PM Modi: దేశంలోని ఐదు రాష్ట్రాల ఎన్నికల ఫలితాలపై ప్రధానమంత్రి నరేంద్ర మోదీ స్పందించారు. ఈ ఎన్నికల్లో ఎన్డీయే (NDA) కూటమికి మద్దతు తెలిపిన ఓటర్లందరికీ ఆయన ధన్యవాదాలు తెలియజేశారు. ముఖ్యంగా పశ్చిమ బెంగాల్లో భారతీయ జనతా పార్టీ అద్భుతమైన విజయాన్ని అందుకోవడంపై హర్షం వ్యక్తం చేశారు. బెంగాల్ ప్రజలు బీజేపీపై ఉంచిన నమ్మకానికి సాటి లేదని, అక్కడ ‘కమలం’ వికసించిందని మోదీ వ్యాఖ్యానించారు. ఈ విజయం కోసం రాత్రింబవళ్లు కష్టపడిన పార్టీ కార్యకర్తలకు ఆయన ప్రత్యేక కృతజ్ఞతలు తెలిపారు.
తమిళనాడు రాజకీయాల్లో సరికొత్త మార్పులు చోటుచేసుకోవడంపై కూడా ప్రధాని ఆసక్తికర వ్యాఖ్యలు చేశారు. ప్రముఖ నటుడు విజయ్ నేతృత్వంలోని టీవీకే (TVK) పార్టీ తొలి ఎన్నికల్లోనే అద్భుతమైన ప్రదర్శన కనబర్చడంపై మోదీ ప్రశంసలు కురిపించారు. విజయ్తో పాటు ఆయన పార్టీ కార్యకర్తలకు అభినందనలు తెలియజేస్తూ.. తమిళనాడు అభివృద్ధికి, ప్రజల సంక్షేమానికి కేంద్ర ప్రభుత్వం ఎప్పుడూ తోడుగా ఉంటుందని హామీ ఇచ్చారు. రాష్ట్ర పురోగతి కోసం అందరం కలిసి పనిచేయాల్సిన అవసరం ఉందని ఆయన పేర్కొన్నారు.
తమిళనాడులో ఎన్డీయే అభ్యర్థులకు ఓటు వేసిన ప్రతి ఒక్కరికీ ప్రధాని మోదీ ధన్యవాదాలు తెలిపారు. ఫలితాలు ఎలా ఉన్నా, తాము ఎప్పుడూ ప్రజల పక్షానే ఉంటామని, వారి సమస్యల పరిష్కారానికి నిరంతరం కృషి చేస్తామని ఎక్స్ (ట్విట్టర్) వేదికగా రాసుకొచ్చారు. ప్రజల జీవన ప్రమాణాలను మెరుగుపరచడమే తమ ప్రభుత్వ ప్రధాన లక్ష్యమని స్పష్టం చేశారు.
అస్సాం, కేరళ, పుదుచ్చేరి రాష్ట్రాల్లో కూడా ఎన్డీయేకు మద్దతుగా నిలిచిన ఓటర్లకు ప్రధాని హృదయపూర్వక కృతజ్ఞతలు తెలిపారు. ప్రజలు తమపై ఉంచిన బాధ్యతను సక్రమంగా నిర్వహిస్తామని, దేశాభివృద్ధిలో ప్రతి రాష్ట్రాన్ని భాగస్వామ్యం చేస్తామని మోదీ ధీమా వ్యక్తం చేశారు. ఈ ఎన్నికల ఫలితాలు ప్రజాస్వామ్య స్ఫూర్తిని చాటాయని ఆయన కొనియాడారు.
Gratitude to the voters of Tamil Nadu who supported the NDA in the Tamil Nadu Assembly Elections. We will always remain at the forefront in addressing people’s issues and improving their lives.
Congratulations to TVK on their impressive performance.
The Centre will leave no…
— Narendra Modi (@narendramodi) May 4, 2026