Nadendla Manohar: ఆంధ్రప్రదేశ్‌లో రేషన్ కార్డు కోసం ఎదురు చూస్తున్న వారికి శుభవార్త. మే 7 నుంచి రాష్ట్రవ్యాప్తంగా కొత్త రేషన్ కార్డుల కోసం దరఖాస్తుల స్వీకరణ ప్రారంభం కానుంది. ఈ ప్రక్రియను రాష్ట్ర పౌర సరఫరాల శాఖ మంత్రి నాదెండ్ల మనోహర్ అధికారికంగా ప్రకటించారు. ఈ సారి కేవలం కొత్త రేషన్ కార్డులకు మాత్రమే కాకుండా, ఇప్పటికే ఉన్న కార్డుల్లో మార్పులు చేసుకోవడానికి కూడా అవకాశమిచ్చారు.
రేషన్ కార్డును విడదీయడం (స్ప్లిట్)
కొత్త కుటుంబ సభ్యులను జోడించడం
చిరునామా మార్పు
ఇలాంటి అన్ని అభ్యర్థనల కోసం దరఖాస్తులను గ్రామ/వార్డు సచివాలయాల ద్వారా ఒక నెలపాటు స్వీకరించనున్నారు. ఇప్పటి వరకూ మార్పుల కోసం వచ్చిన దరఖాస్తుల సంఖ్య 3.28 లక్షలు అని మంత్రి వెల్లడించారు. ఈ సారి ప్రజలకు అందించబోయే కొత్త రేషన్ కార్డులు సాధారణ కాగితం మీద కాకుండా స్మార్ట్ కార్డులుగా తయారు చేయబోతున్నారు.
QR కోడ్‌తో కూడిన భద్రతా ఫీచర్లు
కార్డుపై ప్రభుత్వ చిహ్నం మాత్రమే, నాయకుల ఫోటోలు లేవు
ప్రతి కుటుంబ సభ్యుని పేరు స్పష్టంగా కనిపించేలా డిజైన్
QR కోడ్ స్కాన్ చేస్తే గత ఆరు నెలల రేషన్ వినియోగ వివరాలు చూసే వీలుంటుంది
ఈ కొత్త స్మార్ట్ కార్డులు ఒక రాష్ట్రానికే పరిమితం కాకుండా, దేశంలో ఎక్కడైనా రేషన్ అందుకునేలా రూపొందించబడుతున్నాయి. ఇది ముఖ్యంగా వలస కూలీలకు, ఇతర రాష్ట్రాల్లో పనిచేసే వ్యక్తులకు ఎంతో ఉపయోగపడనుంది.
Also Read: Amaravati: కీలక నిర్ణయాలు – రాజధానిలో భూ కేటాయింపులకు ఆమోదం
దరఖాస్తు ఎలా చేయాలి?
దరఖాస్తులు గ్రామ/వార్డు సచివాలయాల్లో స్వీకరిస్తారు
వాట్సాప్ గవర్నెన్స్ ప్లాట్‌ఫామ్ ద్వారా కూడా దరఖాస్తులను మే 12 నుంచి ఆన్‌లైన్‌లో పంపించొచ్చు
KYC పూర్తి అయిన వారు కొత్తగా దరఖాస్తు చేయాల్సిన అవసరం లేదు
జూన్ నుంచి స్మార్ట్ కార్డులు పంపిణీ ప్రారంభమవుతాయని మంత్రి తెలిపారు
Nadendla Manohar: అకాల వర్షాల కారణంగా నష్టపోయిన రైతులకు పంట నష్ట పరిహారం అందిస్తామని మంత్రి హామీ ఇచ్చారు. ఇప్పటివరకు 1.5 కోట్ల మందికి దీపం పథకం ద్వారా లబ్ధి చేకూరిందన్నారు. ప్రభుత్వ పాఠశాలలకు త్వరలో 25 కేజీల ఫైన్ క్వాలిటీ రైస్ అందించనున్నట్టు ప్రకటించారు. ఈ దఫా రేషన్ వ్యవస్థ మరింత పారదర్శకంగా, డిజిటల్ ఆధారంగా పనిచేయబోతుంది. ప్రజల భాగస్వామ్యం ఎంత ఎక్కువగా ఉంటే, అంత ప్రభావవంతంగా ఈ కొత్త స్మార్ట్ రేషన్ కార్డుల విధానం అమలు కావచ్చు.