Kishan Reddy: తెలంగాణలో కాంగ్రెస్, బీజేపీల మధ్య పొలిటికల్ వార్ మరోసారి తారాస్థాయికి చేరింది. ముఖ్యమంత్రి రేవంత్ రెడ్డి తనను ఉద్దేశించి చేసిన వ్యాఖ్యలపై కేంద్ర బొగ్గు, గనుల శాఖ మంత్రి జి. కిషన్ రెడ్డి ఆదివారం నాడు మీడియా సమావేశంలో అత్యంత ఘాటుగా స్పందించారు. తనను పొలిమేర దాటనివ్వనంటూ సీఎం రేవంత్ రెడ్డి చేస్తున్న హెచ్చరికలను తీవ్రంగా ఖండిస్తూ, రేవంత్ రెడ్డిలో రాజకీయ నిరాశ, నిస్పృహలు స్పష్టంగా కనిపిస్తున్నాయని విమర్శించారు.
నేను పది పార్టీలు మారలేదు!
ముఖ్యమంత్రి రేవంత్ రెడ్డి రాజకీయ నేపథ్యాన్ని పరోక్షంగా ప్రస్తావిస్తూ కిషన్ రెడ్డి సంచలన వ్యాఖ్యలు చేశారు. “నన్ను పొలిమేర దాటనివ్వనని రేవంత్ రెడ్డి అంటున్నారు. కానీ గుర్తుంచుకోండి.. నన్ను ఆపేవారు ఈ గడ్డపై ఇంకా పుట్టలేదు. నేను రేవంత్ రెడ్డి లాగా కెరీర్లో పది పార్టీలు మారలేదు. నా రాజకీయం ఎప్పుడూ ఒకే సిద్ధాంతంపై సాగింది. నేను పుట్టింది బీజేపీలోనే.. నా తుది శ్వాస విడిచేది (చచ్చేది) కూడా బీజేపీలోనే” అని కిషన్ రెడ్డి స్పష్టం చేశారు.
తాటాకు చప్పుళ్లకు భయపడటానికి నేను కేసీఆర్ని కాదు
ముఖ్యమంత్రి రేవంత్ రెడ్డి హెచ్చరికలను కిషన్ రెడ్డి పూర్తిగా కొట్టిపారేశారు. రేవంత్ రెడ్డి చేసే ఇలాంటి తాటాకు చప్పుళ్లకు, బెదిరింపులకు భయపడటానికి నేనేమీ కేసీఆర్ని కాదు. రేవంత్ రెడ్డి మాటలు కోటలు దాటుతున్నాయి కానీ.. ఆయన చేసే చేతలు మాత్రం సెక్రటేరియట్ (సచివాలయం) కూడా దాటడం లేదు. నేను ఏంటో, తెలంగాణకు నేనేం చేశానో ఈ రాష్ట్ర ప్రజలకు బాగా తెలుసు. దీనికి రేవంత్ రెడ్డి సర్టిఫికేట్ ఇవ్వాల్సిన అవసరం నాకు లేదు అని కిషన్ రెడ్డి అన్నారు.
రైతు రుణమాఫీ, బోనస్పై ఘాటు విమర్శలు!
సీఎం రేవంత్ రెడ్డి రైతులను దారుణంగా మోసం చేశారని కిషన్ రెడ్డి ఆరోపించారు:
-
అరకొర రుణమాఫీ: రాష్ట్రంలో రైతు రుణమాఫీని కాంగ్రెస్ ప్రభుత్వం కేవలం అరకొరగానే చేసిందని మండిపడ్డారు.
-
బోనస్, కూలీల పైసలు గోవిందా: వడ్లకు ఇస్తానన్న బోనస్ డబ్బులు రైతులకు ఇంకా ఇవ్వలేదని, అలాగే రైతు కూలీలకు, కౌలు రైతులకు ఇస్తామన్న సాయం ఊసే లేదని ధ్వజమెత్తారు.
-
అప్పులతోనే పబ్బం: ప్రజలకు ఇచ్చిన ఎన్నికల హామీలను అమలు చేయకుండా.. కేంద్ర ప్రభుత్వం, ఇతర ఆర్థిక సంస్థలు ఇచ్చే రుణాలతోనే రేవంత్ ప్రభుత్వం పబ్బం గడుపుతోందని విమర్శించారు. కాంగ్రెస్, బీఆర్ఎస్ లు కేవలం మాటల పార్టీలే తప్ప చేతల పార్టీలు కావన్నారు.
కలలో కూడా రాహుల్ గాంధీ ప్రధాని కాలేరు
కాంగ్రెస్ జాతీయ నాయకత్వంపై కిషన్ రెడ్డి తీవ్రస్థాయిలో విమర్శలు గుప్పించారు. కాంగ్రెస్ అగ్రనేత రాహుల్ గాంధీ ఈ జన్మలో, కలలో కూడా ఈ దేశానికి ప్రధానమంత్రి కాబోరని ఆయన జోస్యం చెప్పారు. త్వరలోనే కాంగ్రెస్ పార్టీని ప్రజలు అడ్రస్ లేకుండా చేయడం ఖాయమన్నారు.
రేవంత్ సర్కారుకు అసలు ముసళ్ల పండుగ ముందుంది. రేవంత్ రెడ్డి తొందరపడొద్దు.. ఎవరెంత రెచ్చగొట్టినా నేను రెచ్చిపోయే వ్యక్తిని కాను. మేము ఏం చేసినా సంయమనంతో చేస్తాం. అన్ని రాష్ట్రాలు అభివృద్ధి కావాలన్నదే మా ఆశయం అని కిషన్ రెడ్డి పేర్కొన్నారు.