KCR: తెలంగాణ రాజకీయాల్లో రేపు (డిసెంబర్ 29) అత్యంత కీలకమైన రోజుగా మారబోతోంది. రేపటి నుంచి ప్రారంభం కానున్న అసెంబ్లీ సమావేశాలకు భారత రాష్ట్ర సమితి (బిఆర్ఎస్) అధినేత, మాజీ ముఖ్యమంత్రి కల్వకుంట్ల చంద్రశేఖర్ రావు హాజరుకానున్నారు. గత కొంతకాలంగా అసెంబ్లీకి దూరంగా ఉంటున్న కేసీఆర్, ఈసారి ప్రత్యక్షంగా బరిలోకి దిగాలని నిర్ణయించుకోవడంతో రాజకీయ వర్గాల్లో ఒక్కసారిగా వేడి పెరిగింది.
ఎర్రవల్లి నుంచి హైదరాబాద్కు మకాం..
గత కొద్ది రోజులుగా ఎర్రవల్లిలోని తన వ్యవసాయ క్షేత్రంలోనే ఉంటూ పార్టీ నేతలకు దిశానిర్దేశం చేస్తున్న కేసీఆర్, తాజాగా హైదరాబాద్కు చేరుకున్నారు. అసెంబ్లీ సమావేశాల్లో అనుసరించాల్సిన వ్యూహాలపై ఆయన ఇప్పటికే కసరత్తు పూర్తి చేసినట్లు తెలుస్తోంది. ముఖ్యంగా సాగునీటి ప్రాజెక్టులు, రుణమాఫీ, శాంతిభద్రతల వంటి అంశాలపై ప్రభుత్వంపై ఎదురుదాడి చేసేందుకు కేసీఆర్ స్వయంగా రంగంలోకి దిగుతుండటం గమనార్హం.
ఇది కూడా చదవండి: Cigarette Price Hike: స్మోకర్లకు కోలుకోలేని దెబ్బ.. ఒక్క సిగరెట్ ధర రూ. 72? కేంద్రం సంచలన నిర్ణయం!
సవాళ్ల మధ్య అసెంబ్లీ వేదిక
ఇటీవలే ముఖ్యమంత్రి రేవంత్ రెడ్డి “ధైర్యం ఉంటే కేసీఆర్ అసెంబ్లీకి వచ్చి చర్చలో పాల్గొనాలి” అని విసిరిన సవాలును స్వీకరించినట్లే కేసీఆర్ రాక కనిపిస్తోంది.
-
పాలమూరు-రంగారెడ్డి: ఈ ప్రాజెక్టుపై ప్రభుత్వం ఇస్తున్న గణాంకాలను కేసీఆర్ తనదైన శైలిలో తిప్పికొట్టే అవకాశం ఉంది.
-
నీళ్లు-నిజాలు: కృష్ణా, గోదావరి జలాల వాటాలో గత ప్రభుత్వం తప్పులు చేసిందన్న కాంగ్రెస్ ఆరోపణలపై కేసీఆర్ ఇచ్చే వివరణ ఇప్పుడు హాట్ టాపిక్ కానుంది.
ఎదురుచూస్తున్న రాజకీయ వర్గాలు
కేసీఆర్ అసెంబ్లీకి వస్తుండటంతో అటు అధికార పక్షం, ఇటు ప్రతిపక్ష సభ్యులు తమ అస్త్రశస్త్రాలను సిద్ధం చేసుకున్నారు. సభలో కేసీఆర్ ప్రసంగం ఎలా ఉండబోతోంది? రేవంత్ రెడ్డి కౌంటర్లు ఎలా ఉంటాయి? అన్నది ఇప్పుడు రాష్ట్రవ్యాప్తంగా చర్చనీయాంశమైంది. ముఖ్యంగా విపక్ష నేతగా కేసీఆర్ మొదటిసారి సభలో తన గళాన్ని ఎలా వినిపిస్తారో చూడాలి.