Akriti Agarawal: భారత యువ క్రికెటర్ పృథ్వీ షా, అతని కాబోయే భార్య, ప్రముఖ సోషల్ మీడియా ఇన్ఫ్లుయెన్సర్ అకృతి అగర్వాల్ విడిపోయారంటూ గత కొద్దిరోజులుగా సోషల్ మీడియాలో వస్తున్న పుకార్లకు ఎట్టకేలకు తెరపడింది. తమ బంధంపై జరుగుతున్న అసత్య ప్రచారాలపై అకృతి స్వయంగా ఇన్స్టాగ్రామ్ వేదికగా స్పందిస్తూ క్లారిటీ ఇచ్చింది.
క్రిప్టిక్ పోస్ట్తో మొదలైన లొల్లి:
ఇటీవల అకృతి అగర్వాల్ తన ఇన్స్టాగ్రామ్ స్టోరీలో నమ్మకద్రోహం, మోసం గురించి అర్థం వచ్చేలా ఒక క్రిప్టిక్ సందేశాన్ని పోస్ట్ చేసింది. ఆమె ఆ పోస్ట్లో ఎక్కడా పృథ్వీ షా పేరును ప్రస్తావించకపోయినప్పటికీ.. నెటిజన్లు, కొన్ని మీడియా సంస్థలు అది పృథ్వీని ఉద్దేశించిందేనని ఊహించాయి. దీనికి తోడు ఆమె పృథ్వీ షాను కొంత సమయం ఇన్స్టాగ్రామ్లో అన్ఫాలో చేసి, మళ్లీ ఫాలో చేయడం.. అలాగే రిలేషన్షిప్స్లో మోసం గురించిన మరికొన్ని కొటేషన్లను పంచుకోవడంతో వీరిద్దరి నిశ్చితార్థం రద్దయిందనే వార్తలు దావానలంలా వ్యాపించాయి.
పుకార్లకు చెక్ పెట్టిన అకృతి:
ఈ ప్రచారంపై తీవ్రంగా స్పందించిన అకృతి.. వస్తున్న వార్తలన్నీ పూర్తిగా అబద్ధమని తేల్చేసింది. “నేను పెట్టిన పోస్టులో ఎక్కడా నా కాబోయే భర్త పేరు చెప్పలేదు. మా బంధం ముగిసిందని కానీ, ఎంగేజ్మెంట్ రద్దయిందని కానీ నేను ఎప్పుడూ అనలేదు. చాలామంది ఊహించుకుని తప్పుడు ప్రచారం చేశారు. మేమిద్దరం ఇప్పటికీ సంతోషంగా కలిసి ఉన్నాం, మా నిశ్చితార్థం కొనసాగుతోంది. మా మధ్య ఎలాంటి మనస్పర్ధలు లేవు” అని స్పష్టం చేసింది.
అంతేకాకుండా, “కేవలం ఊహాగానాల ఆధారంగా ఒక పబ్లిక్ ఫిగర్ ప్రతిష్ఠను ఎంత సులభంగా దెబ్బతీయవచ్చో ఈ ఘటనతో నాకు అర్థమైంది. నా భాగస్వామి గౌరవానికి భంగం కలుగుతుండటాన్ని చూస్తూ ఊరుకోలేకే ఈ వివరణ ఇస్తున్నాను” అని రాసుకొచ్చింది. దీంతో వీరిద్దరూ విడిపోయారనే వార్తలకు ఫుల్స్టాప్ పడింది.
నిశ్చితార్థం & పృథ్వీ షా కెరీర్:
పృథ్వీ షా, అకృతి అగర్వాల్ గత మార్చి 8న తాము నిశ్చితార్థం చేసుకున్నట్లు ఇన్స్టాగ్రామ్ ద్వారా అధికారికంగా ప్రకటించారు. అకృతికి సోషల్ మీడియాలో భారీ క్రేజ్ ఉంది, ఆమెకు ఇన్స్టాగ్రామ్లో సుమారు 31 లక్షల (3.1 Million) మంది ఫాలోవర్లు ఉన్నారు. ఫ్యాషన్, లైఫ్స్టైల్ కంటెంట్తో ఆమె బాగా పాపులర్ అయింది.
మరోవైపు పృథ్వీ షా క్రికెట్ కెరీర్ ప్రస్తుతం ఒడిదొడుకుల్లో సాగుతోంది. ఐపీఎల్లో ఢిల్లీ క్యాపిటల్స్ జట్టులో ఉన్నప్పటికీ అతనికి ఆడే అవకాశం దక్కలేదు. గతంలో ముంబైలో సోషల్ మీడియా ఇన్ఫ్లుయెన్సర్ సప్నా గిల్తో జరిగిన సెల్ఫీ వివాదం, ఫిట్నెస్ సమస్యలు, అలాగే నిషేధిత డ్రగ్ (దగ్గు సిరప్ వల్ల శరీరంలోకి చేరినట్లు పృథ్వీ తెలిపిన టెర్బుటాలిన్) పాజిటివ్గా తేలి 8 నెలల నిషేధం ఎదుర్కోవడం వంటి అంశాల వల్ల పృథ్వీ షా మైదానం వెలుపల పలుమార్లు వార్తల్లో నిలిచాడు.