Crime News: అమెరికాలో గుండెల్ని పిండేసే ఒక ఘోర హెలికాప్టర్ ప్రమాదం జరిగింది. ఎన్నో కలలతో పెళ్లి పీటలెక్కిన ఒక యువకుడు, వివాహం జరిగిన కొద్ది గంటల్లోనే హెలికాప్టర్ ప్రమాదంలో దుర్మరణం పాలయ్యాడు. జార్జియా రాష్ట్రంలో జరిగిన ఈ ప్రమాదంలో కొత్త పెళ్లికూతురు తీవ్ర గాయాలతో ప్రాణాలతో బయటపడగా, వరుడితో పాటు ప్రయాణిస్తున్న పైలట్ కూడా అక్కడికక్కడే ప్రాణాలు కోల్పోయాడు. అమెరికన్ మీడియా కథనాల ప్రకారం ఈ విషాద ఘటనకు సంబంధించిన పూర్తి వివరాలు ఇలా ఉన్నాయి:
సంతోషంగా సాగిన వివాహం.. ఇంతలోనే ఘోరం!
అట్లాంటా నివాసి, ప్రముఖ ‘డెల్టా ఎయిర్ లైన్స్’ (Delta Air Lines) లో కమర్షియల్ పైలట్గా పనిచేస్తున్న డేవ్ ఫిజి (25).. శుక్రవారం డాసన్ కౌంటీలోని డాసన్విల్లే సమీపంలో జరిగిన ఐదు సీట్ల ‘రాబిన్సన్’ హెలికాప్టర్ ప్రమాదంలో మరణించాడు. ప్రమాదం జరిగిన అదే రోజు ఉదయం డాసన్విల్లే సమీపంలోని ‘ది రివర్’ (The Revere) వెడ్డింగ్ వెన్యూలో డేవ్, జెస్నిల వివాహం వందలాది మంది అతిథుల సమక్షంలో అత్యంత ఘనంగా జరిగింది.
డేవ్ తల్లిదండ్రులు జార్జ్ ఇంకా ఫీబా ఫిజిలు చాలా ఏళ్ల క్రితమే కేరళలోని ఎర్నాకుళం (మువట్టుపుళా) నుండి అమెరికాకు వలస వచ్చారు. పెళ్లికూతురు జెస్ని కుటుంబానికి కూడా కేరళలోని ఆలప్పుజ జిల్లాతో మూలాలు ఉన్నాయి. “అది ఒక పర్ఫెక్ట్ వెడ్డింగ్.. అంతకంటే ఎక్కువ మేం ఏమీ కోరుకోలేము. అతడు మాకెంతో ప్రియమైన బిడ్డ, దేవుడు మాకిచ్చిన వరం” అని డేవ్ తండ్రి జార్జ్ ఫిజి కన్నీరుమున్నీరయ్యారు. కానీ ఆ సంతోషం ఎంతోసేపు నిలవలేదు.
ప్రతికూల వాతావరణం.. హెచ్చరించినా వినని పైలట్!
పెళ్లి వేడుక ముగిసిన తర్వాత కొత్త జంట హెలికాప్టర్లో బయలుదేరి పీచ్ట్రీ-డెకాల్బ్ విమానాశ్రయానికి చేరుకోవాల్సి ఉంది. ఆ రాత్రికి అట్లాంటా డౌన్టౌన్లోని ఒక హోటల్లో వారు బస చేయాలని ప్లాన్ చేసుకున్నారు. అయితే రిసెప్షన్ ముగిసే సమయానికి (రాత్రి 9:30 గంటల ప్రాంతంలో) దట్టమైన పొగమంచు, వర్షం కారణంగా వాతావరణం పూర్తిగా క్షీణించింది.
