Nara Lokesh: ఏపీలో హ్యుందాయ్ ‘షిప్ బిల్డింగ్’ ప్లాంట్?.. కొరియాలో నారా లోకేష్ కీలక చర్చలు..

ఈ సమావేశంలో HD KSOE గ్లోబల్ బిజినెస్ డైరెక్టర్ క్వాన్ యంగ్‌హూన్‌తో లోకేష్ సుదీర్ఘంగా మాట్లాడారు. ఏపీకి ఉన్న దాదాపు 1,000 కిలోమీటర్ల పొడవైన సముద్ర తీరం, బిజినెస్‌కు అనుకూలమైన భౌగోళిక ప్రాంతం, కొత్తగా వస్తున్న ఓడరేవులు (పోర్టులు) ఇంకా ఇండస్ట్రియల్ పాలసీల గురించి వారికి వివరించారు.

పరిశ్రమల ఏర్పాటుకు ఏపీ ప్రభుత్వం ఎంత వేగంగా నిర్ణయాలు తీసుకుంటుందో (Speed of Doing Business) లోకేష్ ఈ సందర్భంగా గుర్తుచేశారు. పెట్టుబడిదారులకు ఎలాంటి ఇబ్బందులు లేకుండా సింగిల్ విండో ద్వారా త్వరగా అనుమతులు ఇస్తున్నామని చెప్పారు. ఇప్పటికే ఏపీలో సక్సెస్‌ఫుల్‌గా నడుస్తున్న కొరియన్ కంపెనీలు ‘కియా మోటార్స్’, ‘ఎల్జీ ఎలక్ట్రానిక్స్’లని ఉదాహరణగా చూపిస్తూ.. ఎంతటి పెద్ద ప్రాజెక్టునైనా రికార్డు టైమ్‌లో పూర్తి చేసే సత్తా ఏపీకి ఉందన్నారు.

రాష్ట్రంలోకి వస్తున్న మరికొన్ని పెద్ద ప్రాజెక్టుల గురించి కూడా మంత్రి ప్రస్తావించారు:

• గూగుల్ డేటా సెంటర్

• ఆర్సెలార్ మిట్టల్ స్టీల్ ప్లాంట్

• రాయలసీమలో రాబోతున్న యుద్ధ విమానాల (ఫైటర్ జెట్స్) తయారీ ప్రాజెక్ట్

ఈ భారీ ప్రాజెక్టులన్నీ ఏపీపై అంతర్జాతీయ కంపెనీలకు ఉన్న నమ్మకాన్ని పెంచుతున్నాయని, ప్రస్తుతం ఇండియాలోకి వస్తున్న మొత్తం పెట్టుబడులలో దాదాపు 25 శాతం వాటాను ఒక్క ఏపీనే సాధించిందని లోకేష్ వెల్లడించారు.

ఏపీలోని వివిధ తీరప్రాంతాలను క్షేత్రస్థాయిలో పరిశీలించి, షిప్ బిల్డింగ్ ప్లాంట్ పెట్టడానికి అనువైన స్థలాన్ని ఎంచుకోవాల్సిందిగా హ్యుందాయ్ టీమ్‌ను లోకేష్ కోరారు. కంపెనీకి కావలసిన సాంకేతిక, లాజిస్టిక్స్ అవసరాలకు తగ్గట్టుగా ప్రభుత్వమే దగ్గరుండి స్థలాలను గుర్తిస్తుందని హామీ ఇచ్చారు. త్వరలోనే ఆంధ్రప్రదేశ్‌లో పర్యటించి ఇక్కడి అవకాశాలను పరిశీలించాలని లోకేష్ హ్యుందాయ్ యాజమాన్యాన్ని అధికారికంగా ఆహ్వానించారు.