Mahaa Conclave: ఉత్తరాంధ్ర రూపురేఖలను మార్చేయబోతున్న భోగాపురం అంతర్జాతీయ విమానాశ్రయం సాక్షిగా ‘మహా న్యూస్’ ఆధ్వర్యంలో నిర్వహించిన ‘మహా కాంక్లేవ్-4’ కార్యక్రమం ఎంతో వైభవంగా సాగింది. మహా గ్రూప్స్ సీఎండీ వంశీకృష్ణ మారెళ్ల నేతృత్వంలో జరిగిన ఈ ప్రతిష్టాత్మక వేదికపై స్వర్ణాంధ్ర ప్రగతి ముఖచిత్రం, ఉత్తరాంధ్ర భవిష్యత్తుపై ప్రజాప్రతినిధులు లోతుగా చర్చించారు.
ఈ కాంక్లేవ్లో పాల్గొన్న నెల్లిమర్ల ఎమ్మెల్యే లోకం మాధవి ప్రసంగిస్తూ.. భోగాపురం ఎయిర్పోర్ట్ విశేషాలతో పాటు ఈ ప్రాంతానికి రాబోతున్న సరికొత్త ప్రాజెక్టులపై కీలక విషయాలను పంచుకున్నారు.
రైతుల త్యాగం మరువలేనిది.. ఎయిర్పోర్ట్ ఉత్తరాంధ్రకే మణిహారం!
ఎమ్మెల్యే లోకం మాధవి మాట్లాడుతూ.. భోగాపురం విమానాశ్రయం నిర్మాణం వెనుక ఎంతోమంది రైతుల అమూల్యమైన త్యాగం ఉందని కొనియాడారు.
-
రైతుల త్యాగం: 7 గ్రామాలలోని 1,465 మంది రైతులు ఈ ప్రాంత ప్రగతి కోసం, రాబోయే తరాల భవిష్యత్తు కోసం తమ 2,203 ఎకరాల భూములను ధారాదత్తం చేశారని, వారి త్యాగం చరిత్రలో నిలిచిపోతుందని తెలిపారు.
-
చంద్రబాబు విజన్: 2018లోనే ఈ ఎయిర్పోర్ట్కు నాంది పలికి శంకుస్థాపన చేసిన ఘనత నారా చంద్రబాబు నాయుడిదేనని స్పష్టం చేశారు.
గత పాలనపై విమర్శలు – కూటమి వేగం!
గత ప్రభుత్వ వైఖరిపై స్పందిస్తూ.. పోలవరం ప్రాజెక్టుతో పాటు భోగాపురం ఎయిర్పోర్ట్ను కూడా గత ప్రభుత్వం పూర్తిగా నిర్లక్ష్యం చేసిందని విమర్శించారు. ఎర్ర బస్సే లేని ప్రాంతానికి ఎయిర్ బస్సు ఎందుకు? అంటూ నాటి నాయకులు హేళన చేశారని, కూటమి ప్రభుత్వం అధికారంలోకి వచ్చాకే ఈ ప్రాజెక్ట్ పనులు శరవేగంగా పూర్తయ్యాయని చెప్పారు.
ఉపముఖ్యమంత్రి పవన్ కళ్యాణ్ నాయకత్వంలో గతంలో 24వ స్థానంలో ఉన్న పంచాయతీ రాజ్, గ్రామీణాభివృద్ధి శాఖలు ఇప్పుడు దేశంలోనే నంబర్ వన్ స్థానానికి చేరాయని కొనియాడారు.
ఈ ప్రాంతానికి రాబోతున్న బహుమతులు..
ఉత్తరాంధ్ర అభివృద్ధి కోసం కూటమి ప్రభుత్వం సిద్ధం చేసిన ప్రణాళికలను ఎమ్మెల్యే వెల్లడించారు:
-
175 ఎకరాల్లో ఏఐ సిటీ (AI City): ఎన్నికల్లో ఇచ్చిన హామీ మేరకు ఈ ప్రాంతంలో 175 ఎకరాల విస్తీర్ణంలో ఆర్టిఫిషియల్ ఇంటెలిజెన్స్ (AI) సిటీని నిర్మించి, ప్రముఖ ఐటీ కంపెనీలను తీసుకురాబోతున్నాం.
-
మ్యాంగో క్లస్టర్ (Mango Cluster): నేషనల్ హార్టీకల్చర్ బోర్డు ద్వారా విజయనగరం, పరిసర ప్రాంతాల్లోని మామిడిని ప్రపంచానికి పరిచయం చేసేలా ప్రత్యేక మ్యాంగో క్లస్టర్ ఏర్పాటు చేయనున్నాం.
-
మత్స్యకారులకు కోల్డ్ స్టోరేజీలు: స్థానిక మత్స్యకారుల ఆదాయాన్ని పెంచేందుకు, సముద్ర ఉత్పత్తులను భద్రపరిచేందుకు ఆధునిక కోల్డ్ స్టోరేజీలను నిర్మిస్తాం.
-
బీచ్ టూరిజం అభివృద్ధి: సముద్ర తీర ప్రాంతాన్ని పర్యాటకంగా తీర్చిదిద్ది అంతర్జాతీయ స్థాయిలో బీచ్ టూరిజాన్ని ప్రమోట్ చేస్తాం.
పదేళ్ల తర్వాత ఈ ప్రాంతం ఊహించని స్థాయిలో అభివృద్ధి చెందుతుందని, వ్యవసాయం ఇంకా ఐటీ రంగాలు రెండింటికీ సమ ప్రాధాన్యం ఇస్తూ కూటమి ప్రభుత్వం స్వర్ణాంధ్ర నిర్మాణంలో ముందుకెళ్తోందని లోకం మాధవి ముగించారు.