AOT Trailer: ‘మహానటి’, ‘సీతారామం’, ‘లక్కీ భాస్కర్’ సినిమాలతో తెలుగు ప్రేక్షకులకు ఎంతో దగ్గరైన మలయాళ స్టార్ దుల్కర్ సల్మాన్ (Dulquer Salmaan) మరోసారి ఒక హృదయాన్ని హత్తుకునే కథతో మన ముందుకు రాబోతున్నారు. పవన్ సాధినేని దర్శకత్వంలో తెరకెక్కిన ‘ఆకాశంలో ఒక తార’ (Aakasamlo Oka Tara) థియేట్రికల్ ట్రైలర్ని మూవీ టీమ్ రిలీజ్ చేసింది. నిన్న హైదరాబాద్లో ఐకాన్ స్టార్ అల్లు అర్జున్ ముఖ్య అతిథిగా ప్రీ-రిలీజ్ ఈవెంట్ గ్రాండ్గా జరగగా, నేడు రిలీజ్ అయిన ట్రైలర్ సినిమాపై అంచనాలను అమాంతం పెంచేస్తోంది!
ట్రైలర్ ఎలా ఉందంటే? – కలలను నిజం చేసే ఒక అందమైన ప్రయాణం!
భారత మాజీ రాష్ట్రపతి డాక్టర్ ఏపీజే అబ్దుల్ కలాం స్ఫూర్తిదాయక మాటలతో ట్రైలర్ ప్రారంభమవుతుంది.
కల్పన (కొత్తమ్మాయి సాత్విక వీరవల్లి) అనే అమ్మాయికి వ్యోమగామి (Astronaut) కావాలని పెద్ద కల ఉంటుంది. అయితే చుట్టూ ఉన్న సమాజం ఆమె ఆశయాన్ని చూసి నవ్వుతుంటుంది. ఆ సమయంలో “పది మంది నవ్వితే ఏంటి.. ఒక్కరు నమ్మితే చాలదా కృష్ణగారు” అంటూ వచ్చే డైలాగ్ ట్రైలర్కే హైలైట్గా నిలిచింది. కల్పన కలను నమ్మి, ఆమెకు అండగా నిలిచే కృష్ణ పాత్రలో దుల్కర్ సల్మాన్ ఒదిగిపోయారు. ఆమె లక్ష్యం కోసం ఎంతదూరమైనా వెళ్లే వ్యక్తిగా కనిపిస్తున్నారు. ముఖ్యంగా కారు నడుపుతూ కళ్లలో నీళ్లతో దుల్కర్ కనిపించే షాట్ ఎమోషనల్గా కట్టిపడేస్తోంది.
ఒక మిషన్ ఫెయిల్ అవ్వడంతో ఒత్తిడిలో ఉన్న ఏరోస్పేస్ ఇంజినీర్ రోహిణి పాత్రలో శ్రుతి హాసన్ పవర్ఫుల్గా కనిపిస్తున్నారు. కొత్తమ్మాయి సాత్విక వీరవల్లి అమాయకత్వం, పట్టుదలతో కూడిన నటనతో ఆశ్చర్యపరిచింది. రుహాని శర్మ మరో కీలక పాత్రలో మెరిశారు.
రిచ్ విజువల్స్, జీవీ ప్రకాశ్ మ్యూజిక్ & నవంబర్ 20న రిలీజ్!
జీవీ ప్రకాశ్ కుమార్ అందించిన బ్యాక్గ్రౌండ్ స్కోర్ ప్రతి ఎమోషనల్ సీన్ను మరో స్థాయికి తీసుకెళ్లింది. సుజిత్ సారంగ్ సినిమాటోగ్రఫీ, శ్వేతా సాబు సిరిల్ ప్రొడక్షన్ డిజైన్ (రాకెట్ సెట్స్) సినిమాకు నిజాయితీని తీసుకొచ్చాయి. గీతా ఆర్ట్స్, స్వప్న సినిమా, లైట్బాక్స్ మీడియా వంటి ప్రతిష్ఠాత్మక బ్యానర్లపై సందీప్ గున్నం, రమ్య గున్నం ఈ సినిమాని నిర్మించారు. పాన్-ఇండియా స్థాయిలో నవంబర్ 20న ‘ఆకాశంలో ఒక తార’ థియేటర్లలో సందడి చేయనుంది.

