన్సర్లకు వ్యక్తిగతంగా ఏదైనా సమస్య లేదా అత్యవసర సహాయం అవసరమైతే ఫెడరేషన్ ఎల్లప్పుడూ అండగా ఉంటుందని భరోసా ఇచ్చారు.
చిరంజీవి మాటను తోసిపుచ్చి ఏకపక్ష ఎన్నికలు – జానీ మాస్టర్పై సస్పెన్షన్..
గత సమావేశాల్లో మెగాస్టార్ చిరంజీవి సహా పలువురు సినీ పెద్దలు సూచించిన రాజీ మార్గాలను పక్కనపెట్టి యూనియన్ కార్యవర్గం వ్యవహరించిందని ఫెడరేషన్ ఆరోపించింది:
-
ఏకపక్ష ఉపఎన్నికలు: అందరినీ కలుపుకుని వెళ్తానని గతంలో మాటిచ్చిన సుమలత.. సినీ పెద్దల సూచనలను ఖాతరు చేయకుండా ఏకపక్షంగా బై-ఎలక్షన్స్ నిర్వహించారని మండిపడ్డారు.
-
జానీ మాస్టర్పై సస్పెన్షన్ కొనసాగింపు: ప్రముఖ కొరియోగ్రాఫర్ జానీ మాస్టర్పై ఉన్న సస్పెన్షన్ను యథావిధిగా కొనసాగిస్తున్నట్లు ఫెడరేషన్ అధికారికంగా ప్రకటించింది. గతంలో ఆయనకు సంబంధించి ఫెడరేషన్కు జమ అయిన రూ. 3 లక్షల మొత్తాన్ని సైతం తిరిగి పంపించివేస్తున్నట్లు స్పష్టం చేశారు.