Donald Trump: అంతర్జాతీయ దౌత్య రంగంలో భారత్-అమెరికా బంధం మునుపెన్నడూ లేనంత గరిష్ట స్థాయికి చేరుకుంది. న్యూఢిల్లీలోని అమెరికా రాయబార కార్యాలయం (యూఎస్ ఎంబసీ) లో అత్యంత వైభవంగా నిర్వహించిన 250వ అమెరికా స్వాతంత్ర్య దినోత్సవ వేడుకల్లో యూఎస్ ప్రెసిడెంట్ డొనాల్డ్ ట్రంప్ వాషింగ్టన్ నుండి వర్చువల్గా పాల్గొన్నారు. ఈ సందర్భంగా భారతదేశానికి, ప్రధాన మంత్రి నరేంద్ర మోదీకి ఆయన అత్యంత ఆత్మీయ సందేశాన్ని పంపారు. ఏదైనా అవసరం వస్తే భారత్ తనను “100 శాతం” నమ్ముకోవచ్చని, తానున్నాననే బలమైన భరోసాను ఇచ్చారు.
వాణిజ్యం, రక్షణ రంగాలతో పాటు ఇండో-పసిఫిక్ రీజియన్లో వ్యూహాత్మక ‘క్వాడ్’ (Quad) భాగస్వామ్యం బలోపేతమవుతున్న తరుణంలో ట్రంప్ చేసిన ఈ వ్యాఖ్యలు అంతర్జాతీయంగా ప్రాధాన్యత సంతరించుకున్నాయి.
పీఎం మోదీకి నేను పెద్ద అభిమానిని: డొనాల్డ్ ట్రంప్
లైవ్ ఇంటరాక్షన్లో డొనాల్డ్ ట్రంప్ భారతదేశంపై, పీఎం మోదీపై తనకు ఉన్న అపారమైన ప్రేమాభిమానాలను చాటుకున్నారు.
లైవ్ వేడుకలో ట్రంప్ ఏమన్నారంటే: “నాకు భారతదేశం అంటే ఎంతో ఇష్టం. అక్కడ ఉన్న వారందరికీ నా తరఫున హలో చెప్పండి. నాకు భారత ప్రధాన మంత్రి అంటే చాలా ఇష్టం. పీఎం మోదీ ఎంతో గొప్ప వ్యక్తి, ఆయన నా మంచి మిత్రుడు. భారతదేశం నాపై 100 శాతం నమ్మకం ఉంచవచ్చు, వారు ఎప్పుడైనా నేరుగా ఇక్కడికే కాల్ చేయవచ్చు. ప్రస్తుతం అమెరికాలో మా ఆర్థిక వ్యవస్థ, స్టాక్ మార్కెట్ రికార్డు స్థాయిలో దూసుకుపోతున్నాయి; భారతదేశం ఏది కోరుకున్నా ఇక్కడ లభిస్తుంది. నేను ప్రధాన మంత్రి మోదీకి చాలా పెద్ద, బిగ్ ఫ్యాన్ని.”
ఉమ్మడి విజయాల సరికొత్త శకం..
భారతదేశంలో అమెరికా రాయబారి (యూఎస్ అంబాసిడర్) సెర్గియో గోర్ మాట్లాడుతూ.. ట్రంప్ మరియు పీఎం మోదీల మధ్య ఉన్న అద్భుతమైన వ్యక్తిగత సాన్నిహిత్యాన్ని (Chemistry) గుర్తుచేశారు. “నేను ప్రెసిడెంట్ ట్రంప్తో మాట్లాడిన ప్రతిసారీ.. ఆయన అడిగే మొదటి ప్రశ్నలలో ఒకటి, ‘నా స్నేహితుడు, ప్రధాన మంత్రి మోదీ ఎలా ఉన్నారు?’ అని. ఈ బంధం ఈరోజు కొత్తగా ఏర్పడింది కాదు” అని గోర్ స్పష్టం చేశారు. పెరుగుతున్న పెట్టుబడులు, వ్యూహాత్మక సహకారం కారణంగా భారత్-అమెరికా భాగస్వామ్యం ప్రస్తుతం “ఉమ్మడి విజయాల సరికొత్త శకం” లోకి ప్రవేశించిందని ఆయన అభివర్ణించారు.
