Bengaluru: కర్ణాటక రాజధాని బెంగళూరులోని ఓ ప్రముఖ పబ్‌లో అర్ధరాత్రి తీవ్ర గందరగోళం చెలరేగింది. సమయం దాటినా నిబంధనలకు విరుద్ధంగా నడుపుతున్న పబ్‌ను తనిఖీ చేసేందుకు వెళ్లిన పోలీసు అధికారులపైనే కొందరు వ్యక్తులు దాడికి యత్నించడంతో పాటు విధులకు ఆటంకం కలిగించారు. ఈ ఘటనలో విధుల్లో ఉన్న పోలీసులను దూషిస్తూ బెదిరింపులకు పాల్పడిన వారిలో ఆంధ్రప్రదేశ్‌లోని కుప్పం ప్రాంతీయ అభివృద్ధి సంస్థ (కడా – KADA) ప్రాజెక్ట్ డైరెక్టర్ (పీడీ) వికాస్ మర్మత్ ఉండటం తీవ్ర సంచలనం రేపుతోంది.
బెంగళూరు నార్త్ పరిధిలోని కబ్బన్ పార్క్ పోలీస్ స్టేషన్‌లో ఈ వ్యవహారంపై అధికారికంగా క్రిమినల్ కేసు నమోదైంది. పోలీసుల ఎఫ్‌ఐఆర్‌లో ఏకంగా కడా ప్రాజెక్ట్ డైరెక్టర్‌నే ప్రధాన నిందితుడు (A1)గా పేర్కొనడం ఇప్పుడు రెండు రాష్ట్రాల అధికార వర్గాల్లో హాట్ టాపిక్‌గా మారింది.
అసలు ఆ రాత్రి ఏం జరిగింది?
పోలీసుల వివరాల ప్రకారం అక్టోబర్ 9వ తేదీ రాత్రి, 10వ తేదీ తెల్లవారుజామున జరిగిన ఘటన ఇలా ఉంది. నగరంలో పబ్‌లు, బార్లు నిర్దేశిత సమయం దాటిన తర్వాత నడపకూడదన్న నిబంధనలు ఉన్నాయి. ఈ క్రమంలో బెంగళూరు నగర పోలీస్ కమిషనర్ ఆదేశాల మేరకు పోలీసులు వివిధ ప్రాంతాల్లో తనిఖీలు చేపట్టారు.
కసబా, బెంగళూరు నార్త్ పరిధిలోని ఎంజీ రోడ్ / చర్చి స్ట్రీట్ సమీపంలో ఉన్న ‘కావోరే బార్ అండ్ రెస్టారెంట్’ (Cavore Bar and Restaurant) లోకి తెల్లవారుజామున పోలీసులు ప్రవేశించారు. సమయం ముగిసినా పబ్ ఇంకా నడుస్తుండటాన్ని గుర్తించి, విధుల్లో ఉన్న పోలీస్ అధికారులు బి.ఎన్. అశోక్, మహదేవయ్యలు నిర్వాహకులను ప్రశ్నించారు.
ఆ సమయంలో అక్కడే ఉన్న నలుగురు వ్యక్తులు పోలీసులతో వాగ్వాదానికి దిగారు. విధుల్లో ఉన్న అధికారులను తీవ్ర పదజాలంతో దూషిస్తూ, తామెవరో తెలుసా అంటూ బెదిరింపులకు దిగారు. అంతటితో ఆగకుండా పోలీసుల విధులకు తీవ్ర ఆటంకం కలిగిస్తూ, వారిపై భౌతిక దాడికి యత్నించారు.
కబ్బన్ పార్క్ పీఎస్‌లో కేసు నమోదు – ఏ1గా వికాస్ మర్మత్..
ఈ ఘటనపై పోలీస్ ఇన్‌స్పెక్టర్ అరుణ్ సాలుంకే ఇచ్చిన అధికారిక ఫిర్యాదు మేరకు కబ్బన్ పార్క్ పోలీసులు అక్టోబర్ 10న క్రైమ్ నంబర్ Cr No: 150/2026 కింద ఎఫ్‌ఐఆర్ నమోదు చేశారు.
-
నిందితుల జాబితా..
-
వికాస్ మర్మత్ (A1) – కుప్పం ఏరియా డెవలప్‌మెంట్ అథారిటీ (కడా) ప్రాజెక్ట్ డైరెక్టర్
-
అభయ్ ఉదయ్ సింగ్ (A2)
-
నితీష్ (A3)
-
రోషన్ (A4)
-
-
నమోదైన సెక్షన్లు..కొత్త నేర చట్టం భారతీయ న్యాయ సంహిత (BNS 2023) ప్రకారం తీవ్రమైన సెక్షన్ల కింద కేసు ఫైల్ చేశారు..
-
Section 115(2): స్వచ్ఛందంగా గాయపరచడం (Voluntarily causing hurt)
-
Section 351(2): నేరపూరిత బెదిరింపులు (Criminal intimidation)
-
Section 352: శాంతిభద్రతలకు విఘాతం కలిగించేలా ఉద్దేశపూర్వకంగా అవమానించడం
-
Section 132: విధుల్లో ఉన్న ప్రభుత్వ ఉద్యోగిపై దాడి చేయడం లేదా బలాత్కారం ప్రయోగించడం (Assault to deter public servant from discharge of duty)
-
Section 3(5): ఉమ్మడి ఉద్దేశంతో నేరానికి పాల్పడటం (Joint liability)
-
కుప్పం ‘కడా’ పీడీ పాత్రపై తీవ్ర చర్చ..
ఆంధ్రప్రదేశ్ ముఖ్యమంత్రి ప్రాతినిధ్యం వహిస్తున్న అత్యంత కీలకమైన కుప్పం నియోజకవర్గ అభివృద్ధి బాధ్యతలను చూసే ‘కడా’ ప్రాజెక్ట్ డైరెక్టర్ స్థాయి అధికారి ఇలా బెంగళూరు పబ్‌లో మద్యం మత్తులో పోలీసులపైనే దాడికి దిగిన ఘటనలో ఏ1గా చేరడం తీవ్ర విమర్శలకు దారితీస్తోంది.
ప్రస్తుతం బెంగళూరు పోలీసులు పబ్‌లోని సీసీటీవీ ఫుటేజీలను స్వాధీనం చేసుకుని దర్యాప్తు చేస్తున్నారు. పోలీసు విధులకు ఆటంకం కలిగించిన నిందితులపై తదుపరి చట్టపరమైన అరెస్టు చర్యలు తీసుకునేందుకు కబ్బన్ పార్క్ పోలీసులు రంగం సిద్ధం చేస్తున్నారు.