Anant Ambani: ఆంధ్రప్రదేశ్ ప్రగతి ప్రస్థానంలో, ముఖ్యంగా కరవు నేలగా పేరుపడ్డ రాయలసీమ ముఖచిత్రాన్ని మార్చే సరికొత్త చరిత్రకు అన్నమయ్య జిల్లా మదనపల్లె వేదికైంది. రాయలసీమ గ్లోబల్ హార్టికల్చర్ హబ్ (Global Horticulture Hub), ప్రతిష్ఠాత్మక ‘ఇండియన్ స్కూల్ ఆఫ్ అగ్రికల్చర్’ (ISA) ప్రాజెక్టులకు శుక్రవారం ఘనంగా శంకుస్థాపన జరిగింది.
ఈ కార్యక్రమంలో రిలయన్స్ ఇండస్ట్రీస్ ఎగ్జిక్యూటివ్ డైరెక్టర్ అనంత్ అంబానీ (Anant Ambani) ముఖ్య ఆకర్షణగా నిలిచారు. కేంద్ర ఆర్థిక మంత్రి నిర్మలా సీతారామన్, ఏపీ ముఖ్యమంత్రి నారా చంద్రబాబు నాయుడు, ఉప ముఖ్యమంత్రి పవన్ కల్యాణ్, ఐటీ & విద్యాశాఖ మంత్రి నారా లోకేశ్‌లతో కలిసి అనంత్ అంబానీ శిలాఫలకాన్ని ఆవిష్కరించారు. ఈ సందర్భంగా వేదికపై అనంత్ అంబానీ చేసిన ప్రసంగం సభికులను, రాష్ట్ర ప్రజలను విశేషంగా ఆకట్టుకుంది.
ఆంధ్ర భూమి.. సువర్ణ భూమి”: చంద్రబాబును ఆలింగనం చేసుకున్న అంబానీ..
తన ప్రసంగంలో అనంత్ అంబానీ తెలుగు నేలపై తనకున్న ప్రేమాభిమానాలను ఎంతో భావోద్వేగంగా పంచుకున్నారు..
నన్ను మీ బిడ్డగా చూడండి..
“ఆంధ్ర భూమి నిజంగా ఒక సువర్ణ భూమి. నన్ను ఆంధ్ర బిడ్డగా భావించండి. ఈ రాష్ట్ర అభివృద్ధి కోసం, రైతుల బాగు కోసం నేనేం చేయగలనో మీరే మార్గనిర్దేశం (గైడ్) చేయండి సీఎం గారూ” అంటూ చంద్రబాబును ఉద్దేశించి అనంత్ అంబానీ కోరారు.
రిలయన్స్‌పై నమ్మకానికి ధన్యవాదాలు..
దేశంలోనే వ్యవసాయ రంగాన్ని మలుపుతిప్పే ఇండియన్ స్కూల్ ఆఫ్ అగ్రికల్చర్ ప్రాజెక్టులో రిలయన్స్ సంస్థను భాగస్వామిని చేసినందుకు, తమపై నమ్మకం ఉంచినందుకు సీఎం చంద్రబాబుకు ప్రత్యేక కృతజ్ఞతలు తెలిపారు.
అనంత్ అంబానీ ప్రసంగం ముగియగానే సీఎం చంద్రబాబు నాయుడు ఆయన్ను ఆప్యాయంగా ఆలింగనం చేసుకున్నారు. పక్కనే ఉన్న కేంద్రమంత్రి నిర్మలా సీతారామన్, డిప్యూటీ సీఎం పవన్ కల్యాణ్, మంత్రి లోకేశ్ చప్పట్లతో అభినందిస్తూ అనంత్ ఆలోచనా విధానాన్ని ఎంతగానో కొనియాడారు.
ఇండియన్ స్కూల్ ఆఫ్ అగ్రికల్చర్‌పై ఏపీ సర్కార్ – రిలయన్స్ ఒప్పందం (MoU)..
రాయలసీమను ప్రపంచస్థాయి హార్టికల్చర్ హబ్‌గా మార్చే వ్యూహంలో భాగంగా ఈ కార్యక్రమం వేదికగా ఆంధ్రప్రదేశ్ ప్రభుత్వం, రిలయన్స్ ఇండస్ట్రీస్ మధ్య కీలక అవగాహన ఒప్పందం (MoU) కుదిరింది.
-
ఐఎస్ఏ (ISA) నిర్వహణ: హైదరాబాద్‌లోని ఇండియన్ స్కూల్ ఆఫ్ బిజినెస్ (ISB) తరహాలోనే అంతర్జాతీయ ప్రమాణాలతో ఏర్పాటయ్యే ఈ ‘ఇండియన్ స్కూల్ ఆఫ్ అగ్రికల్చర్’ నిర్వహణ, అభివృద్ధిలో రిలయన్స్ పూర్తి సహకారాన్ని అందిస్తుంది.
-
రైతులకు ప్రపంచస్థాయి టెక్నాలజీ: ఆధునిక వ్యవసాయ పద్ధతులు, సాగులో డ్రోన్ల వినియోగం, ఆర్టిఫిషియల్ ఇంటెలిజెన్స్, కోల్డ్ స్టోరేజ్ చైన్స్, పండ్ల ఎగుమతుల మార్కెటింగ్ వంటి అంశాల్లో రైతులకు, యువతకు అత్యుత్తమ శిక్షణ ఇవ్వనున్నారు.
-
సంపూర్ణ సహకారం: ఈ ప్రాజెక్టు విజయవంతానికి రిలయన్స్ ఎంతటి సహాయ సహకారాలైనా అందించడానికి సిద్ధంగా ఉందని అనంత్ అంబానీ స్వయంగా భరోసా ఇచ్చారు.
మోదీ నాయకత్వంలో ‘వికసిత్ భారత్’ వైపు అడుగులు..
ప్రధానమంత్రి నరేంద్ర మోదీ దార్శనిక పాలన గురించి కూడా అనంత్ అంబానీ మాట్లాడారు. మోదీ నాయకత్వంలో దేశంలోని ప్రతి ప్రాంతం కనీవినీ ఎరుగని అభివృద్ధిని చూస్తోందని చెప్పారు. కేంద్ర, రాష్ట్ర ప్రభుత్వాల కలయికతో ఆంధ్రప్రదేశ్ ‘సువర్ణ భూమి’గా రూపాంతరం చెందుతోందన్నారు.
ప్రధాని నిర్దేశించిన ‘వికసిత్ భారత్ 2047’ లక్ష్య సాధనలో ప్రతి ఒక్కరూ భాగస్వాములు కావాలని, వ్యవసాయ రంగంలో వచ్చే సరికొత్త ఆవిష్కరణలే భారత ఆర్థిక వ్యవస్థకు వెన్నెముకగా నిలుస్తాయని ఆయన వివరించారు.
రాయలసీమ పండ్ల తోటలకు అంతర్జాతీయ స్థాయి మార్కెటింగ్ కల్పించడంతో పాటు, రిలయన్స్ లాంటి దిగ్గజ సంస్థ నేరుగా ఇక్కడి రైతులతో చేతులు కలపడం సీమ వ్యవసాయ చరిత్రలోనే ఒక సువర్ణాధ్యాయంగా నిలవనుందని రాజకీయ, వ్యాపార విశ్లేషకులు భావిస్తున్నారు.