Weather: ఆంధ్రప్రదేశ్‌లో రానున్న నాలుగు రోజుల పాటు వాతావరణం అస్థిరంగా ఉండే సూచనలు కనిపిస్తున్నాయి. ఉపరితల ఆవర్తనం మరియు ద్రోణుల ప్రభావంతో పలు జిల్లాల్లో వర్షాలు కురిసే అవకాశం ఉందని రాష్ట్ర విపత్తుల నిర్వహణ సంస్థ (ఏపీఎస్డీఎంఏ) ప్రకటించింది. ముఖ్యంగా శుక్రవారం నాడు పిడుగులతో కూడిన మోస్తరు వర్షాలు కురవనున్నాయని తెలిపింది.
మన్యం, అల్లూరి సీతారామరాజు, కాకినాడ, ఎన్టీఆర్, గుంటూరు, బాపట్ల, పల్నాడు, ప్రకాశం, నంద్యాల, అనంతపురం జిల్లాల్లో మోస్తరు వర్షాలు నమోదయ్యే అవకాశం ఉంది. ఈ ప్రాంతాల్లో ప్రజలు అత్యంత జాగ్రత్తగా ఉండాలని, ఉరుములు, మెరుపుల సమయంలో ఓపికగా సురక్షిత ప్రాంతాల్లో తలదాచుకోవాలని అధికారులు సూచించారు.
ఇతర జిల్లాల్లో మాత్రం తేలికపాటి జల్లులు పడే అవకాశముందని వాతావరణ శాఖ వెల్లడించింది. ఆకస్మిక వర్షాలు మరియు పిడుగుల నుంచి రక్షణ కోసం ప్రజలు ముందు జాగ్రత్తలు పాటించాలని ఏపీఎస్డీఎంఏ విజ్ఞప్తి చేసింది.