TVK Vijay: తమిళనాడులోని మొత్తం 234 అసెంబ్లీ స్థానాలకు జరిగిన ఎన్నికల ఫలితాలు వెలువడ్డాయి. సినీ నటుడు విజయ్ నేతృత్వంలోని తమిళగ వెట్రి కజగం (TVK) తన తొలి ఎన్నికల్లోనే 108 స్థానాలను కైవసం చేసుకుని సింగిల్ లార్జెస్ట్ పార్టీగా నిలిచింది. కానీ, ప్రభుత్వం ఏర్పాటు చేయడానికి అవసరమైన 118 (మ్యాజిక్ ఫిగర్) మార్కును అందుకోవడానికి మరో 10 సీట్ల దూరంలో నిలిచిపోయింది. దీంతో ప్రభుత్వం ఎవరిది అనే అంశంపై ఇప్పుడు దేశవ్యాప్తంగా ఉత్కంఠ నెలకొంది.
60 ఏళ్ల ఆధిపత్యానికి బ్రేక్.. పీకే వ్యూహం సక్సెస్!
గత ఆరు దశాబ్దాలుగా తమిళనాడు రాజకీయం కేవలం డీఎంకే (DMK) ఇంకా అన్నాడీఎంకే (AIADMK)ల చుట్టూనే తిరిగేది. ఈ రెండు పార్టీల ద్వంద్వాధికారాన్ని బద్దలు కొట్టిన ఘనత విజయ్కే దక్కింది. ఈ విజయం వెనుక పొలిటికల్ స్ట్రాటజిస్ట్ ప్రశాంత్ కిషోర్ (PK) వ్యూహరచన స్పష్టంగా కనిపిస్తోంది. గతేడాది జరిగిన సభలో పీకే మాట్లాడుతూ.. విజయ్ని గెలిపించిన తర్వాత తాను ఎం.ఎస్. ధోనీ కంటే ఎక్కువ ఫేమస్ అవుతానని చేసిన వ్యాఖ్యలు ఇప్పుడు నిజమయ్యాయి. అభిమాన గణాన్ని ఓటు బ్యాంకుగా మార్చడంలో పీకే మార్క్ రాజకీయం మరోసారి తన సత్తా చాటింది.
కింగ్ మేకర్గా కాంగ్రెస్?
మెజారిటీకి అవసరమైన ఆ 10 సీట్ల కోసం విజయ్ ఇప్పుడు చిన్న పార్టీల వైపు చూస్తున్నారు. ఈ క్రమంలోనే ఆసక్తికర పరిణామాలు చోటుచేసుకున్నాయి:
-
రాహుల్ గాంధీ ఫోన్ కాల్: ఫలితాలు రాగానే కాంగ్రెస్ అగ్రనేత రాహుల్ గాంధీ విజయ్కి ఫోన్ చేసి సుమారు 15 నిమిషాల పాటు చర్చలు జరిపారు. ప్రస్తుతం డీఎంకే కూటమిలో ఉన్న కాంగ్రెస్, ఇప్పుడు టీవీకేతో చేతులు కలిపేందుకు ఆసక్తిగా ఉన్నట్లు తెలుస్తోంది. 1967 తర్వాత తమిళనాట అధికారం లేని కాంగ్రెస్కు, టీవీకే రూపంలో ఒక బలమైన భాగస్వామి దొరికినట్లు విశ్లేషకులు భావిస్తున్నారు.
-
చిన్న పార్టీల పాత్ర: పీఎంకే (4), వీసీకే (2), సీపీఐ (2) వంటి పార్టీల మద్దతు కూడా టీవీకేకు అత్యంత కీలకం కానుంది. అయితే, వీటి మధ్య ఉన్న అంతర్గత విభేదాలను సర్దుబాటు చేయడం విజయ్కి ఒక సవాల్గా మారనుంది.
అన్నాడీఎంకే మరియు ఎన్డీయే అడుగులు
మరోవైపు, ప్రతిపక్ష అన్నాడీఎంకే (AIADMK) 72 స్థానాలతో రెండో స్థానంలో నిలిచింది. టీవీకేతో పొత్తు కోసం ఆ పార్టీ కూడా ప్రయత్నాలు చేసే అవకాశం ఉంది. అయితే, విజయ్ తన ప్రచారంలో బీజేపీకి దూరంగా ఉంటానని స్పష్టం చేశారు. ఒకవేళ అన్నాడీఎంకే మద్దతు తీసుకోవాల్సి వస్తే, ఆ పార్టీ ఎన్డీయే (NDA) నుండి బయటకు రావాల్సి ఉంటుందనే చర్చ కూడా నడుస్తోంది.