Peddi: మెగా పవర్ స్టార్ రామ్ చరణ్ హీరోగా వస్తున్న భారీ చిత్రం ‘పెద్ది’ విడుదలకు కౌంట్డౌన్ మొదలైంది. జూన్ 3న గ్రాండ్ ప్రీమియర్లు, జూన్ 4న ప్రపంచవ్యాప్తంగా విడుదల చేయడానికి చిత్ర యూనిట్ సిద్ధమవుతోంది. ఇంకా 30 రోజులే ఉండటంతో సినిమా ప్రమోషన్స్ ఎలా చేస్తారో అని అందరూ ఆసక్తిగా ఎదురుచూస్తున్నారు.
ఒక్క రామ్ చరణ్ మేనియానే సరిపోతుందా?
దర్శకుడు బుచ్చిబాబు సానా మొదటి నుండి రామ్ చరణ్ చుట్టూ తిప్పుతున్న పబ్లిసిటీ కంటెంట్. టీజర్, పాటలు ఇంకా ‘కుస్తీ’ గ్లింప్స్లో రామ్ చరణ్ మాత్రమే కనిపించారు. ఇది ప్రేక్షకులలో అంచనాలను పెంచినప్పటికీ, చిత్రంలోని ఇతర కీలక నటీనటుల ప్రభావం ఇంకా ప్రచారంలో కనిపించలేదు. రామ్ చరణ్తో పాటు సినిమాలో ఉన్న క్యారెక్టర్స్ గురించి ఎంతో కొంత తెలియకపోతే థియేటర్లో క్యారెక్టర్స్తో కనెక్ట్ కావడం కొంత కష్టమే అంటున్నారు. ప్రమోషన్లోనైనా ఈ తారాగణం పాల్గొంటే తప్ప తమ క్యారెక్టర్స్ గురించి కొంతైనా తెలుస్తుంది.
-
శివ రాజ్కుమార్: ‘జైలర్’ సినిమాలో కామియోతో తెలుగు ఆడియన్స్కి దగ్గరైన ఆయన స్క్రీన్ ప్రెజెన్స్ సినిమాకు పెద్ద ఎసెట్. ఆయన పాత్రను పరిచయం చేసే చిన్న ప్రోమో విడుదల చేసినా హైప్ అమాంతం పెరుగుతుంది.
-
దివ్యేందు: ‘మీర్జాపూర్’ ఫేమ్ దివ్యేందుకి యూత్ ఇంకా జెన్-జి ఆడియన్స్లో మంచి క్రేజ్ ఉంది. రామ్ చరణ్తో ఆయన కాంబినేషన్ ఎలా ఉంటుందో చూడాలని అభిమానులు ఆసక్తిగా ఉన్నారు.
-
జగపతి బాబు: విలక్షణ నటుడైన జగపతి బాబు పాత్ర చిత్రానికి మరింత లోతుని ఇస్తుందని భావిస్తున్నారు. ఆయన క్యారెక్టర్ గ్లింప్స్ సినిమాపై ఆసక్తిని పెంచుతుంది.
-
జాన్వీ కపూర్: ‘చికిరి’ సాంగ్లో మెరిసిన ఈ భామ పాత్ర ప్రాముఖ్యత కథలో ఎలా ఉంటుందో ఇంకా వెల్లడి కావాల్సి ఉంది.
ప్రచార వ్యూహం మారాలి!
కేవలం ఒక్క నెల మాత్రమే సమయం ఉండటంతో, ఇకపై క్యారెక్టర్ టీజర్లు ఇంకా షార్ట్ ప్రోమోల ద్వారా ప్రేక్షకుల్లో ఉత్సాహం నింపడం టీమ్ ముందున్న ప్రధాన లక్ష్యం. ఏఆర్ రెహమాన్ సంగీతం అందిస్తున్న ఈ చిత్రాన్ని వృద్ధి సినిమాస్ పతాకంపై వెంకట సతీష్ కిలారు నిర్మిస్తున్నారు.
‘పెద్ది’ బాక్సాఫీస్ వద్ద తన పూర్తి స్థాయి సత్తా చాటాలంటే, ఈ అద్భుతమైన నటీనటులందరినీ ప్రచార చిత్రాల్లోకి తీసుకురావడం ఇప్పుడు ఎంతో అవసరం.