Indiramma Indlu: తెలంగాణలోని పేదలకు సొంతింటి కలను నెరవేర్చేందుకు రాష్ట్ర ప్రభుత్వం మరో కీలక ముందడుగు వేసింది. రాష్ట్రంలో ప్రతిష్ఠాత్మకంగా అమలు చేస్తున్న ‘ఇందిరమ్మ ఇళ్ల’ పథకాన్ని కేంద్ర ప్రభుత్వ గృహ నిర్మాణ పథకమైన ప్రధానమంత్రి ఆవాస్ యోజన (PMAY)తో అనుసంధానం చేయాలని రేవంత్ రెడ్డి సర్కార్ నిర్ణయించింది.
ఈ అనుసంధాన ప్రక్రియతో కేంద్ర ప్రభుత్వం నుంచి రాష్ట్రానికి కేటాయించిన కోటా ప్రకారం.. అర్హులైన ప్రతి లబ్ధిదారుడి ఖాతాలో అదనంగా రూ. 72,000 చొప్పున కేంద్ర ఆర్థిక సాయం నేరుగా జమ కానుంది. తెలంగాణ రాష్ట్రానికి పీఎంఏవై కింద మొత్తం 2 లక్షల ఇళ్లు మంజూరు కాగా, ఈ నిధులను పూర్తిస్థాయిలో సద్వినియోగం చేసుకునేలా ప్రభుత్వం వేగంగా అడుగులు వేస్తోంది.
రెండు విడతల్లో 2 లక్షల మంది లబ్ధిదారుల నమోదు..
కేంద్ర నిధులను త్వరితగతిన రాబట్టేందుకు అధికారులు రెండు దశల్లో లబ్ధిదారుల వివరాలను పీఎం ఆవాస్ యోజన అధికారిక పోర్టల్‌లో నమోదు చేస్తున్నారు.
-
మొదటి విడత (1.75 లక్షల ఇళ్లు)..రాష్ట్రంలో మొదటి విడత కింద ఇప్పటికే నిర్మాణాలు పూర్తి చేసుకున్న 1.75 లక్షల ఇందిరమ్మ ఇళ్ల లబ్ధిదారుల వివరాలను, జియో ట్యాగింగ్ సమాచారాన్ని అధికారులు పీఎంఏవై పోర్టల్‌లో శరవేగంగా అప్‌లోడ్ చేస్తున్నారు.
-
రెండో విడత (25 వేల ఇళ్లు)..రెండో విడతలో భాగంగా రాష్ట్రవ్యాప్తంగా ఇంకా మట్టి గుడిసెలు, తాత్కాలిక నివాసాల్లో కాలం వెళ్లదీస్తున్న మరో 25 వేల మంది అత్యంత నిరుపేద కుటుంబాలను గుర్తించి, వారి వివరాలను కూడా ఈ పథకం పరిధిలోకి తీసుకురానున్నారు.
లబ్ధిదారుల ఖాతాల్లోకి నేరుగా రూ.72,000..
-
పోర్టల్‌లో లబ్ధిదారుల డేటా ధ్రువీకరణ, అనుసంధాన ప్రక్రియ పూర్తిగా ముగిసిన వెంటనే కేంద్ర ప్రభుత్వం ఇచ్చే రూ. 72,000 నిధులు లబ్ధిదారుల బ్యాంక్ ఖాతాల్లో నేరుగా (DBT ద్వారా) జమ అవుతాయి.
-
రాష్ట్ర ప్రభుత్వం ఇందిరమ్మ ఇళ్ల పథకం కింద అందించే ఆర్థిక సాయానికి ఇది తోడవ్వడంతో.. నిర్మాణంలో ఉన్న పేదలకు ఆర్థిక భారం తగ్గి, ఇళ్ల నిర్మాణాలు వేగంగా పూర్తి కావడానికి దోహదపడనుంది.
కేంద్ర, రాష్ట్ర పథకాలను సమన్వయం చేసుకుంటూ నిధులను పేదల ఖాతాల్లోకి చేర్చే ఈ నిర్ణయంపై రాష్ట్రవ్యాప్తంగా హర్షం వ్యక్తమవుతోంది.