Prabhakar Rao: తెలంగాణలో సంచలనం రేపిన ఫోన్ ట్యాపింగ్ కేసు మరోసారి రాష్ట్ర రాజకీయాలను కుదిపేసే దిశగా సాగుతోంది. ఈ కేసులో కీలక నిందితుడిగా భావిస్తున్న మాజీ ఎస్‌ఐబీ చీఫ్ ప్రభాకర్ రావు, సోమవారం జూబ్లీహిల్స్‌లోని ప్రత్యేక దర్యాప్తు బృందం (SIT) ఎదుట హాజరయ్యారు. గత ప్రభుత్వ హయాంలో ఆయన ఎస్‌ఐబీ చీఫ్‌గా ఉన్న సమయంలో రాజకీయ నాయకులు, సినీ ప్రముఖులు, న్యాయమూర్తులు, జర్నలిస్టుల ఫోన్‌లు ట్యాప్ చేశారన్న ఆరోపణలు బలంగా వినిపిస్తున్న సంగతి తెలిసిందే.
డబ్బు ప్రవాహం, నిఘా లక్ష్యాలు.. విచారణలో కీలక ప్రశ్నలు
ప్రస్తుతం ఈ కేసును దర్యాప్తు చేస్తున్న SIT బృందం, ట్యాపింగ్‌కి వెనుక ఉన్న లక్ష్యాలు, గత అసెంబ్లీ ఎన్నికల సమయంలో ప్రతిపక్ష నాయకులపై పెట్టిన నిఘా, వారిని ఆర్థికంగా మద్దతు ఇచ్చిన వ్యక్తులపై గూఢచర్యం అంశాలపై ప్రశ్నలు సంధిస్తోంది. ముఖ్యంగా ఈ వ్యవహారానికి సంబంధించిన అన్ని వివరాలను ప్రభాకర్ రావు నుండి వెలికితీయాలనే ఉద్దేశంతో విచారణ జరుపుతున్నారు.
లుక్ ఔట్ సర్క్యులర్‌లో ఉన్నప్పటికీ.. ఎస్సి ఆదేశాలతో ఎంట్రీ
ప్రభాకర్ రావు ఆదివారం రాత్రి 8 గంటల సమయంలో దుబాయ్‌ నుండి హైదరాబాద్ శంషాబాద్‌ ఎయిర్‌పోర్టుకు చేరుకున్నారు. ఆయనపై ఇప్పటికే లుక్ ఔట్ సర్క్యులర్ అమలులో ఉండటంతో, ఎమిగ్రేషన్ అధికారులు అతని వద్ద ఉన్న సుప్రీంకోర్టు ఆదేశాలు, వన్ టైం ఎంట్రీకి సంబంధించిన ఎమర్జెన్సీ సర్టిఫికెట్ తదితర పత్రాలను ధృవీకరించి, ఈ సమాచారాన్ని వెంటనే జూబ్లీహిల్స్ ఏసీపీ వెంకటగిరికి పంపించారు.
ఇది కూడా చదవండి: Kommineni Srinivas Rao: కొమ్మినేని శ్రీనివాస్‌రావు అరెస్ట్..
SIT ఎదుట హాజరు, విచారణ కొనసాగుతోంది
సోమవారం ఉదయం 10 గంటలకి ప్రభాకర్ రావు జూబ్లీహిల్స్ పోలీస్ స్టేషన్‌లోని SIT కార్యాలయానికి హాజరయ్యారు. వెస్ట్ జోన్ డీసీపీ విజయ్ కుమార్ నేతృత్వంలో ఐదుగురు అధికారులతో కూడిన ప్రత్యేక బృందం ఆయనను సమగ్రంగా ప్రశ్నిస్తోంది. ఈ విచారణలో ఆయన ఎలాంటి వాస్తవాలు వెల్లడిస్తారన్నది ప్రస్తుతం అధికార వర్గాలు, రాజకీయ నాయకులు, మీడియా వర్గాల్లో ఆసక్తికరంగా మారింది.
ఎక్కడికి దారి తీస్తుందో?
ఫోన్ ట్యాపింగ్ కేసు పూర్తిగా వెలుగులోకి వచ్చిన తర్వాత, దాని ప్రభావం రాజకీయ వర్గాలపై ఎంత ప్రభావం చూపుతుందన్న దానిపై అనేక ఊహాగానాలు కొనసాగుతున్నాయి. ప్రభాకర్ రావు విచారణలో ఇచ్చే సమాధానాల ఆధారంగా ఈ కేసులో కొత్త మలుపులు తిరిగే అవకాశాలు కూడా కనిపిస్తున్నాయి. ఇప్పటికే రాష్ట్రంలో కొత్త ప్రభుత్వం ఏర్పడిన తర్వాత పలు చారిత్రాత్మక కేసులను తిరిగి తెరిచిన నేపథ్యంలో, ఈ ఫోన్ ట్యాపింగ్ వ్యవహారం అత్యంత సంచలనాత్మకంగా మారే సూచనలు స్పష్టంగా కనిపిస్తున్నాయి.