Garuda Purana: హిందూ ధర్మ గ్రంథాలలో స్వర్గం మరియు నరకం రెండింటి గురించిన ప్రస్తావనలు వివరంగా ఉన్నాయి. పురాణాల ప్రకారం స్వర్గం అనేది దేవతలు నివసించే పరమ పవిత్రమైన స్థలం. భూమిపై బతికినంత కాలం మంచి పనులు, పుణ్యకార్యాలు చేసే మనుషులు మరణానంతరం స్వర్గానికి వెళతారు. దీనికి విరుద్ధంగా, తోటి జీవులను హింసిస్తూ పాపాలు లేదా చెడు పనులు చేసేవారిని యమధర్మరాజు నరకానికి పంపుతాడు. అక్కడ వారికి శిక్షగా మరిగే నూనెలో వేయించడం, నిప్పుకణాలపై పడుకోబెట్టడం, రంపాలతో కోయడం లాంటి నరకయాతనలు ఉంటాయని గ్రంథాలు చెబుతున్నాయి.
ముఖ్యంగా గరుడ పురాణంతో పాటు అగ్ని పురాణం, కఠోపనిషత్తు వంటి ప్రామాణిక గ్రంథాలలో పాపాత్ములు అనుభవించే 36 రకాల నరకాల గురించి వివరించారు. మనిషి చేసే తప్పుల తీవ్రతను బట్టి యమలోకంలో లభించే ఆ 36 నరకాలు, వాటి శిక్షల సమగ్ర వివరాలు ఇక్కడ చూద్దాం:
ఘోరమైన పాపాలు – భయంకర నరకాలు (1 నుండి 12):
-
1. మహావీచి (Mahavichi): ఈ నరకంలో ఎటు చూసినా రక్తపు ఏరులు కనిపిస్తాయి ఇంకా పెద్ద పెద్ద ఇనుప ముళ్లు ఉంటాయి. భూమిపై గోహత్య (ఆవును చంపడం) లాంటి మహాపాపాలు చేసేవారికి ఈ నరకంలో కఠిన శిక్ష పడుతుంది.
-
2. కుంభీపాకం (Kumbhipaka): ఈ నరకంలోని నేల అంతా బాగా కాలిన ఇసుక, నిప్పుకణాలతో నిండి ఉంటుంది. ఇతరుల భూములను, ఆస్తులను అక్రమంగా లాక్కునేవారు లేదా బ్రాహ్మణులను చంపేవారు ఈ నరకానికి రావాల్సి ఉంటుంది.
-
3. రౌరవం (Raurava): ఈ నరకంలో ఇనుప బాణాలు నిరంతరం మండుతూ ఉంటాయి. కోర్టుల్లో లేదా సమాజంలో ఎవరికైనా వ్యతిరేకంగా తప్పుడు సాక్ష్యం (అబద్ధపు సాక్ష్యం) చెప్పి అమాయకులను ఇరికించేవారిని ఈ బాణాలకు కట్టిపడేసి శిక్షిస్తారు.
-
4. మంజూషం (Manjusha): ఇక్కడి నేల ఇనుములా గట్టిగా, విపరీతమైన వేడితో కాలుతూ ఉంటుంది. తమ జీవితకాలంలో ఎలాంటి తప్పు చేయని అమాయకులను స్వార్థం కోసం బంధించి హింసించిన వారికి ఇక్కడ శిక్ష పడుతుంది.
-
5. అప్రతిష్ఠం (Apratistha): ఈ నరకంలో ఎక్కడ చూసినా చీము, మూత్రం, వాంతులు నిండి అసహ్యంగా ఉంటుంది. సమాజానికి మంచి చేసే బ్రాహ్మణులను, గురువులను వేధించి, బాధపెట్టే వారికి ఇక్కడ శిక్ష విధిస్తారు.
-
6. విలేపకం (Vilepaka): ఈ నరకంలో లాక్షాగృహం (లక్క) లాంటి తీవ్రమైన మంటలు మండుతుంటాయి. మత్తు పదార్థాలకు బానిసలై, మద్యం సేవించే బ్రాహ్మణులకు ఇక్కడ శిక్ష పడుతుంది.
-
7. మహాప్రభం (Mahaprabha): ఈ నరకంలో పెద్ద పెద్ద ఇనుప ములుకులు (చివరి భాగం సూదిగా ఉండే బాణాలు) ఉంటాయి. భార్యాభర్తల పవిత్ర బంధంలో గొడవలు పెట్టి, వారి కాపురాలను కూల్చి విడదీసేవారిని ఈ ఇనుప ములుకులకు గుచ్చి వేధిస్తారు.
