Cheruvayal Raman: విత్తనాల పరిరక్షకుడు.. ప్రకృతి వ్యవసాయ లెజెండ్ ‘చెరువయల్ రామన్’ ఇకలేరు

కేరళలోని వయనాడ్‌కు చెందిన ప్రముఖ గిరిజన రైతు, పద్మశ్రీ పురస్కార గ్రహీత చెరువయల్ రామన్ (74, Cheruvayal Raman) బుధవారం కన్నుమూశారు. గత కొంతకాలంగా వృద్ధాప్య సమస్యలు, తీవ్ర అనారోగ్యంతో బాధపడుతున్న ఆయన.. కోజికోడ్ మెడికల్ కాలేజీ ఆసుపత్రిలో చికిత్స పొందుతూ తుదిశ్వాస విడిచారని కుటుంబ సభ్యులు ప్రకటించారు.

భారతదేశంలో అంతరించిపోతున్న 45కి పైగా దేశీయ, సాంప్రదాయ వరి వంగడాలను ఒంటిచేత్తో సంరక్షించి, భావితరాలకు భద్రంగా అందించిన ఈ రియల్ హీరో మరణంతో దేశవ్యాప్తంగా విషాద ఛాయలు అలముకున్నాయి.

1952 జూన్ 6న వయనాడ్ జిల్లా మానంతవాడి సమీపంలోని తలక్కర చెర్రీలో జన్మించిన రామన్.. అక్కడి ‘కురిచ్య’ (Kurichya) అనే అటవీ గిరిజన తెగకు చెందినవారు. కమ్మనం నవోదయ పాఠశాలలో ప్రాథమిక విద్యను పూర్తి చేసిన వెంటనే.. కేవలం 10 ఏళ్ల పిన్న వయసులోనే వ్యవసాయంలోకి అడుగుపెట్టారు.

హైబ్రిడ్ విత్తనాలు, కెమికల్ ఫెర్టిలైజర్స్ మార్కెట్‌ను ముంచెత్తుతున్న సమయంలో రామన్ పూర్తిగా సాంప్రదాయ ఆర్గానిక్ పద్ధతులను ఫాలో అయ్యారు..

వరదలను తట్టుకునేవి, కరువులోనూ పండేవి, సువాసనలు వెదజల్లేవి, ఔషధ గుణాలున్న 45కి పైగా అరుదైన దేశీ వరి రకాలను తన పొలంలో సాగు చేసి వాటి విత్తనాలు అంతరించిపోకుండా కాపాడారు.

విత్తనాలను భద్రపరచడానికి ఆయన ఎలాంటి ఫ్రిజ్‌లు, ప్లాస్టిక్ కంటైనర్లు వాడలేదు. వెదురు బుట్టలు, గడ్డితో తయారు చేసిన ప్రత్యేక సాంప్రదాయ పాత్రలనే ఉపయోగించేవారు. ఆశ్చర్యకరమైన విషయం ఏంటంటే.. ఈ నేచురల్ పద్ధతి వల్ల విత్తనాలు దాదాపు రెండేళ్ల వరకు తమ మొలకెత్తే సామర్థ్యాన్ని (Germination power) ఏమాత్రం కోల్పోయేవి కావు.

తన దగ్గరికి విత్తనాల కోసం వచ్చే రైతులకు రామన్ ఉచితంగానే విత్తనాలు ఇచ్చేవారు. అయితే ఆయన ఒక స్ట్రిక్ట్ కండిషన్ పెట్టేవారు: “నాకు ఒక్క రూపాయి కూడా వద్దు.. మీరు ఈ విత్తనాలతో పంట పండించిన తర్వాత, నేను మీకు ఎంత ఇచ్చానో అంతే విత్తనాన్ని నాకు తిరిగి తెచ్చివ్వాలి” అనేవారు. తద్వారా ఆ విత్తన రకం నలుగురి చేతుల్లో బతికేలా చేసేవారు.

ఒక మారుమూల గ్రామంలో ఉన్నప్పటికీ రామన్ సేవలు ప్రపంచ స్థాయికి చేరాయి..2011లో హైదరాబాద్‌లో 11 దేశాల ప్రతినిధులతో జరిగిన అంతర్జాతీయ జీవవైవిధ్య సంరక్షణ సదస్సులో కేరళ రైతుల తరఫున రామన్ పాల్గొన్నారు. ఆయనకి 2016లో భారత ప్రభుత్వం నుంచి ‘నేషనల్ ప్లాంట్ జీనోమ్ సేవియర్ అవార్డు’ అందుకున్నారు.

పర్యావరణ హిత వ్యవసాయం, దేశీ వంగడాల రక్షణలో ఆయన చేసిన అసమాన సేవలను గుర్తించిన కేంద్ర ప్రభుత్వం.. 2023లో దేశ అత్యున్నత పౌర పురస్కారాల్లో ఒకటైన ‘పద్మశ్రీ’ తో గౌరవించింది.

చెరువయల్ రామన్ మృతి పట్ల దేశవ్యాప్తంగా ప్రముఖులు తీవ్ర సంతాపం వ్యక్తం చేశారు.. కాంగ్రెస్ అగ్రనేతలు రాహుల్ గాంధీ, వయనాడ్ ఎంపీ ప్రియాంక గాంధీ వాద్రా ఆయన మరణం పట్ల విచారం వ్యక్తం చేస్తూ.. ఆయన సమాజానికి చేసిన సేవలను కొనియాడారు.

కేరళ అసెంబ్లీ ప్రతిపక్ష నేత వి.డి. సతీశన్ స్పందిస్తూ.. “రామన్ కేవలం ఒక రైతు మాత్రమే కాదు.. వయనాడ్ కల్చరల్, అగ్రికల్చరల్ హెరిటేజ్‌కు ఆయన నిజమైన రక్షకుడు. ఆయన కాపాడిన విత్తన సంపదను, పర్యావరణ విధానాలను ఫ్యూచర్ జనరేషన్స్‌కి తీసుకెళ్లడమే మనం ఆయనకు ఇచ్చే నిజమైన నివాళి” అని పేర్కొన్నారు. మట్టిని నమ్ముకుని బతకడమే కాదు.. ఆ మట్టిలోని అమూల్యమైన జీవవైవిధ్యాన్ని కాపాడి అమరుడైన చెరువయల్ రామన్ ప్రస్థానం చిరస్మరణీయం.