Supreme Court: దేశవ్యాప్తంగా కలకలం రేపిన నీట్ (NEET-UG) ప్రశ్నపత్రం లీక్ వివాదం నేపథ్యంలో, జరగబోయే రీ-టెస్ట్కు సంబంధించి సుప్రీంకోర్టు సోమవారం ఒక ముఖ్యమైన తీర్పును ఇచ్చింది. ఈ పరీక్షను కంప్యూటర్ ఆధారిత (CBT) పద్ధతిలో నిర్వహించాలంటూ దాఖలైన పిటిషన్ను న్యాయస్థానం తిరస్కరించింది. ఎప్పటిలాగే పాత పద్ధతి అయిన ఓఎంఆర్ (OMR) షీట్ల ద్వారానే పరీక్ష జరపాలని స్పష్టం చేసింది.
పరీక్షకు సమయం చాలా తక్కువగా ఉండటం, నేషనల్ టెస్టింగ్ ఏజెన్సీ (NTA)పై ఇప్పటికే తీవ్రమైన ఒత్తిడి ఉండటాన్ని కోర్టు గమనించింది. ఇలాంటి తరుణంలో అకస్మాత్తుగా పరీక్ష రాసే విధానాన్ని మార్చడం ఆచరణాత్మకంగా అస్సలు సాధ్యం కాదని సుప్రీంకోర్టు అభిప్రాయపడింది. అందుకే విద్యార్థులకు ఎలాంటి ఇబ్బంది కలగకుండా పాత పద్ధతిలోనే పరీక్షను కొనసాగించాలని ఆదేశించింది.
ఇదే సమయంలో, పరీక్షల్లో అక్రమాలను అరికట్టడానికి డిజిటల్ ప్రశ్నపత్రాలను వాడాలని, ఆర్టిఫిషియల్ ఇంటెలిజెన్స్ (AI) నిఘా పెట్టాలని పిటిషనర్ కోర్టును కోరారు. అంతేకాకుండా, నీట్ పరీక్షల నిర్వహణ బాధ్యతను ‘ఎన్టీఏ’ నుంచి తప్పించి వేరే కొత్త సంస్థకు అప్పగించాలని కూడా విజ్ఞప్తి చేశారు. ఈ అభ్యర్థనలపై స్పందించిన అత్యున్నత న్యాయస్థానం.. నీట్ పరీక్షా విధానంలో తీసుకురావాల్సిన సంస్కరణలపై జులై నెలలో పూర్తిస్థాయిలో విచారణ జరుపుతామని వెల్లడించింది.
ఇదిలా ఉండగా, వివాదాల కారణంగా రద్దయిన నీట్ యూజీ పరీక్షను ఈ నెల జూన్ 21వ తేదీన దేశవ్యాప్తంగా తిరిగి నిర్వహించబోతున్న సంగతి తెలిసిందే. తాజా సుప్రీంకోర్టు ఉత్తర్వులతో పరీక్షా విధానంపై నెలకొన్న గందరగోళానికి తెరపడినట్లయింది.