CM Vijay: తమిళనాడు రాజకీయాల్లో సంచలనం సృష్టిస్తూ, అధికార పగ్గాలు చేపట్టిన నటుడు, ముఖ్యమంత్రి విజయ్ నేతృత్వంలోని ‘తమిళగ వెట్రి కళగం’ (TVK) పార్టీ మరింత బలోపేతం అవుతోంది. పార్టీని క్షేత్రస్థాయిలో మరింత శక్తివంతంగా మార్చేందుకు విజయ్ గట్టి ప్రయత్నాలు చేస్తున్నారు. ఇందులో భాగంగానే ఇతర ప్రధాన పార్టీలైన అన్నాడీఎంకే, డీఎంకేకు చెందిన పలువురు సీనియర్ నాయకులు పెద్ద సంఖ్యలో టీవీకే పార్టీలో చేరుతున్నారు. తాజాగా జరిగిన ఈ చేరికలు విజయ్కు రాజకీయంగా పెద్ద బూస్ట్ను ఇచ్చాయని చెప్పవచ్చు.
ఈ చేరికల్లో ముఖ్యంగా అన్నాడీఎంకే పార్టీకి చెందిన నలుగురు మాజీ మంత్రులు టీవీకే తీర్థం పుచ్చుకోవడం తమిళ రాజకీయాల్లో హాట్ టాపిక్గా మారింది. గతంలో అన్నాడీఎంకే ప్రభుత్వంలో మంత్రులుగా పనిచేసిన ఎం.సి. సంపత్, ఎన్.ఆర్. శివపతి, కడంబూర్ సి. రాజు, ఉడుమలై కె. రాధాకృష్ణన్ అధికారికంగా విజయ్ పార్టీలో చేరారు. వీరందరికీ తమిళనాడు రాజకీయాల్లో మంచి గుర్తింపు, విస్తృతమైన అనుభవం ఉంది. వీరితో పాటు డీఎంకే మాజీ ఎమ్మెల్యే జే. కరుణానిధి కూడా టీవీకే గూటికి చేరారు.
పోటీ చేసిన మొదటి ఎన్నికల్లోనే ఘన విజయం సాధించి ముఖ్యమంత్రి పీఠాన్ని అధిష్టించిన విజయ్, ఇప్పుడు తన పార్టీని భవిష్యత్తు కోసం మరింత పటిష్టం చేసుకుంటున్నారు. అందుకే డీఎంకే, అన్నాడీఎంకే పార్టీల నుండి బలమైన నాయకులను తమ వైపు తిప్పుకుంటున్నారు. ప్రస్తుతం ఉన్న పరిస్థితుల్లో ముఖ్యంగా అన్నాడీఎంకే పార్టీ నుండి టీవీకేకు మద్దతు బాగా పెరుగుతోందని, ఈ సీనియర్ నాయకుల అనుభవం తమ పార్టీ ఎదుగుదలకు ఎంతో సహాయపడుతుందని టీవీకే వర్గాలు భావిస్తున్నాయి.