Harish Rao: తెలంగాణలో రిజిస్ట్రేషన్ల నిషేధిత జాబితా (సెక్షన్ 22A) అంశం తీవ్ర రాజకీయ దుమారం రేపుతోంది. రాష్ట్రంలో లక్షలాది ఎకరాల ప్రైవేటు భూములు, ప్లాట్లను అడ్డగోలుగా 22A కింద నిషేధిత జాబితాలో చేర్చి ప్రజల ఆస్తులను లాక్కునేందుకు కాంగ్రెస్ ప్రభుత్వం కుట్ర పన్నుతోందని మాజీ మంత్రి, బీఆర్ఎస్ డిప్యూటీ ఫ్లోర్ లీడర్ తన్నీరు హరీశ్రావు తీవ్రస్థాయిలో ధ్వజమెత్తారు.
తెలంగాణ భవన్లో 22A నిషేధిత భూముల బాధితులతో నిర్వహించిన సమావేశంలో మాట్లాడిన ఆయన.. బాధితుల తరఫున బీఆర్ఎస్ పార్టీ సంపూర్ణంగా అండగా నిలిచి పోరాడుతుందని స్పష్టం చేశారు.
30 ఏళ్లుగా లేని నిబంధనలు ఇప్పుడెందుకు? – బుద్వేల్లో 30 ఎకరాల కుట్ర
ప్రభుత్వ తీరుపై హరీశ్రావు సంచలన ఆరోపణలు చేశారు..
-
భూములు కొట్టేసేందుకే దురాలోచన: గత 30 ఏళ్లుగా ఎలాంటి వివాదాలు లేకుండా క్రయవిక్రయాలు జరుగుతున్న భూములపై ఇప్పుడు కొత్తగా ఆంక్షలు ఎందుకు పెట్టారని ఆయన ప్రశ్నించారు. హైదరాబాద్ చుట్టుపక్కల ప్రాంతాలు, ముఖ్యంగా రాజేంద్రనగర్ పరిధిలోని బుద్వేల్లో 30 ఎకరాల విలువైన భూములను కొట్టేసేందుకే ఈ 22A కుట్రలకు తెరలేపారని ఆరోపించారు.
-
రియల్ ఎస్టేట్ దందా: “ముఖ్యమంత్రి రేవంత్ రెడ్డి, మంత్రి పొంగులేటి శ్రీనివాస్ రెడ్డిలకు రియల్ ఎస్టేట్ వ్యాపారం బాగా తెలుసు కాబట్టే.. ఈ విధంగా భూములను నిషేధిత జాబితాలో పెట్టి ప్రజలను ఇబ్బందులకు గురిచేస్తున్నారు. మీకు 22A కింద పెట్టడం తెలిస్తే.. ప్రజల కోసం పోరాడి వాటిని జాబితా నుంచి ఎలా తొలగించాలో బీఆర్ఎస్కు బాగా తెలుసు” అని హరీశ్రావు హెచ్చరించారు.
-
పొంగులేటి మాట మార్చారు: పది రోజుల క్రితం ప్రైవేటు భూములేవీ 22A లో పెట్టలేదని చెప్పిన మంత్రి పొంగులేటి, ఇప్పుడు తప్పు జరిగిందని క్షమాపణలు చెబుతున్నారని విమర్శించారు. క్షమాపణ చెబితే సరిపోదని, బాధితుల ఇబ్బందులకు బాధ్యత వహిస్తూ మంత్రి రాజీనామా చేయాలని డిమాండ్ చేశారు.
సీఎం రేవంత్రెడ్డికి తెలియకుండానే ఇదంతా జరిగిందా?
ఈ వ్యవహారంలో ప్రభుత్వ పెద్దల ప్రమేయంపై హరీశ్రావు తీవ్ర విమర్శలు గుప్పించారు:
-
మంత్రి కోమటిరెడ్డి ప్రస్తావన: నాలుగు నెలల క్రితమే యాదాద్రి భువనగిరి జిల్లాలో 40 వేల ఎకరాలను 22A నిషేధిత జాబితాలో చేర్చారని, ఆ విషయాన్ని స్వయంగా సీఎం రేవంత్రెడ్డి దృష్టికి తీసుకెళ్లానని మంత్రి కోమటిరెడ్డి వెంకటరెడ్డి స్వయంగా చెప్పారని గుర్తుచేశారు. అంత జరిగినా సీఎం ఎందుకు మౌనంగా ఉన్నారని నిలదీశారు.
-
ప్రజల ఆస్తులకు బీఆర్ఎస్ రక్షణ: సామాన్య మధ్యతరగతి ప్రజలు జీవితకాల కష్టార్జితంతో కొనుక్కున్న ప్లాట్లను, ఇళ్లను రాత్రికి రాత్రే నిషేధిత జాబితాలో చేర్చడం దారుణమని, బాధితులందరికీ న్యాయం జరిగే వరకు న్యాయపోరాటం మరియు ప్రజాక్షేత్రంలో ఉద్యమాలు కొనసాగిస్తామని ప్రకటించారు.