ACB: తెలంగాణలో సంచలనం సృష్టించిన ఫోన్ ట్యాపింగ్ కేసులో నిందితుడిగా ఉన్న మాజీ అదనపు ఎస్పీ భుజంగరావు మరో వివాదంలో చిక్కుకున్నారు. ఆదాయానికి మించిన ఆస్తులు కలిగి ఉన్నారనే ఆరోపణలతో అవినీతి నిరోధక శాఖ అధికారులు బుధవారం ఆయనను అధికారికంగా అరెస్టు చేశారు. భుజంగరావు ఇళ్లు, ఆఫీసులపై ఏసీబీ అధికారులు జరిపిన ఆకస్మిక సోదాల్లో భారీగా అక్రమ ఆస్తులు బయటపడటం పోలీసు వర్గాల్లో పెద్ద దుమారం రేపుతోంది.
ఈ సోదాల్లో భుజంగరావుకు సంబంధించిన రూ.5.92 కోట్ల విలువైన అక్రమ ఆస్తులను ఏసీబీ అధికారులు గుర్తించారు. ఇందులో ముఖ్యంగా సూర్యాపేట జిల్లాలో 27 ఎకరాలకు పైగా వ్యవసాయ భూమి ఉన్నట్లు తేలింది. వీటితో పాటు ఐదు ఓపెన్ ప్లాట్లు, రెండు విలాసవంతమైన ఇళ్లు, హైదరాబాద్ నగరంలో ఒక పెద్ద కమర్షియల్ బిల్డింగ్ ఉన్నట్లు అధికారులు డాక్యుమెంట్లు స్వాధీనం చేసుకున్నారు.
కిలో బంగారం.. లీగల్ ఆస్తుల కంటే ఎక్కువే!
భూములు, ఇళ్లే కాకుండా భుజంగరావు ఇంట్లో దాదాపు ఒక కిలో బరువున్న బంగారు నగలను ఏసీబీ అధికారులు కనుగొన్నారు. అలాగే ఆయన బ్యాంకు ఖాతాలను పరిశీలించగా.. అందులో రూ.3.83 లక్షల నగదు ఉన్నట్లు గుర్తించారు. ఆయనకు సంపాదన రూపంలో వచ్చే లీగల్ ఆదాయం కంటే ఈ ఆస్తుల విలువ చాలా రెట్లు ఎక్కువగా ఉందని అధికారులు ప్రాథమికంగా నిర్ధారించారు.
మద్యం సీసాల కలకలం:
ఏసీబీ అధికారులు భుజంగరావు ఇంట్లో తనిఖీలు చేస్తుండగా.. అనుమతి లేని 29 విదేశీ, దేశీ మద్యం సీసాలు కూడా లభించాయి. ఒక ప్రభుత్వ అధికారి ఇంట్లో ఇంత పెద్ద మొత్తంలో మద్యం నిల్వ ఉంచడం చట్టవిరుద్ధం కావడంతో, ఏసీబీ అధికారులు వెంటనే ఎక్సైజ్ శాఖ అధికారులకు సమాచారం అందించారు. దీంతో ఆయనపై ఎక్సైజ్ చట్టం కింద కూడా కేసు నమోదయ్యే అవకాశం ఉంది.
ఫోన్ ట్యాపింగ్ కేసులో ఇప్పటికే తీవ్ర ఆరోపణలు ఎదుర్కొంటున్న భుజంగరావు.. ఇప్పుడు ఏసీబీ అక్రమ ఆస్తుల కేసులో దొరికిపోవడంతో ఆయన చుట్టూ ఉచ్చు మరింత బిగుసుకున్నట్లయింది. ఈ ఆస్తుల వెనుక ఇంకా ఎవరెవరి హస్తం ఉందనే కోణంలో ఏసీబీ అధికారులు విచారణను వేగవంతం చేశారు.