Artificial Egg: సైన్స్ ఫిక్షన్ సినిమాల్లో మాత్రమే కనిపించే అద్భుతాలు ఇప్పుడు నిజజీవితంలో సాకారమవుతున్నాయి. తల్లి కోడి పొదగకుండా, సహజసిద్ధమైన గుడ్డు పెంకు లేకుండానే ప్రయోగశాలలో కృత్రిమ వాతావరణంలో కోడిపిల్లలను విజయవంతంగా పొదిగించి అమెరికాకు చెందిన ప్రముఖ బయోటెక్నాలజీ సంస్థ ‘కొలొసల్ బయోసైన్సెస్’ (Colossal Biosciences) సరికొత్త సంచలనం సృష్టించింది. అంతరించిపోయిన జీవులను మళ్లీ భూమిపైకి తీసుకురావడమే (De-extinction) లక్ష్యంగా పనిచేస్తున్న ఈ సంస్థ.. 3D ప్రింటింగ్ టెక్నాలజీతో రూపొందించిన కృత్రిమ గుడ్డు పెంకు (Artificial Eggshell) ద్వారా ఏకంగా 26 కోడిపిల్లలను సజీవంగా బయటకు తెచ్చినట్లు ప్రకటించింది.
ప్లాస్టిక్ కప్పులాంటి గూడు.. లోపల పెరుగుతున్న ప్రాణం!
చూడటానికి ఒక చిన్న ప్లాస్టిక్ కప్పులా, లాటిస్ (Lattice) నిర్మాణంలో కనిపించే ఈ కృత్రిమ వ్యవస్థలో కోడిపిల్లల అభివృద్ధిని శాస్త్రవేత్తలు విజయవంతంగా పూర్తి చేశారు.
-
ఫెర్టిలైజ్డ్ ఎంబ్రియో ట్రాన్స్‌ఫర్: సహజమైన గుడ్డు నుంచి ఫలదీకరణం చెందిన పిండాన్ని (Fertilized Egg) సేకరించి, దాన్ని 3D ప్రింటెడ్ కృత్రిమ పరికరంలోకి బదిలీ చేసి ఇంక్యుబేటర్‌లో ఉంచారు.
-
ఆక్సిజన్, క్యాల్షియం సరఫరా: సహజసిద్ధమైన గుడ్డు పెంకు ఎలాంటి ఆక్సిజన్‌ను లోపలికి అనుమతిస్తుందో, అదే రీతిలో గాలి ప్రసరించేలా ప్రత్యేక సిలికాన్ పొరను (Membrane) దీనికి అమర్చారు. అలాగే పెంకు నుంచి పిండం గ్రహించే క్యాల్షియం లోపించకుండా ప్రత్యేకంగా ద్రవ రూపంలో క్యాల్షియంను అందించారు.
-
రియల్-టైమ్ మానిటరింగ్: ఈ పారదర్శక కృత్రిమ పెంకు ద్వారా పిండం ఎదుగుదల, రక్తనాళాల నిర్మాణం, అవయవాల అభివృద్ధిని శాస్త్రవేత్తలు ఎప్పటికప్పుడు స్పష్టంగా పరిశీలించగలిగారు. కొద్ది రోజుల నుంచి కొన్ని నెలల వయసున్న 26 కోడిపిల్లలు ప్రస్తుతం పూర్తి ఆరోగ్యంగా ఉన్నట్లు సంస్థ వెల్లడించింది.
అసలు లక్ష్యం: 12 అడుగుల భారీ పక్షి ‘జెయింట్ మోవా’ పునరుజ్జీవం!
ఈ పరిశోధన కేవలం కోడిపిల్లల కోసమే కాదని, అంతరించిపోయిన న్యూజిలాండ్‌కు చెందిన 12 అడుగుల భారీ పక్షి ‘జెయింట్ మోవా’ (Giant Moa) ను తిరిగి సృష్టించడానికేనని కొలొసల్ సీఈవో బెన్ లామ్ (Ben Lamm) స్పష్టం చేశారు.
జెయింట్ మోవా పెట్టే గుడ్లు సాధారణ కోడిగుడ్డు కంటే దాదాపు 80 రెట్లు పెద్దవిగా ఉంటాయి. ప్రస్తుతం భూమిపై ఉన్న ఏ పక్షి కూడా అంత భారీ గుడ్లను మోయడం లేదా పొదగడం అసాధ్యం. అందుకే ప్రయోగశాలలోనే భారీ సైజు కృత్రిమ గుడ్లను తయారుచేసి, వాటి ద్వారా మోవా వంటి భారీ పక్షులను సరోగసి పద్ధతిలో పుట్టించాలని సంస్థ భావిస్తోంది.
