Revanth Reddy: పాకిస్తాన్‌తో ఉద్రిక్త పరిస్థితులు కొనసాగుతున్న తరుణంలో, దేశ భద్రత కోసం ప్రాణాలు పణంగా పెట్టే భారత సాయుధ దళాలకు మద్దతుగా తెలంగాణ రాష్ట్ర ప్రభుత్వం గొప్ప నిర్ణయం తీసుకుంది. ముఖ్యమంత్రి ఎ. రేవంత్ రెడ్డి శుక్రవారం ఒక కీలక ప్రకటన చేస్తూ, తనతో పాటు తెలంగాణ కాంగ్రెస్‌కి చెందిన ప్రతినిధులంతా తమ ఒక నెల జీతాన్ని జాతీయ రక్షణ నిధికి విరాళంగా ఇస్తున్నట్టు తెలిపారు.
మన ధైర్య సైనికులు దేశ సరిహద్దులను, ప్రజల భద్రతను కాపాడేందుకు చేస్తున్న త్యాగానికి ఇది చిన్న కృతజ్ఞత. ఒక భారతీయుడిగా నా బాధ్యతనెరిగి నేను ముందడుగు వేసాను. నా సహచరులు, సహోద్యోగులు, ప్రతి దేశభక్తుడు ఈ కార్యక్రమంలో పాల్గొనాలి, అని సీఎం ఆకాంక్ష వ్యక్తం చేశారు. జయమే లక్ష్యంగా, విజయం సాధించే వరకు మన సైనికులతో భౌగోళికంగా కాదు, గుండెల్లో అండగా నిలబడదాం అంటూ ఓదార్పుగా, ఉత్సాహంగా పిలుపునిచ్చారు.
హైదరాబాద్‌లో దేశభక్తి ర్యాలీ – పాక్‌కు సీఎం గట్టి హెచ్చరిక
గురువారం హైదరాబాద్‌లో తెలంగాణ సచివాలయం నుండి నెక్లెస్ రోడ్ వరకు సాగిన దేశభక్తి ర్యాలీ ప్రజల్లో అభూతపూర్వదేశభక్తి జ్వాలలు రేపింది. ర్యాలీకి స్వయంగా ముఖ్యమంత్రి రేవంత్ రెడ్డి నేతృత్వం వహించగా, వందలాది పౌరులు పాల్గొన్నారు. “భారత్ మాతా కీ జై”, “జై జవాన్”, “వందేమాతరం” వంటి నినాదాలతో నగరం మార్మోగింది.
ఈ సందర్భంగా పాకిస్తాన్‌కు సీఎం గట్టి హెచ్చరిక చేశారు. “140 కోట్ల భారతీయులు మన సైన్యానికి అండగా ఉన్నారు. భారత్ ఒకసారి నిర్ణయం తీసుకుంటే, పాకిస్తాన్ రేపటి సూర్యుడి కాంతిని కూడా చూడలేదు,” అంటూ ఆయన ధీమా వ్యక్తం చేశారు. ఈ వ్యాఖ్యలు దేశ వ్యాప్తంగా హర్షాతిరేకాలు పొందుతున్నాయి.
తెలంగాణ ప్రజల నుంచి దేశానికి సంఘీభావం
ఈ నిర్ణయం తెలంగాణ ప్రజల్లో దేశం పట్ల భక్తిని, బాధ్యతను మరింత పెంచేలా ఉంది. ప్రజల నుంచి ఈ పిలుపుకు విశేష స్పందన లభిస్తోంది. తెలంగాణ రాజకీయాల్లో ఇది ఒక కొత్త ఉదాహరణగా నిలిచే అవకాశం ఉంది – రాజకీయ పార్టీలు దేశ రక్షణ కోసం ఏకతాటిపైకి రావడమంటే ఇదే.