-
8. జయంతి (Jayanti): ఇక్కడికి వచ్చే పాపాత్ములను పెద్ద పెద్ద ఇనుప బండరాళ్ల కింద నొక్కిపెట్టి నలిపేస్తారు. వివాహేతర బంధాలు పెట్టుకుని పరస్త్రీలతో (ఇతర మహిళలతో) వ్యభిచరించే వారిని ఈ నరకానికి తీసుకువస్తారు.
-
9. శాల్మలి (Shalmali): ఈ నరకంలో ఎటు చూసినా మండుతున్న ముళ్లు ఉంటాయి. పరపురుషులతో సంబంధాలు పెట్టుకునే స్త్రీలు, నిరంతరం అబద్ధాలు మాట్లాడుతూ కఠినమైన మాటలతో ఇతరులను ఏడిపించేవారు, ఇతరుల డబ్బుపై కన్ను వేసేవారు ఇక్కడికి వస్తారు. అలాగే కోడలు, కుమార్తె, సోదరి వంటి వరుసల వారితో శారీరక సంబంధాలు పెట్టుకునే కామాంధులకు, వృద్ధులను చంపేవారికి ఇక్కడ శిక్ష పడుతుంది.
-
10. మహారౌరవం (Maharaurava): ఈ నరకంలో ఇటుకల బట్టీలో లాగా ఎటు చూసినా నిప్పులు, మంటలు ఎగసిపడుతుంటాయి. ద్వేషంతో ఇతరుల ఇళ్లు, పొలాలు, వాములకు లేదా గిడ్డంగులకు (గోదాములకు) నిప్పు పెట్టే క్రిమినల్స్ ఇక్కడ కాలిపోతారు.
-
11. తామిస్రం (Tamisra): ఈ నరకంలో పాపాత్ములను ఇనుప పట్టీలతో, బరువైన గదలతో బాదుతారు. ఇతరుల కష్టార్జితాన్ని దొంగిలించే దొంగలకు ఇక్కడ దేహశుద్ధి శిక్ష పడుతుంది.
-
12. మహాతామిస్రం (Mahatamisra): ఈ నరకం నిండా కేవలం రక్తం తాగే జలగలే ఉంటాయి. అవి మనుషుల రక్తాన్ని పీల్చేస్తుంటాయి. కన్నతల్లిదండ్రులను, నమ్మిన ప్రాణ స్నేహితులను చంపే నరరూప రాక్షసులకు ఇక్కడ శిక్ష పడుతుంది.
ద్రోహాలు – కర్మల శిక్షలు (13 నుండి 24):
-
13. అసిపత్రవనం (Asipatravana): ఇది ఒక దట్టమైన అడవి లాంటి నరకం. అయితే ఇక్కడి చెట్లకు ఆకులకు బదులుగా పదునైన కత్తులు, కత్తుల లాంటి ఆకులు ఉంటాయి. నమ్మిన స్నేహితులకు ద్రోహం (వెన్నుపోటు) పొడిచే వారికి ఈ నరకంలో శిక్ష విధిస్తారు.
-
14. కరంభ వాలుక (Karambha Baluka): ఇది వేడి ఇసుక, నిప్పుకణాలతో నిండిన ఒక లోతైన బావి లాంటి నరకం. మూగజీవులను లేదా ఇతర మానవులను సజీవంగా తగులబెట్టే పనులు చేసే క్రూరులకు ఇక్కడ శిక్ష పడుతుంది.
-
15. కాకోలం (Kakola): ఈ నరకం అంతా చీము, పురుగులతో నిండి అసహ్యంగా ఉంటుంది. ఇతరులకు పెట్టకుండా, ఆకలితో ఉన్నవారితో పంచుకోకుండా ఒంటరిగా దొంగచాటుగా రుచికరమైన మిఠాయిలు (స్వీట్లు) తినేవారిని ఈ నరకానికి తెస్తారు.
-
16. కుడ్మలం (Kudmala): ఇది మూత్రం, చీము, వాంతులతో నిండిన అత్యంత అసహ్యకరమైన నరకం. నిత్య జీవితంలో దేవుడిని స్మరించకుండా, శాస్త్రం చెప్పిన పంచమహాయజ్ఞాలను, సత్కర్మలను అనుష్టించని వారు ఈ నరకంలో పడతారు.