గతంలోనే డోడో (Dodo) పక్షి, ఉన్ని మముత్ (Woolly Mammoth), టాస్మేనియన్ టైగర్ (Tasmanian Tiger)లను రీ-క్రియేట్ చేసే ప్రాజెక్టులను ప్రారంభించిన కొలొసల్.. ఈ కృత్రిమ గుడ్డు వ్యవస్థను వాటి పునరుజ్జీవనంలో కీలక ముందడుగుగా అభివర్ణించింది.
శాస్త్రవేత్తల పెదవి విరుపు.. సైన్స్ వర్గాల్లో భిన్నాభిప్రాయాలు..
ఈ ప్రయోగం సాంకేతికంగా ఆకట్టుకున్నప్పటికీ, స్వతంత్ర శాస్త్రవేత్తలు మరియు బయోఎథిసిస్టులు (Bioethicists) దీనిపై పలు సందేహాలు వ్యక్తం చేస్తున్నారు.
ఇది పూర్తి కృత్రిమ గుడ్డు కాదు: న్యూయార్క్‌లోని బఫెలో యూనివర్సిటీ ఎవల్యూషనరీ బయాలజిస్ట్ విన్సెంట్ లించ్ మాట్లాడుతూ.. “ఇందులో వారు తయారుచేసింది కేవలం కృత్రిమ పెంకు (Artificial Eggshell) మాత్రమే. పిండానికి పోషణ అందించేందుకు, వ్యర్థాలను తొలగించేందుకు అవసరమైన సహజ అంతర్గత భాగాలన్నింటినీ నేరుగా అసలు గుడ్డు నుంచే పోశారు. కాబట్టి ఇది సహజ గుడ్డుకు పూర్తి ప్రత్యామ్నాయం కాదు” అని స్పష్టం చేశారు. అలాగే జన్యుమార్పిడి పక్షులను తయారుచేయగలరేమో కానీ, అంతరించిపోయిన అసలైన మోవాను మళ్లీ తీసుకురాలేరని అభిప్రాయపడ్డారు.
కొత్త పద్ధతేమీ కాదు: ప్లాస్టిక్ ఫిల్మ్‌లు, సంచులను ఉపయోగించి ల్యాబ్‌లలో కోడిపిల్లలను పొదిగించడం గత కొద్ది దశాబ్దాలుగా పరిశోధనల్లో జరుగుతున్నదేనని షెఫీల్డ్ యూనివర్సిటీ పరిశోధకురాలు నికోలా హెమ్మింగ్స్ తెలిపారు.
పర్యావరణ సవాలు: ఒకవేళ అంతరించిపోయిన భారీ జీవులను సృష్టించినా.. వేల ఏళ్ల క్రితం ఉన్న పర్యావరణం ఇప్పుడు లేదు కాబట్టి, ప్రస్తుత వాతావరణంలో అవి ఎలా మనుగడ సాగిస్తాయన్నది నైతిక, పర్యావరణపరమైన అతిపెద్ద ప్రశ్నగా నిపుణులు గుర్తుచేస్తున్నారు.
అంతరించిపోతున్న పక్షులకు సంజీవని:
విమర్శలు ఉన్నప్పటికీ, ప్రస్తుతం అంతరించిపోయే ముప్పును ఎదుర్కొంటున్న (Endangered) అరుదైన పక్షి జాతులను రక్షించడానికి ఈ టెక్నాలజీ ఎంతగానో ఉపయోగపడుతుందని కొలొసల్ బయోసైన్సెస్ పేర్కొంది. బందిఖానాలో (Captivity) గుడ్లు పెట్టడానికి లేదా పొదగడానికి ఇష్టపడని అరుదైన పక్షుల పిండాలను కాపాడేందుకు, భవిష్యత్ తరాల కోసం జీవవైవిధ్యాన్ని భద్రపరిచేందుకు ఈ 3D ప్రింటెడ్ కృత్రిమ గూళ్లు సరికొత్త మార్గాన్ని చూపుతాయని ఆశాభావం వ్యక్తం చేసింది.