Heavy Rains: దేశవ్యాప్తంగా నైరుతి రుతుపవనాలు (South-West Monsoon) తీవ్రరూపం దాల్చాయి. పసిఫిక్ ఎఫెక్ట్తో జూన్ నెల అంతా ముఖం చాటేసిన వర్షాలు.. ఇప్పుడు ఒక్కసారిగా దేశాన్ని ముంచెత్తడానికి సిద్ధమయ్యాయి. రాబోయే 24 నుండి 72 గంటల్లో దేశంలోని ఏకంగా 23 రాష్ట్రాలలో భారీ నుండి అతి భారీ వర్షాలు కురిసే అవకాశం ఉందని భారత వాతావరణ శాఖ (IMD) సంచలన హెచ్చరికలు జారీ చేసింది.
ప్రస్తుతం గుజరాత్, మధ్యప్రదేశ్, జార్ఖండ్, బీహార్ మీదుగా నేపాల్ సరిహద్దుల వరకు విస్తరించిన రుతుపవనాలు.. రాబోయే రెండు రోజుల్లో యూపీ, ఉత్తరాఖండ్, హిమాచల్ ప్రదేశ్లలోకి మరింత వేగంగా దూసుకుపోవడానికి వాతావరణం అనుకూలంగా ఉంది. దీనికి తోడు జూలై 2 నుండి కొత్త పశ్చిమ అవాంతరం (Western Disturbance) క్రియాశీలకం కానుండటంతో వాయువ్య భారత్లో వర్షాల తీవ్రత ఊహించని రేంజ్లో పెరగనుంది.
డీటెయిల్డ్ వెదర్ రిపోర్ట్: ఏ ప్రాంతంలో ఎలా ఉండబోతోంది?
1. ఢిల్లీ-ఎన్సీఆర్ (Delhi-NCR): ఉక్కపోతకు బ్రేక్!
గత కొన్ని రోజులుగా జాతీయ రాజధాని ప్రాంతాన్ని వేధిస్తున్న తీవ్రమైన వేడి, తేమ నుండి ప్రజలకు భారీ ఉపశమనం లభించనుంది.
-
జూన్ 30న ఆకాశం మేఘావృతమై ఉరుములతో కూడిన మోస్తరు వర్షాలు కురుస్తాయి.
-
జూలై 1 నుండి 4 మధ్య వర్షాలు పీక్ స్టేజ్కి చేరనుండటంతో, గరిష్ట ఉష్ణోగ్రతలు ఒక్కసారిగా 5°C నుండి 6°C వరకు పడిపోనున్నాయి. అయితే, వర్షాలు స్థిరపడే వరకు జూన్ 30న కొన్ని చోట్ల వడగాడ్పుల (Heat waves) ప్రభావం ఉండవచ్చు.
2. ఉత్తర ప్రదేశ్, ఉత్తరాఖండ్: కొండ ప్రాంతాల్లో ‘రెడ్ అలర్ట్’!
యూపీ, ఉత్తరాఖండ్లలో రుతుపవనాలు పూర్తిస్థాయిలో విశ్వరూపం చూపిస్తున్నాయి.
-
యూపీ: తూర్పు ఉత్తరప్రదేశ్లో జూలై 3 వరకు, పశ్చిమ ఉత్తరప్రదేశ్లో జూలై 2 వరకు గంటకు 40-60 కిమీ వేగంతో ఈదురు గాలులు వీస్తూ భారీ వర్షాలు పడతాయి.
-
ఉత్తరాఖండ్: జూలై 5 వరకు కొండ ప్రాంతాలలో ఎడతెరిపి లేని కుండపోత వర్షాలు కురుస్తాయి. దీనివల్ల కొండచరియలు విరిగిపడటం (Landslides), ఆకస్మిక వరదలు (Flash floods) వచ్చే ముప్పు ఉంది. చార్ ధామ్ యాత్రికులు తమ ప్రయాణాలను వాయిదా వేసుకోవడం లేదా వాతావరణ సమాచారాన్ని చూసుకుని బయలుదేరడం మంచిది.
3. తెలుగు రాష్ట్రాలు & దక్షణాది: తెలంగాణలో భారీ వర్షాలు
దక్షిణ భారతదేశంలో కేరళ, కర్ణాటక తీరప్రాంతాలలో అతి భారీ వర్షాలు కురిసే అవకాశం ఉంది. అటు తెలంగాణ, ఇటు తమిళనాడులలో ఉరుములు, మెరుపులతో కూడిన మోస్తరు నుండి భారీ వర్షాలు కురుస్తాయని ఐఎండీ స్పష్టం చేసింది.
4. బీహార్, జార్ఖండ్: ఖరీఫ్ సాగుకు వరం
బీహార్లోని ఉత్తర, మధ్య జిల్లాల్లో రాబోయే రెండు రోజుల్లో కురిసే వర్షాలు ఖరీఫ్ పంటల సాగుకు అమృతంగా మారనున్నాయి. అయితే, మెరుపులు పడే ప్రమాదం ఉన్నందున రైతులు బహిరంగ ప్రదేశాల్లో ఉండవద్దని హెచ్చరించారు. జార్ఖండ్లోని గనుల ప్రాంతాల్లో నదులు ఉప్పొంగే ఛాన్స్ ఉండటంతో అక్కడ ‘ఎల్లో అలర్ట్’ జారీ చేశారు.
ఒకే వారంలో బంగాళాఖాతంలో 2 అల్పపీడనాలు!
ఈసారి రుతుపవనాలు ఇంతలా ఉధృతం కావడానికి కేవలం రుతుపవన ద్రోణి మాత్రమే కారణం కాదు.
వాతావరణ విశ్లేషణ: ఈ వారంలోనే బంగాళాఖాతంలో వరుసగా రెండు బ్యాక్-టు-బ్యాక్ అల్పపీడనాలు (Low-Pressure Areas) ఏర్పడనున్నాయి. ఇవి మధ్య భారతదేశం గుండా భూభాగంలోకి ప్రవేశిస్తాయి. ఈ వ్యవస్థల వల్ల వాతావరణంలోకి భారీ మొత్తంలో తేమ చేరి, తూర్పు, మధ్య, పశ్చిమ భారతదేశం అంతటా వర్షపాతం గణనీయంగా పెరుగుతుంది.
మత్స్యకారులకు బిగ్ వార్నింగ్.. ప్రయాణాలు వాయిదా వేసుకోండి!
అరేబియా సముద్రం, బంగాళాఖాతంలో బలమైన గాలులు వీస్తుండటంతో సముద్రం అలజడిగా మారింది. ఈ నేపథ్యంలో జూలై 3 వరకు మత్స్యకారులు ఎవరూ సముద్రంలోకి వేటకు వెళ్లవద్దని వాతావరణ శాఖ స్పష్టమైన ఆదేశాలు జారీ చేసింది. ముఖ్యంగా కొంకణ్-గోవా, కేరళ, కర్ణాటక, లక్ష్మిద్వీప్, అండమాన్ తీర ప్రాంతాల ప్రజలు అప్రమత్తంగా ఉండాలి.
పలు నగరాల్లో రోడ్లపై నీరు నిలిచిపోయే (Water logging) ప్రమాదం ఉన్నందున, ప్రజలు అత్యవసరమైతే తప్ప అనవసర ప్రయాణాలను వాయిదా వేసుకోవాలని ఐఎండీ విజ్ఞప్తి చేసింది.