Sewing Machine Scheme: రాష్ట్రంలోని వెనుకబడిన తరగతుల (బీసీ) మహిళలు ఆర్థికంగా నిలదొక్కుకుని, సొంత కాళ్లపై నిలబడేలా చేయడమే లక్ష్యంగా తెలంగాణ ప్రభుత్వం ఒక గొప్ప పథకానికి శ్రీకారం చుట్టింది. కుట్టు వృత్తి ద్వారా స్వయం ఉపాధి కల్పించేందుకు ‘ఇంటింటా ఇందిరమ్మ కుట్టు మిషన్లు’ పథకాన్ని ప్రభుత్వం అధికారికంగా ప్రారంభించింది.
ఈ పథకం ద్వారా అర్హులైన నిరుద్యోగ బీసీ మహిళలకు 100 శాతం సబ్సిడీతో (పూర్తిగా ఉచితంగా) ఆటోమేటిక్ కుట్టు మిషన్లను అందజేయనున్నారు. సచివాలయంలో బీసీ సంక్షేమ శాఖ మంత్రి పొన్నం ప్రభాకర్ ఈ స్కీమ్ను ప్రారంభించి, దరఖాస్తు ప్రక్రియ, మార్గదర్శకాలను వెల్లడించారు.
నియోజకవర్గానికి వెయ్యి మిషన్లు – 1.19 లక్షల మందికి లబ్ధి!
ప్రభుత్వం నిర్ణయించిన ప్రకారం ప్రతి నియోజకవర్గంలో పెద్ద సంఖ్యలో లబ్ధిదారులను ఎంపిక చేయనున్నారు..
-
మొత్తం మిషన్ల సంఖ్య: రాష్ట్రంలోని 119 శాసనసభ నియోజకవర్గాల్లో, ఒక్కో నియోజకవర్గానికి 1,000 చొప్పున మొత్తం 1.19 లక్షల ఆటోమేటిక్ కుట్టు మిషన్లను పంపిణీ చేయనున్నారు.
-
మిషన్ విలువ: ఒక్కో ఆటోమేటిక్ కుట్టు మిషన్ విలువ దాదాపు రూ. 12,000 వరకు ఉంటుంది. లబ్ధిదారులపై నయాపైసా భారం పడకుండా ప్రభుత్వం పూర్తిగా ఉచితంగానే అందిస్తుంది.
-
శిక్షణ: అవసరమైన మహిళలకు ఈ కుట్టు మిషన్ల నిర్వహణపై ప్రత్యేక శిక్షణ కూడా ఇవ్వనున్నారు.
అర్హతలు & నిబంధనలు:
ఈ పథకానికి దరఖాస్తు చేసుకునే మహిళలకు ప్రభుత్వం కొన్ని ప్రాథమిక నిబంధనలను నిర్దేశించింది:
-
దరఖాస్తుదారు ఖచ్చితంగా బీసీ నిరుద్యోగ మహిళ అయి ఉండాలి.
-
వయస్సు 18 నుంచి 55 సంవత్సరాల మధ్య ఉండాలి.
-
కుటుంబ వార్షిక ఆదాయం గ్రామీణ ప్రాంతాల్లో రూ. 1.50 లక్షలు, పట్టణ ప్రాంతాల్లో రూ. 2.00 లక్షలకు మించకూడదు.
-
ఒక కుటుంబానికి ఒకే కుట్టు మిషన్ యూనిట్ మాత్రమే మంజూరు చేస్తారు.
ఎవరికి మొదటి ప్రాధాన్యత?
లబ్ధిదారుల ఎంపికలో సమాజంలో అత్యంత ఆదరణ అవసరమైన వారికి తొలి ప్రాధాన్యత ఇవ్వనున్నారు:
-
నిరుపేదలు, వితంతువులు, ఒంటరి మహిళలు, అనాథలు, దివ్యాంగులు మరియు ఇప్పటికే కుట్టు పనిలో అనుభవం/నైపుణ్యం ఉన్నవారికి ఎంపికలో ఫస్ట్ ప్రియారిటీ ఉంటుంది.
-
ఎంపిక ప్రక్రియ అత్యంత పారదర్శకంగా జరగడానికి మండల స్థాయిలో ఎంపీడీవో/మున్సిపల్ కమిషనర్ కన్వీనర్గా ఉండే 7 గురు సభ్యుల కమిటీ, జిల్లా స్థాయిలో కలెక్టర్ ఛైర్మన్గా ఉండే 10 మంది అధికారుల కమిటీ అర్హులను ఖరారు చేస్తాయి.
ఆన్లైన్లో దరఖాస్తు చేసుకునే విధానం:
అర్హత కలిగిన మహిళలు సెప్టెంబర్ 15 వరకు ఆన్లైన్ ద్వారా దరఖాస్తు చేసుకోవచ్చు.
-
దరఖాస్తు పోర్టల్: తెలంగాణ ప్రభుత్వ అధికారిక పోర్టల్ అయిన TGOBMMS Portal ద్వారా మాత్రమే ఆన్లైన్లో దరఖాస్తు సమర్పించాలి.
-
అవసరమైన పత్రాలు: ఆధార్ కార్డు, రేషన్ కార్డు, కుల ధ్రువీకరణ పత్రం (Caste Certificate), ఆదాయ ధ్రువీకరణ పత్రం (Income Certificate), పాస్పోర్ట్ సైజ్ ఫోటో మరియు బ్యాంక్ పాస్బుక్ జిరాక్స్ కాపీలను సిద్ధం చేసుకుని పోర్టల్లో అప్లోడ్ చేయాల్సి ఉంటుంది.
ఈ పథకం ద్వారా వేలాది మంది పేద మహిళలకు ఇంటి వద్దే చేతినిండా పని దొరికి, వారి కుటుంబాలకు ఆర్థిక భరోసా దక్కుతుందని ప్రభుత్వం ఆశిస్తోంది.