ట్రంప్ ప్రసంగించిన ఈ ప్రత్యేక దౌత్య వేడుకలో భారత విదేశాంగ శాఖ మంత్రి ఎస్. జైశంకర్ కూడా పాల్గొనడం విశేషం.
విదేశాంగ మంత్రి మార్కో రూబియోపై ప్రశంసలు.. చైనాకు చెక్!
ప్రస్తుతం దిల్లీలో జరుగుతున్న క్వాడ్ విదేశాంగ మంత్రుల సమావేశం కోసం భారతదేశంలో పర్యతిస్తున్న అమెరికా విదేశాంగ మంత్రి (యూఎస్ సెక్రటరీ ఆఫ్ స్టేట్) మార్కో రూబియోను కూడా ట్రంప్ ఈ సందర్భంగా కొనియాడారు. “మార్కో అత్యంత గొప్ప వ్యక్తి. మన దేశ చరిత్రలోనే అత్యుత్తమ విదేశాంగ మంత్రిగా ఆయన నిలిచిపోతారు” అని ట్రంప్ ప్రశంసించారు.
అమెరికా, భారత్, జపాన్ మరియు ఆస్ట్రేలియాలు సభ్యదేశాలుగా ఉన్న ‘క్వాడ్’ కూటమి సమావేశానికి భారత్ ఆతిథ్యమివ్వడం అత్యంత కీలకమైన దౌత్య అడుగు. ప్రాంతీయంగా చైనా ఆధిపత్య ధోరణి మరియు ప్రభావం పెరుగుతున్న నేపథ్యంలో.. ఇండో-పసిఫిక్ భద్రత, సముద్ర తీర రక్షణ మరియు సప్లై చైన్ బలోపేతంపై ఈ క్వాడ్ వేదిక ప్రధానంగా దృష్టి సారించింది.
కొద్దివారాల్లోనే ‘భారత్-యూఎస్’ చారిత్రాత్మక వాణిజ్య ఒప్పందం!
చాలా కాలంగా పెండింగ్లో ఉన్న భారత్-అమెరికా తాత్కాలిక వాణిజ్య ఒప్పందం (Interim Trade Deal) పై ఈ వేడుకలో అత్యంత సానుకూలమైన అప్డేట్ వచ్చింది. ఈ డీల్కు సంబంధించిన ముసాయిదా ఇప్పటికే సిద్ధమైందని, రాబోయే కొన్ని వారాల్లోనే ఇరు దేశాలు దీనిపై సంతకాలు చేయబోతున్నాయని అంబాసిడర్ సెర్గియో గోర్ వెల్లడించారు.
అంతకుముందు ఇచ్చిన ఒక ఇంటర్వ్యూలో అమెరికా విదేశాంగ మంత్రి మార్కో రూబియో కూడా ఇదే విషయాన్ని స్పష్టం చేశారు. “మేము చాలా చివరి దశ వివరాలకు (Final Details) చేరుకున్నాం. మేమంతా ఆశాజనకంగా ఉండటానికి చాలా బలమైన కారణాలు ఉన్నాయి; మేము ఒక పెద్ద వాణిజ్య ఒప్పందానికి చాలా దగ్గరగా ఉన్నామనే నమ్మకం నాకుంది” అని రూబియో చెప్పారు. ఈ ప్రతిపాదిత ఒప్పందం పూర్తి కావడానికి ఇక నెలల సమయం పట్టదని, కేవలం కొన్ని వారాల్లోనే ఖరారై.. ఇరు దేశాల మధ్య వ్యాపార, పారిశ్రామిక బంధాలను సరికొత్త ఎత్తుకు తీసుకెళ్తుందని ఆయన ఆశాభావం వ్యక్తం చేశారు.