స్వయంగా అనుభవజ్ఞుడైన కమర్షియల్ పైలట్ అయిన డేవ్.. అంతటి ప్రతికూల వాతావరణంలో ప్రయాణించడానికి అస్సలు ఇష్టపడలేదు. “ఇంత మంచులో నేను ప్రయాణించను, మనం వెళ్లొద్దు” అని డేవ్ తన తండ్రితో కూడా అన్నాడు. అయితే, హెలికాప్టర్ పైలట్ మాత్రం ఎక్కువ ఎత్తులో (Higher Altitude) ప్రయాణించవచ్చనే నిర్ణయంతో హెలికాప్టర్ను టేకాఫ్ చేశాడు. ఆ తర్వాత కొద్దిసేపటికే (రాత్రి 10:30 గంటల ప్రాంతంలో) దట్టమైన అడవులు, కొండల మధ్య ఆ హెలికాప్టర్ కూలిపోయింది.
ఐదు గంటల పాటు శిథిలాల కిందే కొత్త పెళ్లికూతురు
ఘటనా స్థలం అత్యంత దుర్ఘటమైన కొండ ప్రాంతంలో ఉన్నందున రక్షక సిబ్బంది అక్కడికి చేరుకోవడానికి తీవ్ర ఇబ్బందులు పడ్డారు. దట్టమైన అడవిని నరుక్కుంటూ, రక్షక సిబ్బంది శిథిలాల వద్దకు చేరుకోవడానికి దాదాపు ఐదు నుండి ఆరు గంటల సమయం పట్టింది. అంతసేపు జెస్ని ఆ శిథిలాలు, విరిగిపడిన చెట్ల మధ్యే చిక్కుకుపోయింది.
డేవ్ తండ్రి జార్జ్ ఫిజి జెస్ని చెప్పిన మాటలను గుర్తు చేసుకుంటూ.. “ఆమెకు స్పృహ వచ్చేసరికి శిథిలాల కింద ఉంది. కళ్లు తెరిచి చూసేసరికి డేవ్ ఆమె ఛాతీపై పడి ఉన్నాడు. జెస్ని స్వయంగా ఒక నర్సు. ఆమె డేవ్ను తాకి పిలిచింది.. కానీ అప్పటికే అతని శరీరం పూర్తిగా చల్లబడిపోయింది” అంటూ ఆవేదన వ్యక్తం చేశారు. ఈ ప్రమాదంలో జెస్నికి ఒంటిపై తీవ్రమైన గాయాలు అయ్యాయి కానీ ఎముకలు ఏవీ విరగలేదు. ప్రస్తుతం ఆమె స్థానిక ఆసుపత్రిలో చికిత్స పొందుతోంది. కళ్ల ముందే భర్త చనిపోవడంతో ఆమె మానసికంగా తీవ్ర దిగ్భ్రాంతికి లోనైంది.
దర్యాప్తు ప్రారంభించిన అధికారులు
ఈ హెలికాప్టర్ ‘ప్రెస్టీజ్ హెలికాప్టర్స్’ సంస్థకు చెందినది. ఆ సంస్థ ఆపరేషన్స్ డైరెక్టర్ ఆండీ విటేకర్ మాట్లాడుతూ.. తమ కంపెనీ చరిత్రలోనే ఇలాంటి ప్రమాదం జరగడం ఇదే మొదటిసారి అని, గత నాలుగు దశాబ్దాలుగా తమకు క్లీన్ సేఫ్టీ రికార్డు ఉందని విచారం వ్యక్తం చేశారు. ప్రస్తుతం నేషనల్ ట్రాన్స్పోర్టేషన్ సేఫ్టీ బోర్డ్ (NTSB) మరియు ఫెడరల్ ఏవియేషన్ అడ్మినిస్ట్రేషన్ (FAA) ఈ ప్రమాదంపై దర్యాప్తును ప్రారంభించాయి. ఇందుకు సంబంధించిన ప్రాథమిక నివేదిక 30 రోజుల్లో వచ్చే అవకాశం ఉంది.