Bakrid Holiday: తెలంగాణ ప్రభుత్వం బక్రీద్ పండగ సెలవుదినాన్ని మారుస్తూ ఒక ముఖ్యమైన నిర్ణయం తీసుకుంది. పూర్వపు అధికారిక క్యాలెండర్ ప్రకారం మే 27, 2026 (బుధవారం) ఇవ్వాల్సిన బక్రీద్ సెలవును, మరుసటి రోజున అనగా మే 28, 2026 (గురువారం) నాటికి మారుస్తూ రాష్ట్ర ప్రభుత్వం కొత్తగా ఉత్తర్వులు జారీ చేసింది. తెలంగాణ వక్ఫ్ బోర్డు చీఫ్ ఎగ్జిక్యూటివ్ ఆఫీసర్, అలాగే మైనారిటీ సంక్షేమ శాఖల నుండి అందిన ప్రత్యేక విజ్ఞప్తులు ఇంకా సిఫార్సులను క్షుణ్ణంగా పరిశీలించిన తర్వాతే రాష్ట్ర ప్రభుత్వం ఈ మార్పును ఖరారు చేస్తూ అధికారికంగా ప్రకటించింది.
నెగోషియబుల్ ఇన్స్ట్రుమెంట్స్ యాక్ట్, 1881 (N.I. Act) నిబంధనల ప్రకారం మే 28వ తేదీని సాధారణ సెలవు దినంగా (General Holiday) ప్రకటిస్తూ ప్రభుత్వ ప్రధాన కార్యదర్శి కె.రామకృష్ణారావు పేరుతో ఈ సరికొత్త జీవో విడుదలయింది. ప్రభుత్వ ఆదేశాల ప్రకారం మార్చబడిన ఈ సెలవు దినం రాష్ట్రవ్యాప్తంగా ఉన్న అన్ని రకాల ప్రభుత్వ కార్యాలయాలు, ప్రభుత్వ మరియు ప్రైవేట్ విద్యా సంస్థలు, అలాగే అన్ని బ్యాంకులకు పూర్తిస్థాయిలో వర్తిస్తుందని అధికారులు ఈ సందర్భంగా స్పష్టం చేశారు.