Encounter: పశ్చిమ బెంగాల్లో దేశవ్యాప్తంగా పెను సంచలనం సృష్టించిన 11 ఏళ్ల మైనర్ బాలిక అత్యాచారం, హత్య కేసులో బుధవారం తెల్లవారుజామున ఒక అత్యంత కీలకమైన పరిణామం చోటుచేసుకుంది. ఈ ఘోర దారుణానికి ఒడిగట్టిన ప్రధాన నిందితుడు ప్రవాష్ మోండల్ కోల్కతా శివారు ప్రాంతమైన బరుఇపూర్లో జరిగిన పోలీసు ఎన్కౌంటర్లో మరణించాడు. సీసీటీవీ ఫుటేజీ ఆధారంగా ఈ కేసులో పోలీసులు అరెస్ట్ చేసిన మొదటి నిందితుడు ఇతనే కావడం గమనార్హం.
పోలీసుల కథనం ప్రకారం.. ఈ కేసు దర్యాప్తులో భాగంగా అర్ధరాత్రి దాటిన తర్వాత సుమారు 12:45 గంటల సమయంలో నిందితుడు ప్రవాష్ మోండల్ను క్రైమ్ సీన్ రీకన్స్ట్రక్షన్ (నేరం ఎలా జరిగిందో తెలుసుకునే ప్రక్రియ) కోసం ఘటనా స్థలానికి తీసుకువెళ్లారు. ఆ సమయంలో నిందితుడు పోలీసులను తప్పుదోవ పట్టించడానికి ప్రయత్నిస్తూ, హఠాత్తుగా ఒక పోలీసు అధికారి సర్వీస్ తుపాకీని లాక్కొని పారిపోవడానికి చూశాడు. అంతేకాకుండా పోలీసుల వైపు ఒక రౌండ్ కాల్పులు కూడా జరపడంతో, భద్రతా సిబ్బంది ఆత్మరక్షణ కోసం ఎదురుకాల్పులు జరిపారు. ఈ కాల్పుల్లో తీవ్రంగా గాయపడిన నిందితుడిని బరుఇపూర్ సబ్ డివిజనల్ ఆసుపత్రికి తరలించగా, అతడు అప్పటికే మరణించినట్లు వైద్యులు ధృవీకరించారు.
ఈ నెల జులై 4న కనిపించకుండా పోయిన సదరు బాలిక మృతదేహం, మరుసటి రోజు ఒక చెరువులో సంచిలో పడేసి ఉండగా లభ్యమైంది. బాలికపై అత్యాచారం చేసి, దారుణంగా హత్య చేశారని పోస్ట్మార్టం నివేదికలో తేలింది. ఈ ఘటనతో ఆగ్రహించిన స్థానికులు రోడ్లను దిగ్బంధించి, టైర్లను తగులబెట్టి, పోలీసు వాహనాలను ధ్వంసం చేస్తూ నిందితులను కఠినంగా శిక్షించాలని పెద్ద ఎత్తున ఆందోళనలు చేశారు. ఈ ఉద్రిక్తతల మధ్య, ఆదివారం నాడు ఒక వ్యక్తిని నిందితుడిగా భావించి స్థానికులు కొట్టి చంపారు. అయితే, ఆ గుంపు దాడిలో చనిపోయిన వ్యక్తి అమాయకుడని వెల్లడించిన పశ్చిమ బెంగాల్ ముఖ్యమంత్రి సువేందు అధికారి, ఈ అత్యాచార-హత్య కేసుపై 72 గంటల్లోగా సమగ్ర నివేదిక సమర్పించాలని డీజీపీని ఆదేశించారు. ఈ దారుణం తీవ్ర రాజకీయ దుమారానికి దారితీసిన నేపథ్యంలో ప్రధాన నిందితుడు ఎన్కౌంటర్లో హతం కావడం ఇప్పుడు రాష్ట్రవ్యాప్తంగా హాట్ టాపిక్గా మారింది.