-
17. మహాభీమం(Mahabhima): ఇది దుర్వాసనతో కూడిన కుళ్లిన మాంసం, రక్తంతో నిండిన ప్రదేశం. శాస్త్రాలలో నిషేధించిన నిషిద్ధ వస్తువులను లేదా అపవిత్ర ఆహారపదార్థాలను సేవించే వారికి ఇక్కడ శిక్ష పడుతుంది.
-
18. మహావటం (Mahavata): ఈ నరకంలో శవాలు, క్రిమికీటకాలు నిండి ఉంటాయి. కన్నకూతురిని, ఆడబిడ్డలను డబ్బు కోసం వేరేవాళ్లకు అమ్ముకునే నీచమైన మనుషులు ఇక్కడికి వస్తారు.
-
19. తిలపాకం (Tilapaka): ఇతరులను మానసికంగా, శారీరకంగా హింసించి, ఆనందించే వారిని ఇక్కడ నువ్వుల నుండి నూనె తీసే గానుగలో వేసి పిండుతారు. నువ్వులను నలిపేసినట్లు మనుషులను నలిపేస్తారు.
-
20. తైలపాకం (Tailapaka): ఈ నరకంలో కాగుతున్న వేడి నూనె గుండాలు ఉంటాయి. పాపాత్ములను ఆ మరిగే నూనెలో వేసి ఉడికిస్తారు. నమ్మిన స్నేహితులను, శరణు కోరి ఇంటికి వచ్చిన వారిని చంపిన వారికి మరణానంతరం ఈ శిక్ష పడుతుంది.
-
21. వజ్రకపాటం (Vajrakapata): ఇక్కడ పిడుగుల (ఆకాశం నుండి పడే వజ్రాల) ద్వారా తీవ్రంగా కొడతారు. నిత్యావసర వస్తువులలో, పాలు అమ్మే వ్యాపారంలో కల్తీ చేస్తూ ప్రజల ప్రాణాలతో ఆడుకునే వారికి, మోసాలు చేసేవారికి ఈ నరకంలో శిక్ష పడుతుంది.
-
22. నిరుచ్ఛ్వాసం (Niruchchhavasa): ఈ నరకంలో దట్టమైన చీకటి ఉంటుంది, శ్వాస పీల్చుకోవడానికి కనీసం గాలి కూడా ఆడదు. ఇతరులు పేదలకు చేసే దానధర్మాలను స్వార్థంతో అడ్డుకునే వారికి ఈ ఘోర నరకం ప్రాప్తిస్తుంది.
-
23. అంగారోపచ్యం (Angaropachya): ఈ నరకంలో ఎటు చూసినా నిప్పుకణాలే ఉంటాయి. దానం చేస్తానని లేదా సహాయం చేస్తానని మాట ఇచ్చి, ఆ తర్వాత లోభ గుణంతో మాట తప్పే వారిని ఇక్కడికి తెస్తారు.
-
24. మహాపాయి (Mahapayi): ఈ నరకం నిండా కేవలం మురికి, వ్యర్థాలు ఉంటాయి. నిత్యం స్వార్థం కోసం అబద్ధాలు మాట్లాడుతూ ఇతరులను ముంచే వారు చనిపోయాక ఇక్కడ తలకిందులుగా పడదోయబడతారు.
కల్తీలు – దొంగతనాల పాపాలు (25 నుండి 36):
-
25. మహాజ్వాలం (Mahajwala): ఈ నరకంలో ఎటు చూసినా భయంకరమైన అగ్నిజ్వాలలు ఉంటాయి. జీవితాంతం ఎలాంటి పశ్చాత్తాపం లేకుండా కేవలం పాపకార్యాల్లోనే మునిగితేలేవారు ఈ మంటల్లో కాలిపోతారు.
-
26. గుడపాకం (Gudapaka): ఈ నరకంలో మరిగే బెల్లం కుండలు లేదా పాకం ఉంటాయి. సమాజంలో అధర్మాన్ని పెంచుతూ, వ్యవస్థను పాడుచేసే వారిని ఈ మరిగే బెల్లం పాకంలో వేసి ఉడికిస్తారు.
-
27. క్రకచం (Krakacha): ఈ నరకంలో పదునైన, తిరిగే రంపాలు ఉంటాయి. శాస్త్రాలకు విరుద్ధంగా, నిషిద్ధ పద్ధతుల్లో మహిళలను బలవంతంగా లొంగతీసుకుని వ్యభిచరించే కామాంధులను ఈ రంపాలతో నిలువునా చీల్చుతారు.
