AP News: ఏపీలో వరుస అగ్నిప్రమాదాలు.. సీఎం చంద్రబాబు తీవ్ర దిగ్భ్రాంతి.. అధికారులకు కీలక ఆదేశాలు!

రాజాంలో ఆటోమొబైల్ షోరూమ్ దగ్ధం:

విజయనగరం జిల్లా రాజాం పరిధిలోని పాలకొండ ప్రధాన రహదారిపై ఉన్న ప్రముఖ ఆటోమొబైల్ షోరూమ్‌లో సోమవారం భారీ అగ్నిప్రమాదం సంభవించింది. దీపావళి బాణసంచా కాలుస్తుండగా ప్రమాదవశాత్తు నిప్పురవ్వలు షోరూమ్‌పై పడటంతో ఒక్కసారిగా మంటలు వ్యాపించాయి.క్షణాల వ్యవధిలోనే మంటలు ఉవ్వెత్తున ఎగిసిపడటంతో షోరూమ్ పూర్తిగా దగ్ధమైంది.

లోపల ఉన్న వాహనాలు, పరికరాలు కాలిబూడిదవడంతో భారీ మొత్తంలో ఆస్తి నష్టం సంభవించింది. సమాచారం అందుకున్న అగ్నిమాపక సిబ్బంది ఘటనా స్థలానికి చేరుకుని శ్రమించి మంటలను అదుపులోకి తెచ్చారు.

తెనాలి, గన్నవరం, తిరువూరుల్లోనూ మంటల విలయం:

రాష్ట్రవ్యాప్తంగా మరికొన్ని ప్రాంతాల్లోనూ అగ్నికీలలు ఎగిసిపడ్డాయి:

• తెనాలి (గుంటూరు జిల్లా): గంగన్నమ్మపేటలోని ఓ ద్విచక్ర వాహనాల షోరూమ్‌లో ఆదివారం అర్ధరాత్రి అకస్మాత్తుగా మంటలు చెలరేగాయి. ఈ ఘటనలో అనేక మోటార్ సైకిళ్లు అగ్నికి ఆహుతి కాగా, సుమారు రూ.20 లక్షలకు పైగా నష్టం వాటిల్లినట్లు అంచనా వేశారు.

• గన్నవరం (కృష్ణా జిల్లా): టపాసుల నిప్పురవ్వలు పడటంతో ఒక ఫర్నిచర్ దుకాణంలో మంటలు అంటుకుని విలువైన ఫర్నిచర్ దగ్ధమైంది.

• తిరువూరు (ఎన్టీఆర్ జిల్లా): విద్యుత్ షార్ట్ సర్క్యూట్ సంభవించడంతో మరో దుకాణం పూర్తిగా కాలిబూడిదైంది.

సీఎం చంద్రబాబు ఆరా – అధికారులకు ఆదేశాలు..

రాజాం, గన్నవరం, తిరువూరు తదితర ప్రాంతాల్లో జరిగిన అగ్నిప్రమాదాలపై ముఖ్యమంత్రి చంద్రబాబు నాయుడు అధికారుల నుంచి సమగ్ర వివరాలు సేకరించారు. ప్రమాదాల్లో పెద్ద ఎత్తున ఆస్తి నష్టం వాటిల్లడంపై సీఎం విచారం వ్యక్తం చేశారు.బాధిత వ్యాపారులకు అండగా ఉండటంతో పాటు, ప్రమాద కారణాలపై స్పష్టమైన నివేదిక అందించాలని అగ్నిమాపక, పోలీస్ ఉన్నతాధికారులను ఆదేశించారు. పండుగల వేళ ఇలాంటి విషాదాలు జరగకుండా వాణిజ్య సముదాయాలు, నివాస ప్రాంతాల్లో ముందస్తు అగ్నిమాపక నివారణ చర్యలను పకడ్బందీగా అమలు చేయాలని స్పష్టం చేశారు.