Warangal: వరంగల్ జిల్లాలో సినిమా స్టోరీని తలపించే ఒక వింత వివాదం ఇప్పుడు నెట్టింట తీవ్ర వైరల్గా మారింది. ఒక పొలంలో గుప్తనిధులు (బంగారం) దొరకడం.. ఆ దొరికిన బంగారం వాటాల కోసం భూమిని అమ్మిన పాత యజమాని, కొన్న ప్రస్తుత యజమాని మరియు కలుపు తీసిన కూలీలు పోలీస్ స్టేషన్ మెట్లెక్కడంతో ఈ నమ్మశక్యం కాని ఉదంతం వెలుగుచూసింది.
ఈ విచిత్రమైన బంగారం పంపకాల పంచాయితీ వరంగల్ జిల్లా చెన్నారావుపేట మండలం కోపాకులపాడు గ్రామంలో చోటుచేసుకుంది. దీనికి సంబంధించిన పూర్తి వివరాలు, ఆసక్తికరమైన చట్టపరమైన చర్చ ఇక్కడ ఉంది..
కలుపు తీస్తుంటే కాసుల పంట!
గ్రామంలోని సదరు 6 ఎకరాల భూమిని ఐదేళ్ల క్రితం చెన్నారావుపేటకు చెందిన ఒక వ్యక్తి కొనుగోలు చేశాడు. ప్రస్తుతం ఈ భూమిని ఈర్యతండాకు చెందిన ఒక రైతు కౌలుకు తీసుకుని పత్తి సాగు చేస్తున్నాడు.
జూన్ 24న ఈ పొలంలో కలుపు తీస్తుండగా మహిళా కూలీలకు హఠాత్తుగా కొన్ని పురాతన బంగారు ఆభరణాలు లభ్యమయ్యాయి. ఆ దొరికిన బంగారం దాదాపు 50 తులాలు (అర కిలో) ఉంటుందని సమాచారం. విషయం తెలుసుకున్న ప్రస్తుత భూయజమాని, కూలీలు ఆ బంగారాన్ని గుట్టుచప్పుడు కాకుండా పంచుకున్నారనే ప్రచారం జరిగింది. అయితే, తమకు వాటా ఇవ్వకుండా దొంగచాటుగా పంచుకున్నారంటూ భూమి కొన్న యజమాని పోలీసులకు ఫిర్యాదు చేయడంతో అసలు కథ బయటపడింది.
సీన్లోకి పాత యజమాని.. చట్టపరమైన ట్విస్ట్!
ఈ లోపు బంగారం దొరికిన వార్త దావానలంలా వ్యాపించడంతో.. సదరు భూమిని ఐదేళ్ల క్రితం విక్రయించిన పాత యజమాని కూడా స్టేషన్లో ల్యాండ్ అయ్యాడు. “ఆ భూమి వంశపారంపర్యంగా మాది.. అందులో దొరికిన నిధులు మాకే చెందుతాయి, ఆర్కియాలజీ (పురాతత్వ శాఖ) అధికారులతో విచారణ జరిపించి మా వాటా మాకు ఇప్పించాలి” అంటూ అతను కూడా పోలీసులకు ఫిర్యాదు చేశాడు.
దీంతో ఇప్పుడు ఒక సరికొత్త లీగల్ చర్చ తెరపైకి వచ్చింది:
-
అమ్మేసిన భూమిపై హక్కులు ఉంటాయా?: సాధారణంగా రిజిస్ట్రేషన్ చట్టాల ప్రకారం.. ఒకసారి భూమిని లేదా ఆస్తిని పూర్తిగా విక్రయించి, రిజిస్ట్రేషన్ డాక్యుమెంట్లపై సంతకం చేశాక ఆ ప్రాపర్టీపై పాత యజమానికి ఎలాంటి హక్కులు ఉండవు.
-
భూగర్భ సంపద ఎవరిది?: ఒకవేళ భూమిలో గ్రానైట్, బొగ్గు లేదా బంగారం లాంటి నిధులు దొరికితే.. చట్టప్రకారం (Indian Treasure Trove Act) అది ప్రభుత్వానికే చెందుతుంది తప్ప పాత లేదా కొత్త యజమానులకు దానిపై పూర్తి హక్కులు ఉండవు. కానీ ఇక్కడ పాత యజమాని వాటా అడగడం అందరినీ ఆశ్చర్యపరుస్తోంది.
ఈ భూమికి ఒక ప్రత్యేక చరిత్ర ఉందట!
ఆ పొలం పరిసరాల్లో పూర్వం కాకతీయుల కాలం నాటి పురాతన ఆలయాలు ఉండేవని గ్రామస్థులు చెబుతున్నారు. గతంలో ఇక్కడ దేవతామూర్తుల విగ్రహాలు కూడా లభించాయి. అంతేకాదు, 1991లో అప్పటి భూయజమానికి, ఆ తర్వాత కొన్నేళ్లకు ఆ పొలంలో పనిచేసే ఒక పాలిగాడికి (జీతగాడికి) కూడా కొంత బంగారం దొరికినట్లు స్థానికులు గుర్తుచేసుకుంటున్నారు.
రాత్రి పూట తవ్వకాలు.. రైతులకు కొత్త తలనొప్పి
ఈ బంగారం వివాదం ఒకవైపు నడుస్తుండగానే.. ఆ పొలంలో ఇంకా నిధులు ఉన్నాయనే ప్రచారంతో చుట్టుపక్కల ప్రాంతాల జనం రాత్రి పూట రహస్యంగా వస్తూ పొలమంతా వెతకడం మొదలుపెట్టారు. చేతికొస్తున్న పత్తి పంటను తొక్కుతూ, తవ్వకాలు జరుపుతూ పాడు చేస్తుండటంతో ప్రస్తుత కౌలు రైతు తల పట్టుకుంటున్నాడు. ప్రస్తుతానికి పోలీసులు ఈ బంగారం వివాదంపై కేసు నమోదు చేసి దర్యాప్తు జరుపుతున్నారు.