Condom In Beer: సిద్దిపేట జిల్లాలో ఒక వింత మరియు షాకింగ్ ఘటన వెలుగుచూసింది. ఈ వేసవి కాలంలో ఎండల తీవ్రత ఎక్కువగా ఉండటంతో, చల్లగా ఒక బీర్ తాగి సేదతీరాలని అనుకున్న ఒక వ్యక్తికి తీవ్ర నిరాశ, అసహ్యం కలిగించే అనుభవం ఎదురైంది. అతను కొన్న బీర్ బాటిల్లో ఏకంగా ఒక కండోమ్ ప్యాకెట్ కనిపించడం స్థానికంగా పెద్ద దుమారమే లేపింది. దీనికి సంబంధించిన ఒక వీడియో ప్రస్తుతం సోషల్ మీడియాలో విపరీతంగా వైరల్ అవుతోంది.
వివరాల్లోకి వెళితే.. భూంపల్లి ప్రాంతానికి చెందిన ఒక వ్యక్తి మంగళవారం రోజు ఒక వైన్ షాప్నకు వెళ్లి కింగ్ఫిషర్ బీర్ బాటిల్ కొనుగోలు చేశాడు. ఇంటికి వచ్చి బీర్ తాగుదామని బాటిల్ను చూసేసరికి, అందులో ఏదో ప్యాకెట్ తేలుతున్నట్లు కనిపించింది. ఏంటా అని నిశితంగా గమనించగా, అది కండోమ్ ప్యాకెట్ అని తెలిసి సదరు కస్టమర్ ఒక్కసారిగా షాక్కు గురయ్యాడు.
వెంటనే ఆ బీర్ బాటిల్ను తీసుకుని వైన్ షాప్ యజమాని దగ్గరకు వెళ్లి నిలదీశాడు. అయితే, వైన్స్ నిర్వాహకులు దీనిపై సరిగ్గా స్పందించలేదు సరికదా, నిర్లక్ష్యంగా సమాధానం చెప్పారు. దాంతో విసిగిపోయిన సదరు కస్టమర్, ఆ కండోమ్ ప్యాకెట్ ఉన్న బీర్ బాటిల్ను వీడియో తీసి సోషల్ మీడియాలో పెట్టాడు. అంతటితో ఆగకుండా, గతంలో కూడా ఇదే వైన్ షాప్లో బీర్ కొంటే అందులో కేవలం నీళ్లు మాత్రమే ఉన్నాయని, మద్యం మత్తు అస్సలు లేదంటూ అధికారులకు ఫిర్యాదు చేశాడు.
ఈ విషయం కాస్తా ఎక్సైజ్ అధికారుల వరకు వెళ్లడంతో వారు రంగంలోకి దిగారు. సదరు వైన్ షాప్ వద్దకు చేరుకుని పరిశీలించారు. అసలు మూసి ఉన్న బీర్ బాటిల్లోకి కండోమ్ ప్యాకెట్ ఎలా వచ్చింది? కంపెనీలో బీర్లు తయారు చేసేటప్పుడే ఈ నిర్లక్ష్యం జరిగిందా? లేక ఎవరైనా కావాలనే సీసా మూత తీసి ఇలాంటి పని చేశారా? అనే కోణంలో విచారణ జరుపుతామని అధికారులు కస్టమర్కు హామీ ఇచ్చారు. ఈ ఘటనతో మద్యం ప్రియులు తీవ్ర ఆందోళన వ్యక్తం చేస్తున్నారు.
బీర్ బాటిల్లో కండోమ్ ప్యాకెట్ కలకలం
సిద్దిపేట జిల్లా అక్బర్పేట్ భూంపల్లిలోని ఓ వైన్స్ షాపులో తాను కొన్న కింగ్ ఫిషర్ బీర్ బాటిల్లో ఖాళీ కండోమ్ ప్యాకెట్ చూసి ఆశ్చర్య పోయిన వ్యక్తి
ఇదేంటని నిలదీయగా వైన్స్ షాప్ నిర్వాహకులు స్పందించలేదని షాప్ ముందు ఆందోళనకు దిగిన వినియోగదారులు… pic.twitter.com/dsYtybPXWv
— Telugu Scribe (@TeluguScribe) May 20, 2026