Farmhouse Party: వీకెండ్ వస్తే చాలు.. హైదరాబాద్ శివార్లలోని ఫామ్‌హౌస్‌లు పార్టీ కల్చర్‌తో హోరెత్తిపోతున్నాయి. సరదాగా గడపడం వరకు బాగానే ఉన్నా.. అనుమతులు లేని మద్యం, గంజాయి లాంటి మత్తు పదార్థాల వాడకం కలకలం రేపుతోంది. తాజాగా రంగారెడ్డి జిల్లా చేవెళ్ల పోలీస్ స్టేషన్ పరిధిలోని ఓ ప్రైవేట్ ఫామ్‌హౌస్‌లో జరుగుతున్న భారీ పార్టీపై పోలీసులు, స్పెషల్ ఆపరేషన్ టీమ్ (SOT) ఆకస్మిక దాడులు నిర్వహించి షాక్ ఇచ్చారు. ఎలాంటి అనుమతులు లేకుండా మద్యం తాగుతూ, పార్టీ చేసుకుంటున్న హైదరాబాద్‌లోని ప్రముఖ విద్యాసంస్థల విద్యార్థులను రెడ్ హ్యాండెడ్‌గా పట్టుకున్నారు.
అర్ధరాత్రి ఎల్జీ ఫామ్‌హౌస్‌లో దాడి: 108 మంది విద్యార్థులు!
చేవెళ్ల మండలం కమ్మెట గ్రామం పరిధిలోని ‘ఎల్జీ ఫామ్‌హౌస్’ (LG Farmhouse)లో అర్ధరాత్రి భారీ శబ్దాలతో సీక్రెట్ పార్టీ జరుగుతోందని చేవెళ్ల పోలీసులకు, ఎస్‌వోటీ బృందాలకు పక్కా సమాచారం అందింది.
పోలీసులు ఆకస్మికంగా ఫామ్‌హౌస్‌లోకి ప్రవేశించగానే అక్కడున్న యువతీ యువకులు భయంతో పరుగులు తీశారు. పోలీసులు అక్కడ తనిఖీలు చేపట్టగా మొత్తం 108 మంది విద్యార్థులు మద్యం సేవిస్తూ పట్టుబడ్డారు. వీరిలో 71 మంది బాలురు, 37 మంది బాలికలు ఉన్నారు. వీరంతా హైదరాబాద్‌లోని ప్రముఖ ఐసీఎఫ్‌ఏఐ (ICFAI), ఐబీఎస్ (IBS) విద్యాసంస్థలకు చెందిన బీబీఏ, బీటెక్ విద్యార్థులుగా గుర్తించారు.
డ్రగ్ టెస్టుల్లో నలుగురికి గంజాయి పాజిటివ్.. 15 గ్రాముల గంజాయి స్వాధీనం
మద్యంతో పాటు ఇతర మత్తు పదార్థాలు ఏమైనా వాడుతున్నారా అనే అనుమానంతో పోలీసులు అక్కడికక్కడే డ్రగ్ స్క్రీనింగ్ కిట్ల ద్వారా విద్యార్థులకు పరీక్షలు నిర్వహించారు.
నిర్వహించిన డ్రగ్ టెస్టుల్లో నలుగురు వ్యక్తులు గంజాయి (Cannabis) సేవించినట్లు పాజిటివ్‌గా తేలింది. ఘటనా స్థలం నుంచి పోలీసులు 15 గ్రాముల గంజాయి, భారీ సంఖ్యలో అనుమతి లేని మద్యం బాటిళ్లను స్వాధీనం చేసుకున్నారు. విద్యార్థులు వచ్చిన 7 కార్లు, 3 బైకులు, 70 మొబైల్ ఫోన్లను అధికారులు సీజ్ చేశారు.
కేస్ నమోదు.. నిర్వాహకులపై లోతైన దర్యాప్తు
ఈ ఘటనపై చేవెళ్ల పోలీస్ స్టేషన్ ఇన్‌స్పెక్టర్ నరేంద్ర రెడ్డి స్పందిస్తూ వివరాలు వెల్లడించారు. అనుమతి లేకుండా విచ్చలవిడిగా పార్టీ నిర్వహించడం, గంజాయి వాడకంపై కేసు నమోదు చేసి లోతుగా దర్యాప్తు జరుపుతున్నట్లు తెలిపారు.
విద్యార్థులను విచారించి చేవెళ్ల పోలీస్ స్టేషన్‌కు తరలించారు. అసలు ఈ పార్టీని ఎవరు ఆర్గనైజ్ చేశారు? ఈ ఫామ్‌హౌస్‌ను ఎవరి పేరుపై బుక్ చేశారు? విద్యార్థులకు గంజాయి ఎక్కడి నుంచి సరఫరా అయింది? అన్న కోణాల్లో పోలీసులు ఆరా తీస్తున్నారు. చట్టప్రకారం బాధ్యులైన వారిపై కఠిన చర్యలు తీసుకుంటామని, ఫామ్‌హౌస్ యజమానులకు కూడా నోటీసులు జారీ చేస్తామని పోలీసులు హెచ్చరించారు.
