Kohli Superfood: భారత క్రికెట్ జట్టులో ఫిట్నెస్కు కేరాఫ్ అడ్రస్ ఎవరైనా ఉన్నారంటే అది ఖచ్చితంగా రన్ మెషిన్ విరాట్ కోహ్లీనే. కేవలం గ్రౌండ్లోనే కాదు, ఫిట్నెస్ విషయంలోనూ కోహ్లీకి సాటి ఎవరూ లేరు. అతడిని చూసే నేడు చాలా మంది యంగ్ క్రికెటర్లు ఫిట్నెస్ బాట పట్టారు. అయితే, ఈ రేంజ్ ఫిట్నెస్ వెనుక కోహ్లీ కఠినమైన ఆహార నియమాలు ఉన్నాయి. ఆయన తన రోజువారీ డైట్లో సలాడ్లు, సూప్లు ఇంకా ఎనర్జీ డ్రింక్స్కు ఎక్కువగా ప్రాధాన్యత ఇస్తారు.
కోహ్లీకి అత్యంత ఇష్టమైన హెల్తీ డిష్లలో ‘సూపర్ఫుడ్ సమ్మర్ సలాడ్’ (Superfood Summer Salad) ఒకటి. ఢిల్లీలోని ఆయన సొంత రెస్టారెంట్ ‘వన్8 కమ్యూన్’ (one8 Commune) మెనూలో కూడా ఈ సలాడ్కు ఫుల్ డిమాండ్ ఉంది. ఇది రుచితో పాటు ఎండకాలంలో శరీరానికి కావాల్సిన హైడ్రేషన్ (తేమ)ను అందిస్తుంది. మరి ఈ సెలబ్రిటీ స్పెషల్ సలాడ్ను ఇంట్లోనే ఎలా తయారు చేసుకోవాలో ఇప్పుడు చూద్దాం!
సలాడ్కు కావాల్సిన పదార్థాలు:
- రాకెట్ ఆకులు – 1 కప్పు
- పఫ్డ్ క్వినోవా (ఉడికించిన క్వినోవా) – 1/4 కప్పు
- వేయించిన క్యాప్సికమ్ ముక్కలు – 1/4 కప్పు
- తరిగిన పుచ్చకాయ ముక్కలు – 1 చిన్న గిన్నెడు
- గుమ్మడి గింజలు (Pumpkin Seeds) – 2 టేబుల్ స్పూన్లు
- జీడిపప్పు ముక్కలు – 2 టేబుల్ స్పూన్లు
సలాడ్ డ్రెస్సింగ్ కోసం:
- ఆలివ్ నూనె – 2 టేబుల్ స్పూన్లు
- వెనిగర్ – 1 టేబుల్ స్పూన్
- తేనె – 1 టేబుల్ స్పూన్
- మస్టర్డ్ సాస్ – 1 టేబుల్ స్పూన్
- చిల్లీ సాస్ – 1/4 టేబుల్ స్పూన్
- ఉప్పు – రుచికి సరిపడా
తయారుచేసే విధానం:
- స్టెప్ 1: ముందుగా క్యాప్సికమ్ను కాస్త వేయించి, చిన్న చిన్న ముక్కలుగా కోసి పక్కన పెట్టుకోండి.
- స్టెప్ 2: ఇప్పుడు ఒక పెద్ద గిన్నె (Bowl) తీసుకుని అందులో రాకెట్ ఆకులు, ఉడికించిన క్వినోవా, వేయించిన క్యాప్సికమ్ ముక్కలు ఇంకా పుచ్చకాయ ముక్కలను వేసి బాగా కలపండి.
- స్టెప్ 3 (డ్రెస్సింగ్): ఒక చిన్న గిన్నెలో పైన పేర్కొన్న డ్రెస్సింగ్ పదార్థాలన్నింటినీ (ఆలివ్ నూనె, వెనిగర్, తేనె, మస్టర్డ్ సాస్, చిల్లీ సాస్, ఉప్పు) వేసి బాగా మిక్స్ చేయండి.
- స్టెప్ 4: ఈ తయారు చేసుకున్న డ్రెస్సింగ్ మిశ్రమాన్ని గిన్నెలోని సలాడ్ ముక్కలపై పోసి, అన్ని పదార్థాలకు పట్టేలా బాగా కలపాలి.
- స్టెప్ 5: చివరగా పైనుంచి గుమ్మడి గింజలు, నలిపిన జీడిపప్పు ముక్కలను గార్నిష్గా చల్లుకుంటే.. కింగ్ కోహ్లీ స్టైల్ ‘సూపర్ఫుడ్ సమ్మర్ సలాడ్’ రెడీ!
ఈ సలాడ్లోని స్పెషల్ ఇంగ్రిడియంట్ ‘క్వినోవా’.. దీనివల్ల ఉపయోగాలు ఏంటో తెలుసా?
ఈ సలాడ్లో వాడే క్వినోవా (Quinoa) నిజానికి ఒక విత్తనమే అయినప్పటికీ, దీనిని ధాన్యంలాగా తింటారు. దీనికున్న అద్భుతమైన పోషక విలువల కారణంగానే దీనిని ‘సూపర్ఫుడ్’ అని పిలుస్తారు. దీని ప్రయోజనాలు ఇవే:
- కంప్లీట్ ప్రోటీన్: శరీరానికి అవసరమైన 9 రకాల ముఖ్యమైన అమైనో ఆమ్లాలు (Amino Acids) ఇందులో ఉంటాయి. కాబట్టి శాకాహారులు (Vegetarians), వీగన్లకు ఇది బెస్ట్ ప్రోటీన్ సోర్స్.
- గ్లూటెన్ ఫ్రీ (Gluten-Free): క్వినోవాలో గ్లూటెన్ ఉండదు. అందువల్ల గ్లూటెన్ పడనopen (సెలియాక్ వ్యాధి) ఉన్నవారికి ఇది గోధుమలకు సరైన ప్రత్యామ్నాయం.
- మెటబాలిజం బూస్టర్: ఇందులో ఉండే విటమిన్ బి శరీరంలో శక్తి ఉత్పత్తిని పెంచి, జీవక్రియను (Metabolism) మెరుగుపరుస్తుంది.
- ఖనిజాల నిధి: క్వినోవాలో ఫైబర్ (పీచుపదార్థం), యాంటీఆక్సిడెంట్లతో పాటు మెగ్నీషియం, ఇనుము (Iron), పొటాషియం, ఫాస్ఫరస్ మరియు జింక్ వంటి ముఖ్యమైన ఖనిజాలు పుష్కలంగా దొరుకుతాయి.