-
28. క్షురధార (Kshuradhara): ఈ నరకంలో ఎటు చూసినా పదునైన మంగళకత్తులు (క్షురక కత్తులు) ఉంటాయి. సమాజంలో సాధువుల, బ్రాహ్మణుల లేదా దేవాలయాల భూములను అక్రమంగా లాక్కునేవారికి ఇక్కడ కాళ్లు, చేతులు నరుకుతూ శిక్ష విధిస్తారు.
-
29. అంబరీషం (Ambarisha): ఇక్కడ ప్రళయాగ్ని లాంటి భయంకరమైన మంటలు మండుతుంటాయి. పరాయి వారి బంగారాన్ని, విలువైన వస్తువులను దొంగతనం చేసే దొంగలు ఈ అగ్నిలో కాలిపోతారు.
-
30. వజ్రకుఠారమ్ (Vajrakuthara): ఈ నరకం వజ్రాయుధాలు, గొడ్డళ్లతో నిండి ఉంటుంది. స్వార్థం కోసం ప్రకృతిని నాశనం చేస్తూ అడవులను, పచ్చని చెట్లను నరికేవారిని ఇక్కడ వజ్రాయుధాలతో బాదుతారు.
-
31. పరితాపం (Paritapa): ఇక్కడ అగ్నితో కఠినమైన శిక్షలు విధిస్తారు. ఇతరులను చంపడానికి అన్నంలో విషం పెట్టేవారు, లేదా తేనెను దొంగిలించే దొంగలు ఇక్కడి మంటల్లో కాలిపోతారు.
-
32. కాలసూత్రం (Kala Sutra): ఇతరుల పంటపొలాలను నాశనం చేసేవారికి, రైతుల కష్టాన్ని, పంటను పాడుచేసే దుర్మార్గులకు ఈ నరకంలో కఠినమైన శిక్షలు పడతాయి.
-
33. కశ్మలం (Kashmala): ఈ నరకం నోరు, ముక్కు నుండి వచ్చే అసహ్యకరమైన మురికి మరియు శ్లేష్మ వ్యర్థాలతో నిండి ఉంటుంది. మూగజీవులను హింసిస్తూ మాంసాహారాన్ని విపరీతంగా భక్షించేవారికి ఈ నరకం ప్రాప్తిస్తుంది.
-
34. ఉగ్రగంధం (Ugragandha): ఇది లాలాజలం, చీము, మూత్రం, మలంతో నిండిన అత్యంత దుర్వాసన గల నరకం. కన్నవారిని గౌరవించకుండా, చనిపోయిన తమ పితృదేవతలకు పిండప్రదానం (శ్రాద్ధకర్మలు) చేయని కృతఘ్నులను ఇక్కడికి తీసుకువస్తారు.
-
35. దుర్ధరం (Durdhara): ఈ నరకంలో జలగలు, తేళ్లు, విషకీటకాలతో కుట్టించి నిరంతరం హింసిస్తారు. అమాయకులను ముంచి, వారి రక్తాన్ని పీల్చే వడ్డీ వ్యాపారులు (మీటర్ వడ్డీలు వసూలు చేసే క్రూరులు) ఈ నరకానికి వెళతారు.
-
36. వజ్రమహాపీడ (Vajramahapida): ఇక్కడ ఇనుప గదలతో, వజ్రాలతో పాపాత్ములను బలంగా బాదుతారు. బంగారం దొంగిలించేవారు, మూగజీవులను క్రూరంగా చంపి తినేవారు, ఇతరుల ఆసనాలు (కుర్చీలు), పరుపులు లేదా బట్టలను దొంగిలించే దొంగలకు ఇక్కడ తీవ్రమైన శిక్ష పడుతుంది.
గరుడ పురాణంలో పేర్కొన్న ఈ నరకాల గురించిన వివరణ కేవలం భయపెట్టడానికి కాదు.. మనిషి సమాజంలో బతికినంత కాలం తోటి మానవులను, మూగజీవులను హింసించకుండా, ధర్మ మార్గంలో నడవాలనే నైతిక విలువలను నేర్పడానికి ఉద్దేశించినది. “పాప కర్మలు చేస్తే దానికి తగిన శిక్షలు అనుభవించక తప్పదు” అనే కర్మ సిద్ధాంతాన్ని ఈ పురాణ విశ్లేషణ నిరూపిస్తోంది.