Murali Sreeshankar: ఓ క్రీడాకారుడి జీవితంలో గాయం అనేది ఒక పీడకల లాంటిది. అందులోనూ ‘లాంగ్ జంప్’ లాంటి క్రీడలో మోకాలికి తీవ్రమైన గాయమైతే.. ఇక మైదానంలోకి అడుగుపెట్టడమే అద్భుతం! “ఈ అథ్లెట్ కెరీర్ ముగిసిపోయింది” అని వైద్యులే తేల్చి చెప్పిన వేళ.. పట్టుదలే ఊపిరిగా మళ్లీ నిలబడి, భారత్కు రజత పతకాన్ని అందించి సరికొత్త చరిత్ర సృష్టించాడు కేరళ కుర్రాడు మురళి శ్రీశంకర్ (Murali Sreeshankar).
గ్లాస్గో వేదికగా జరుగుతున్న కమన్వెల్త్ గేమ్స్ 2026 (CWG 2026) లో లాంగ్ జంప్ విభాగంలో 8.09 మీటర్ల దూరం దుమికి శ్రీశంకర్ వెండి పతకాన్ని కైవసం చేసుకున్నాడు. 2022 బర్మింగ్హామ్ కమన్వెల్త్ గేమ్స్లోనూ సిల్వర్ గెలిచిన శ్రీశంకర్.. వరుసగా రెండోసారి ఈ కామన్వెల్త్ పతకాన్ని ముద్దాడడం గమనార్హం!
ఆశలు ఆవిరైన క్షణం నుంచి.. అద్భుత పునరాగమనం వరకు!
2018 కామన్వెల్త్ గేమ్స్కు సరిగ్గా 10 రోజుల ముందు తీవ్ర అనారోగ్యం పాలవ్వడంతో శ్రీశంకర్ రేసు నుంచి తప్పుకున్నాడు. అయినా నిరుత్సాహపడకుండా 2022 కామన్వెల్త్, 2023 ఆసియా క్రీడల్లో రజత పతకాలు సాధించి, భారతదేశంలోనే అత్యుత్తమ లాంగ్ జంపర్గా గుర్తింపు పొందాడు.
2024 పారిస్ ఒలింపిక్స్లో శ్రీశంకర్ కచ్చితంగా భారత్కు పతకం తెస్తాడని దేశమంతా ఆశగా ఎదురుచూసింది. కానీ, సరిగ్గా ఒలింపిక్స్కు కొన్ని నెలల ముందు ప్రాక్టీస్ చేస్తూ మోకాలికి తీవ్ర గాయమైంది. శస్త్రచికిత్స (సర్జరీ) తప్పనిసరి కావడంతో పారిస్ ఒలింపిక్స్ కల చెదిరిపోయింది. చాన్నాళ్ల పాటు రిహాబిలిటేషన్ సెంటర్కే పరిమితమయ్యాడు.
“తీవ్రమైన గాయం నుంచి కోలుకుని మళ్లీ లాంగ్ జంప్ చేయడం అసాధ్యమని, నా కెరీర్ ముగిసిపోయిందని చాలామంది డాక్టర్లు చెప్పారు. నాలోనూ ఎన్నో అనుమానాలు రేగాయి. కానీ ఖతార్లో సర్జరీ జరిగాక.. నాలో ఆత్మవిశ్వాసం పెరిగింది. ఆరు నెలల్లో మళ్లీ ట్రాక్పైకి వస్తాననే నమ్మకం కలిగింది” అని శ్రీశంకర్ తన పాత రోజులను గుర్తుచేసుకున్నాడు.
గ్లాస్గోలో మెరిసిన మురళి మ్యాజిక్!
బుధవారం జరిగిన లాంగ్ జంప్ ఫైనల్లో శ్రీశంకర్ బరిలోకి దిగిన తీరే అద్భుతం. తన మొదటి ప్రయత్నంలోనే 8.03 మీటర్ల దూరం దూకి మిగిలిన అథ్లెట్లకు గట్టి పోటీ ఇచ్చాడు. గాల్లోకి లేచేముందు దీర్ఘ శ్వాస తీసుకుంటూ, ప్రేక్షకుల వైపు చూస్తూ వారి నుంచి ఎనర్జీని అందుకునే శ్రీశంకర్ శైలి స్టేడియం అంతటినీ ఉర్రూతలూగించింది. అతని తండ్రి, కుటుంబ సభ్యులు గ్యాలరీ నుంచి గట్టిగా నినాదాలు చేస్తూ ఉత్సాహపరిచారు.
రెండో ప్రయత్నంలో ఏకంగా 8.09 మీటర్ల దూరం దుమికి పాయింట్ల పట్టికలో తొలి స్థానానికి చేరుకున్నాడు. చివరి రౌండ్ల వరకు లీడ్లోనే ఉన్నప్పటికీ, జమైకా అథ్లెట్ తజే గేల్ (Tajay Gayle) 8.15 మీటర్లతో బంగారు పతకాన్ని సొంతం చేసుకున్నాడు. దీంతో శ్రీశంకర్కు రెండో స్థానం (రజతం) దక్కింది. స్కాట్లాండ్కు చెందిన స్టీఫెన్ మెక్కెంజీ (8.08 మీటర్లు) కాంస్య పతకం గెలవగా, భారత్కే చెందిన లోకేష్ సత్యనాథన్ 7.97 మీటర్లతో ఐదో స్థానంలో నిలిచాడు.
స్వర్ణ పతకం తృటిలో చేజారినప్పటికీ, మైదానంలోకి అడుగుపెట్టడమే కష్టమనుకున్న చోట.. తట్టుకుని నిలబడి, పతకం సాధించి చూపించిన శ్రీశంకర్ నిజమైన విజేత! పట్టుదల ఉంటే అసాధ్యమైనది ఏదీ లేదని నిరూపించిన శ్రీశంకర్కు దేశవ్యాప్తంగా క్రీడాభిమానుల నుంచి ప్రశంసల జల్లు కురుస్తోంది.