mAadhaar: భవిష్యత్తులో స్మార్ట్ఫోన్లలో ఆధార్ సేవలు పనిచేసే విధానంలో కేంద్ర ప్రభుత్వం ఒక పెద్ద మార్పును తీసుకువచ్చింది. ఇప్పటివరకు అందుబాటులో ఉన్న పాత ‘ఎమ్-ఆధార్’ (mAadhaar) యాప్ సేవలను త్వరలోనే పూర్తిగా నిలిపివేయబోతున్నట్లు అధికారికంగా ప్రకటించింది. దేశవ్యాప్తంగా ఉన్న కోట్లాది మంది వినియోగదారుల వ్యక్తిగత డేటాకు మరింత కట్టుదిట్టమైన భద్రతను, మెరుగైన నియంత్రణను ఇంకా సరికొత్త డిజిటల్ వెరిఫికేషన్ సిస్టమ్ను అందుబాటులోకి తీసుకురావడమే లక్ష్యంగా ‘యూనిక్ ఐడెంటిఫికేషన్ అథారిటీ ఆఫ్ ఇండియా’ (UIDAI) ఈ నిర్ణయం తీసుకుంది.
సాంఘిక మాధ్యమం ‘ఎక్స్’ (ట్విట్టర్) వేదికగా ఆధార్ అధికారిక ఖాతా ఈ మార్పును ధృవీకరిస్తూ.. వినియోగదారులందరూ వెంటనే కొత్తగా అప్గ్రేడ్ చేసిన ‘ఆధార్’ (Aadhaar) యాప్ను డౌన్లోడ్ చేసుకోవాలని కోరింది.
కొత్త యాప్ ఎందుకు? పాత దానికి.. దీనికి తేడా ఏంటి?
కొత్తగా తీసుకొచ్చిన యాప్ కేవలం పాత ఎమ్-ఆధార్ ప్లాట్ఫామ్కు రంగులు, డిజైన్ మార్చిన రూపం మాత్రమే కాదు. ఇది దైనందిన జీవితంలో ఆధార్ వెరిఫికేషన్ ఇంకా మీ ఐడెంటిటీని ఇతరులతో షేర్ చేసే విధానాన్నే పూర్తిగా మార్చేస్తుంది.
గతంలో పాత యాప్లో అథెంటికేషన్ (ధృవీకరణ) జరిగే సమయంలో పూర్తి ఆధార్ వివరాలు స్క్రీన్పై కనిపించేవి. కానీ, ఈ కొత్త ప్లాట్ఫామ్ డిజైన్ ప్రకారం.. వినియోగదారుడి అనుమతితో అవసరమైన సమాచారాన్ని మాత్రమే షేర్ చేయడం (Selective Sharing) మరియు సమాచారాన్ని పొందే ముందు మరింత బలమైన గుర్తింపు తనిఖీలు చేయడంపై దృష్టి పెడుతుంది.
కొత్త యాప్లో మైండ్ బ్లోయింగ్ ఫీచర్స్ ఇవే:
సురక్షితమైన క్యూఆర్ (QR) షేరింగ్: హోటళ్లు, ఆసుపత్రులు, థియేటర్లు, ప్రభుత్వ కార్యాలయాలు, ఇతర సర్వీస్ కౌంటర్లలో ఇన్-పర్సన్ (ప్రత్యక్ష) వెరిఫికేషన్ను ఈ ఫీచర్ మునుపెన్నడూ లేనంత సులభతరం చేస్తుంది. మీ పూర్తి ఆధార్ వివరాలను ఇతరులకు చూపించాల్సిన అవసరం లేకుండా, కేవలం క్యూఆర్ వెరిఫికేషన్ ద్వారా అవసరమైన సమాచారాన్ని మాత్రమే సురక్షితంగా షేర్ చేయవచ్చు.
ఫేస్ అథెంటికేషన్ (ముఖ గుర్తింపు) అప్గ్రేడ్: ఇంతకుముందు ఆధార్ యాక్సెస్ అనేది ప్రధానంగా మొబైల్ నంబరుకు వచ్చే ఎస్ఎమ్ఎస్ ఓటీపీ (OTP) వెరిఫికేషన్పైనే ఆధారపడి ఉండేది. కానీ కొత్త సిస్టమ్లో భద్రతను మరింత పెంచారు. వినియోగదారులు పొందే సేవల తీవ్రతను బట్టి, ఇకపై ఓటీపీలతో పాటు ఫేస్ అథెంటికేషన్ మరియు క్యూఆర్ వెరిఫికేషన్ కూడా లేయర్లుగా యాడ్ అవుతాయి. దీనివల్ల మీ డిజిటల్ ఐడెంటిటీని ఇతరులు దుర్వినియోగం చేసే ఛాన్స్ అస్సలు ఉండదు.
