Bollywood: కపూర్, ఆలియా భట్‌ల కలల నివాసం ‘కృష్ణ రాజ్’ ఎట్టకేలకు సిద్ధమైంది! ముంబై బాంద్రాలోని అత్యంత విలాసవంతమైన ప్రదేశంలో ఆరు అంతస్తులుగా నిర్మించబడిన ఈ అద్భుత భవంతి, సుదీర్ఘ కాలంగా కొనసాగిన నిర్మాణ పనులకు ముగింపు పలికింది. ప్రస్తుతం శుభ గృహప్రవేశానికి అవసరమైన ఏర్పాట్లతో తీర్చిదిద్దుతున్నారు.
ఈ కలల బంగ్లా గురించి చర్చ జరుగుతుండగా, ఇప్పుడు సినీ వర్గాల్లో హాట్ టాపిక్‌గా మారిన విషయం మరొకటి. దాదాపు రూ.250 కోట్ల విలువ కలిగిన ఈ ఇంటిని రణ్‌బీర్, ఆలియా తమ ఏడాదిన్నర వయస్సున్న ముద్దుల కుమార్తె రాహా కపూర్ పేరు మీద రిజిస్టర్ చేయనున్నారన్న వార్తలు వెలుగులోకి వచ్చాయి. ఇది నిజమైతే, రాహాకు తల్లిదండ్రులు అందించే ఇది ఒక చిరస్మరణీయ కానుకగా నిలిచిపోతుంది.
‘కృష్ణ రాజ్’ బంగ్లా కేవలం ఓ ఇల్లు కాదు… అది కపూర్ కుటుంబ వారసత్వానికి, ఆవిర్భావానికి ప్రతీక. ఈ స్థలం ఒకప్పుడు రణ్‌బీర్ దాదా రాజ్ కపూర్, నానమ్మ కృష్ణ రాజ్ కపూర్ నివాసంగా ఉండేది. తర్వాత రిషి కపూర్, నీతూ కపూర్ లకు వారసత్వంగా వెళ్లింది. ఇప్పుడు అదే భూమిపై ఆధునికతకు ప్రతిరూపంగా ఈ బంగ్లా నిర్మించబడింది. పూల కుండీలతో అలంకరించిన బాల్కనీలు, శుభ్రంగా సిద్ధం చేసిన ముఖద్వారం – అన్నీ కొత్త జీవం పోస్తున్నాయి.
ఈ ప్రాజెక్టును రణ్‌బీర్, ఆలియా ఇద్దరూ ఎంతో జాగ్రత్తగా పర్యవేక్షించారు. వారి తల్లి నీతూ కపూర్ కూడా తరచూ నిర్మాణ ప్రాంతానికి వచ్చి పనులను గమనించారు. ఇప్పుడు గృహప్రవేశానికి శుభ ముహూర్తం నిర్ణయించుకొని, కుటుంబంతో కలసి ఈ కొత్త ఇంటిలోకి అడుగుపెట్టేందుకు సిద్ధమవుతున్నారు.
ఈ బంగ్లాను చిన్నారి రాహా పేరిట రిజిస్టర్ చేయాలనే ఆలోచన, ఆమె పట్ల తల్లిదండ్రులు చూపుతున్న ప్రేమను, భవిష్యత్తులో ఆమెకు అందించాలనుకునే భద్రతను తెలియజేస్తోంది. దీనిపై అభిమానుల్లో ఉత్సాహం మ‌రింత పెరిగింది. ఇప్పుడు రణ్‌బీర్–ఆలియా ఫ్యాన్స్ ఒక్కసారి ఆ ఇంటి లోపల చూపేందుకు ఆసక్తిగా ఎదురుచూస్తున్నారు!