Guinness World Record: సాధారణంగా చాలామంది మహిళలకు జుట్టు నడుము వరకు పెరిగితేనే నిర్వహించడం కష్టమైపోతుందని కత్తిరించేస్తుంటారు. కానీ, ఉత్తరాఖండ్కు చెందిన రేణు ధరియాల్ మాత్రం తన జుట్టును ఏకంగా తన ఎత్తు కంటే పొడవుగా.. ఏకంగా 8 అడుగుల 10 అంగుళాలు (271.50 సెంటీమీటర్లు) పెంచి ప్రపంచ రికార్డు సృష్టించారు.
ప్రస్తుతం జీవించి ఉన్న మహిళల్లో ప్రపంచంలోనే అత్యంత పొడవైన జుట్టు కలిగిన వ్యక్తిగా ఆమె పేరును ‘గిన్నిస్ వరల్డ్ రికార్డ్స్’ (Guinness World Records) అధికారికంగా నమోదు చేసింది.
ఉక్రెయిన్ రికార్డును తిరగరాసి..!
ఉత్తరాఖండ్లోని హల్ద్వానీకి చెందిన రేణు ధరియాల్ జుట్టును గిన్నిస్ ప్రతినిధులు కొలిచి ఈ రికార్డును ధ్రువీకరించారు. గతంలో ఉక్రెయిన్కు చెందిన అలియా నసిరోవా (8 అడుగుల 5 అంగుళాలు) పేరిట ఉన్న రికార్డును రేణు తిరగరాశారు.
విశేషమేమిటంటే.. ప్రపంచ చరిత్రలోనే అత్యంత పొడవైన వ్యక్తిగా రికార్డులకెక్కిన రాబర్ట్ వాడ్లో ఎత్తు (272 సెం.మీ.)కు, రేణు గారి జుట్టు పొడవుకు వ్యత్యాసం కేవలం ఒక్క సెంటీమీటర్ మాత్రమే!
పదేళ్ల ఓపిక.. కెమికల్స్ లేని సంరక్షణే సీక్రెట్!
2015 నుంచి జుట్టు కత్తిరించుకోవడాన్ని పూర్తిగా బంద్ చేసినట్లు రేణు తెలిపారు. భారతీయ సంస్కృతిలో పొడవాటి జుట్టును సౌందర్యానికి, సంప్రదాయానికి ప్రతీకగా భావిస్తారని.. అదే తనకు స్ఫూర్తిగా నిలిచిందని చెప్పారు.
-
నో బ్యూటీ ప్రొడక్ట్స్: ఈ సుదీర్ఘ ప్రయాణంలో ఆమె ఎలాంటి కెమికల్ ఉత్పత్తులు కానీ, ఖరీదైన పార్లర్ ట్రీట్మెంట్లు కానీ వాడలేదు.
-
ఇంటి వైద్యం: కేవలం ఇంట్లోనే తయారు చేసుకున్న సహజమైన హెయిర్ ఆయిల్స్, షాంపూలనే ఉపయోగిస్తున్నారు.
-
భారీ జడ: నిత్యం పనుల్లో ఇబ్బంది కాకుండా జుట్టును పెద్ద జడగా అల్లుకుని ఉంచుకుంటారు. జుట్టును కడగడం, ఆరబెట్టడం, చిక్కు తీయడానికి గంటల సమయం పడుతుందని, దీనికి విపరీతమైన ఓపిక కావాలని ఆమె పేర్కొన్నారు.
వృత్తిరీత్యా కంటెంట్ క్రియేటర్, యూట్యూబర్ అయిన రేణు.. తన జుట్టు సంరక్షణ చిట్కాలను సోషల్ మీడియా ద్వారా పంచుకుంటున్నారు. నెటిజన్లు కూడా ఆమె సాధించిన ఈ వినూత్న మైలురాయిపై ప్రశంసల జల్లు కురిపిస్తున్నారు.