బయోమెట్రిక్ లాక్/అన్లాక్ కంట్రోల్: మీ వ్యక్తిగత బయోమెట్రిక్ సమాచారంపై ఈ యాప్ మీకు పూర్తి నియంత్రణను ఇస్తుంది. వినియోగదారులు వారి వేలిముద్రలు (Fingerprint), ముఖం (Face) మరియు ఐరిస్ (Iris) అథెంటికేషన్ డేటాను నేరుగా ఈ యాప్ ద్వారానే లాక్ లేదా మేనేజ్ చేసుకోవచ్చు. పబ్లిక్ డివైజ్లలో లేదా ఇతరుల ఫోన్లలో మీ ఆధార్ను ఉపయోగించినప్పుడు.. అనధికారికంగా ఎవరూ మీ బయోమెట్రిక్స్ యాక్సెస్ చేయలేరు.
కొత్త ఆధార్ యాప్ను ఎలా సెటప్ చేయాలి?
పాత యాప్తో పోలిస్తే కొత్త ఆధార్ యాప్ను సెటప్ చేసే విధానం కొంచెం వివరంగా, మల్టీ-స్టెప్ ప్రాసెస్ లా ఉంటుంది.
-
డౌన్లోడ్: మొదట గూగుల్ ప్లే స్టోర్ లేదా యాపిల్ యాప్ స్టోర్ వంటి అధికారిక స్టోర్ల నుండి వెరిఫైడ్ “Aadhaar” యాప్ను డౌన్లోడ్ చేసుకోవాలి.
-
భాష & ఓటీపీ: మీకు నచ్చిన భాషను ఎంచుకున్న తర్వాత, మీ ఆధార్ కార్డ్కు లింక్ చేయబడిన మొబైల్ నంబరును నమోదు చేసి ఓటీపీ (OTP) వెరిఫికేషన్ పూర్తి చేయాలి.
-
ఫేస్ అథెంటికేషన్ & పిన్: సెటప్ ప్రాసెస్లో భాగంగా కొంతమంది వినియోగదారులను ఫేస్ అథెంటికేషన్ అడగవచ్చు. అది పూర్తయిన తర్వాత యాప్ భద్రత కోసం ఒక పిన్ (PIN) క్రియేట్ చేసుకోవాలి లేదా బయోమెట్రిక్ అన్లాక్ ఎనేబుల్ చేసుకోవాలి.
-
ఫైనల్ లింక్: చివరగా మీ ఆధార్ నంబరును ఎంటర్ చేసి, మరోసారి వచ్చే ఓటీపీ వెరిఫికేషన్ పూర్తి చేస్తే మీ అకౌంట్ సెటప్ అయిపోతుంది.
ఆధార్ డాక్యుమెంట్ ఉచిత అప్డేట్ గడువు పొడిగింపు!
కొత్త యాప్ లాంచ్తో పాటు వినియోగదారులకు UIDAI మరో తియ్యటి కబురు చెప్పింది. ‘మై ఆధార్’ (myAadhaar) పోర్టల్లో ఉచితంగా ఆన్లైన్ ఆధార్ డాక్యుమెంట్లు (గుర్తింపు మరియు చిరునామా పత్రాలు) అప్డేట్ చేసుకునే సదుపాయాన్ని మరింత కాలం పొడిగించింది.
గతంలో ఈ ఉచిత సదుపాయం జూన్ 15, 2026 వరకు మాత్రమే అందుబాటులో ఉంటుందని ప్రకటించగా.. తాజాగా జారీ చేసిన అధికారిక మెమోరాండం ప్రకారం వినియోగదారులు ఎటువంటి రుసుము లేకుండా జూన్ 14, 2027 వరకు తమ పత్రాలను ఉచితంగా అప్డేట్ మరియు వెరిఫై చేసుకోవచ్చని స్పష్టం చేసింది.