Ramayana Trailer: భారతీయ సినీ చరిత్రలోనే అత్యంత భారీ బడ్జెట్తో, మునుపెన్నడూ లేని విధంగా ప్రతిష్టాత్మకంగా తెరకెక్కుతున్న సినిమా ‘రామాయణ’ (Ramayana). బాలీవుడ్ స్టార్ హీరో రణ్బీర్ కపూర్ శ్రీరాముడిగా, సౌత్ స్టార్ హీరోయిన్ సాయి పల్లవి సీతాదేవిగా నటిస్తున్న ఈ సినిమాపై దేశవ్యాప్తంగా భారీ అంచనాలు ఉన్నాయి. ‘దంగల్’ సినిమా దర్శకుడు నితీశ్ తివారీ ఈ పౌరాణిక గాథను రెండు భాగాలుగా వెండితెరపైకి తీసుకువస్తున్నారు. తాజాగా ఈ చిత్రబృందం సినిమా ట్రైలర్ విడుదల తేదీని అధికారికంగా ప్రకటించి సినిమాపై అంచనాలను మరింత పెంచేసింది.
జులై 24న గ్లోబల్ ట్రైలర్ రిలీజ్:
ప్రపంచవ్యాప్తంగా ఉన్న సినిమా థియేటర్లలో ‘రామాయణ’ అఫీషియల్ ట్రైలర్ను జులై 24న విడుదల చేయనున్నట్లు శనివారం చిత్రబృందం సోషల్ మీడియా వేదికగా ప్రకటించింది. “వేల సంవత్సరాలుగా ధర్మం, మర్యాద, ధైర్యం, కరుణ అనే గొప్ప ఆదర్శాలతో ‘రామాయణం’ ఎన్నో తరాలకు స్ఫూర్తిగా నిలిచింది. మన నాగరికతకు అద్దం పట్టే ఈ మహా ఇతిహాసాన్ని భారతీయ సినీ ప్రపంచంలో మునుపెన్నడూ చూడని రేంజ్లో సరికొత్తగా ప్రపంచానికి పరిచయం చేయబోతున్నాం” అంటూ మేకర్స్ ఒక ప్రత్యేక నోట్ విడుదల చేశారు. ఈ సినిమాలో లంకాధిపతి రావణాసురుడిగా కన్నడ స్టార్ హీరో యాష్ (Yash) నటిస్తుండగా, హనుమంతుడిగా సన్నీ డియోల్, లక్ష్మణుడిగా రవి దూబే, శూర్పణఖగా రకుల్ ప్రీత్ సింగ్ నటిస్తున్నారు.
అంతర్జాతీయ వేదికపై ‘రామాయణ’ హడావుడి:
భారతీయ సినిమా గర్వించదగ్గ రీతిలో అమెరికాలో జరిగే ప్రసిద్ధ ‘సాన్ డియాగో కామిక్-కాన్ 2026’ (San Diego Comic-Con) అంతర్జాతీయ వేదికపై ఈ సినిమా సందడి చేయనుంది. జులై 23న (భారత కాలమానం ప్రకారం జులై 24 తెల్లవారుజామున) అక్కడ జరిగే ప్రత్యేక ప్యానల్ ప్రెజెంటేషన్లో డైరెక్టర్ నితీశ్ తివారీ, ప్రొడ్యూసర్ నమిత్ మల్హోత్రాతో పాటు హీరోలు రణ్బీర్ కపూర్, యాష్ పాల్గొని సినిమాకు సంబంధించిన ప్రత్యేక విశేషాలను పంచుకోనున్నారు. గతంలో రిలీజైన చిన్న గ్లింప్స్పై గ్రాఫిక్స్ (VFX) పరంగా కొన్ని విమర్శలు రావడంతో.. ఈసారి ట్రైలర్లో విజువల్స్ అద్భుతంగా ఉండేలా ప్లాన్ చేశారు.
స్కూల్ పిల్లల కోసం దేశవ్యాప్త ప్రచారం:
సినిమా విడుదలకు ముందే సరికొత్తగా దేశంలోని 18 నగరాల్లోని దాదాపు 400 స్కూళ్లలో “హమారా సత్య. హమారా ఇతిహాస్.” అనే పేరుతో చిత్రబృందం ఒక ప్రత్యేక ప్రచారాన్ని జులై 9న ప్రారంభించింది. దీని ద్వారా దాదాపు 5 లక్షల మంది విద్యార్థులకు రామాయణంలోని గొప్ప విలువలను డ్రాయింగ్ కాంపిటీషన్లు, క్విజ్ పోటీల ద్వారా పరిచయం చేయనున్నారు. నమిత్ మల్హోత్రా (ప్రైమ్ ఫోకస్ స్టూడియోస్), హీరో యాష్ (మాన్స్టర్ మైండ్ క్రియేషన్స్) సంయుక్తంగా నిర్మిస్తున్న ఈ చిత్రంలో.. మొదటి భాగం (Part 1) వచ్చే దీపావళికి (2026) – రెండవ భాగం (Part 2) దీపావళి 2027 లో ప్రేక్షకుల ముందుకు రానున్నాయి.