New National Star: కన్నడ సినిమా ఇండస్ట్రీ నుంచి సాధారణ నటిగా ప్రయాణం మొదలుపెట్టిన రష్మిక మందన్నా, ఇప్పుడు భారతీయ సినీ చరిత్రలోనే అరుదైన మైలురాయిని అధిగమించింది. ఇండియా టుడే ప్రతిష్టాత్మకంగా నిర్వహించిన తాజా ‘మూడ్ ఆఫ్ ది నేషన్’ (Mood of the Nation) దేశవ్యాప్త ప్రజాదరణ సర్వేలో భారతదేశపు మోస్ట్ పాపులర్ హీరోయిన్గా అగ్రస్థానాన్ని కైవసం చేసుకుంది. సుదీర్ఘ కాలంగా మొదటి స్థానంలో కొనసాగుతున్న బాలీవుడ్ స్టార్ నటి దీపికా పదుకొణెను వెనక్కి నెట్టి రష్మిక నంబర్ 1 స్థానాన్ని దక్కించుకోవడం విశేషం. ఈ మార్పు కేవలం ఒక సర్వే ఫలితానికే పరిమితం కాకుండా, భారతీయ సినీ ప్రేక్షకుల ఆలోచనా విధానంలో వచ్చిన భారీ మార్పును స్పష్టం చేస్తోంది.
‘శ్రీవల్లి’ నుంచి ‘యానిమల్’ వరకు – అప్రతిహత విజయాలు..
‘పుష్ప: ది రైజ్’ సినిమాలో ‘శ్రీవల్లి’గా రష్మిక పలికించిన పల్లెటూరి హావభావాలు, అమాయకత్వం ఉత్తరాది ప్రేక్షకులను అమితంగా ఆకట్టుకున్నాయి. ఈ పాత్ర ఆమెను దేశవ్యాప్తంగా ప్రతి ఇంటికీ చేరువ చేసింది. రణబీర్ కపూర్ తో నటించిన ‘యానిమల్’ సినిమాతో హిందీ మార్కెట్లో ఆమె స్టార్డమ్ తారాస్థాయికి చేరింది. ఆపై ‘పుష్ప 2: ది రూల్’ భారీ విజయంతో భారతీయ బాక్సాఫీస్ రికార్డులను తిరగరాసింది. హిస్టారికల్ మూవీ ‘ఛావా’, ధనుష్తో ‘కుబేర’ వంటి వరుస ప్రాజెక్టులతో రష్మిక తన నటన పరిధిని విస్తరించుకుంది. కేవలం ఒకే పాత్రకో, ఒకే భాషకో పరిమితం కాకుండా కమర్షియల్ మాస్ ఎంటర్టైనర్ల నుంచి బలమైన కథాంశాల వరకు సమర్థవంతంగా మెప్పిస్తోంది.
స్టార్డమ్లో నయా ట్రెండ్ – ప్రాంతీయ సరిహద్దులు గల్లంతు..
ఇంతకుముందు జాతీయ స్థాయి స్టార్డమ్ అంటే కేవలం బాలీవుడ్ (హిందీ సినిమాల) ద్వారానే సాధ్యమనే భావన బలంగా ఉండేది. దీపికా పదుకొణె ఆ తరహా సాంప్రదాయ స్టార్డమ్కు ప్రతీకగా నిలిచారు.
అయితే రష్మిక మందన్నా ప్రస్థానం భారతీయ సినీ పరిశ్రమలో కొత్త ఒరవడిని ఆవిష్కరించింది. దక్షిణాదిలో మొదలై, బాలీవుడ్కు విస్తరించి, తనకంటూ అపారమైన అభిమాన గణాన్నీ వెంట నడిపించగల పాన్-ఇండియా స్టార్డమ్కు ఆమె ప్రత్యక్ష నిదర్శనంగా మారింది. భాషా సరిహద్దులు చెరిగిపోయి, దేశమంతా ఒకే సమగ్ర వేదికగా మారిన నవతరం భారతీయ సినిమాకు రష్మిక ఎదుగుదల నిలువెత్తు నిదర్శనం.