Jantar Mantar: ఢిల్లీ జంతర్ మంతర్ వద్ద ధర్నాలకు ‘చెక్’?

ఈ వ్యవహారంపై స్పందించాలని కేంద్ర ప్రభుత్వంతో పాటు ఢిల్లీ ప్రభుత్వానికి సుప్రీంకోర్టు ఆదేశాలు జారీ చేసింది.

పిటిషనర్ వాదన ఏంటి?

సతీష్ చంద్ కౌశిక్ అనే వ్యక్తి దాఖలు చేసిన ప్రజాప్రయోజన వ్యాజ్యం (PIL) ఆధారంగా భారత ప్రధాన న్యాయమూర్తి (CJI) జస్టిస్ సూర్య కాంత్ నేతృత్వంలోని ధర్మాసనం ఈ విచారణ చేపట్టింది.

పిటిషనర్ తరఫున న్యాయవాది కోర్టుకు తమ అభ్యంతరాలను వివరించారు:

• ప్రజలకు ఇబ్బందులు: జంతర్ మంతర్ వద్ద వరుస నిరసనల కారణంగా స్థానిక నివాసితులకు, రాకపోకలు సాగించే వారికి తీవ్ర ఆటంకాలు ఎదురవుతున్నాయి.

• రవాణా, వైద్య సేవలకు భంగం: ముఖ్యంగా అత్యవసర వైద్య సేవలు, నిత్యవసర వస్తువుల సరఫరాకు, అంబులెన్సుల రాకపోకలకు జంతర్ మంతర్ వద్ద ఎంట్రీ, ఎగ్జిట్ (రాకపోకల) సమస్యలు ఉత్పన్నమవుతున్నాయి.

• కనీస వసతుల లేమి: ధర్నాల్లో పాల్గొనే నిరసనకారులకు తాగునీరు, పారిశుద్ధ్యం వంటి ప్రాథమిక సదుపాయాలు అక్కడ లభించడం లేదు.

ఇటీవల జరిగిన ‘సంసద్ చలో’ ఆందోళనలను, రాబోయే టాక్సీ డ్రైవర్ల యూనియన్ ధర్నా మరియు అరవింద్ కేజ్రీవాల్ పిలుపునిచ్చిన టౌన్‌హాల్ సభలను ప్రస్తావిస్తూ.. శాంతిభద్రతల పరిరక్షణకు, ప్రజల ఇబ్బందుల నివారణకు ప్రత్యామ్నాయ వేదికను కేటాయించాలని కోరారు.

“ఇది చాలా ముఖ్యమైన అంశం” – సుప్రీంకోర్టు సంచలన వ్యాఖ్యలు

పిటిషనర్ వాదనలను విన్న సీజేఐ జస్టిస్ సూర్య కాంత్ స్పందిస్తూ.. ఈ అంశం చాలా ప్రాముఖ్యమైనదని అభిప్రాయపడ్డారు. నిరసనలకు జంతర్ మంతర్ కాకుండా వేరే ఏదైనా ప్రత్యామ్నాయ స్థలాన్ని (Alternate Site) కేటాయించడంపై కేంద్ర ప్రభుత్వం నుండి తగిన సూచనలు, సమాధానం తీసుకోమని సొలిసిటర్ జనరల్ తుషార్ మెహతాను కోర్టు ఆదేశించింది.

ఇక శాంతిభద్రతల నిర్వహణపై న్యాయవాది ఆందోళన వ్యక్తం చేయగా.. “పరిస్థితిని ఎలా చక్కదిద్దాలో అధికారులకు బాగా తెలుసు. ఒకవేళ వారు విఫలమైతే అప్పుడు మా వద్దకు రండి” అని ప్రధాన న్యాయమూర్తి వ్యాఖ్యానించారు.

ఈ విచారణతో ఢిల్లీలో నిరసనలకు కేంద్ర బిందువుగా ఉండే జంతర్ మంతర్ స్థానంలో మరో కొత్త ప్రదేశాన్ని వేదికగా మారుస్తారా లేదా అన్నది వేచి చూడాలి!