Samay Raina Controversy: మళ్లీ వివాదంలో సమయ్ రైనా.. బీహార్, కాశ్మీరీ పండిట్లపై వివాదాస్పద జోక్స్..!

వివాదం ఎలా మొదలైంది?..

• బీహార్ నేపథ్యంపై జోక్స్: షోలో పాల్గొన్న స్టాండప్ కమెడియన్ షెరోన్ వర్మను పరిచయం చేస్తూ.. “ఈమె బీహార్‌కు చెందిన వ్యక్తి, ‘ఎబోలా’ (Ebola) అంటే ఎవరో ఏదో మాట్లాడారని (ఈ బోలా) అనుకునేంత బీహారీ” అంటూ సమయ్ ఎద్దేవా చేశారు.
• కాశ్మీరీ పండిట్ల అంశంపై వ్యాఖ్యలు: దీనికి బదులిస్తూ షెరోన్.. “సమయ్ ఎంత కాశ్మీరీ అంటే అతనికి తనపై తానే రాళ్లు విసురుకోవడం ఇష్టం” అని వ్యాఖ్యానించారు. అనంతరం సమయ్ “ఉద్యోగం కోసం ముంబైకి వచ్చిన బీహారీ” అని అనగా.. షెరోన్ “కనీసం నా ఇంటిని నా సొంత ఇష్టంతోనైనా వదిలి వచ్చాను” అంటూ 1990ల నాటి కాశ్మీరీ పండిట్ల వలసల/విస్థాపన అంశాన్ని ప్రస్తావించారు. కాశ్మీరీ పండిట్ వర్గానికి చెందిన సమయ్ రైనా ఇలాంటి సున్నితమైన విషయాన్ని కామెడీ చేయడంపై నెటిజన్లు భగ్గుమన్నారు.

బూతులు మాట్లాడటమే టాలెంటా? – అర్చనా పూరన్ సింగ్ దిమ్మతిరిగే కౌంటర్..

నేతలు, కమ్యూనిటీ తీవ్ర ఆగ్రహం..

• రామ్ కదం (బీజేపీ ఎమ్మెల్యే)..
  కావాలని వివాదాస్పద వ్యాఖ్యలు చేసి, తర్వాత క్షమాపణలు చెప్పి ఉచితంగా పబ్లిసిటీ సంపాదించడం కొందరికి అలవాటుగా మారింది. సనాతన హిందూ ధర్మం, కాశ్మీరీ పండిట్లు ఎగతాళి చేయడానికి వస్తువులు కాదు అంటూ బీజేపీ ఎమ్మెల్యే రామ్ కదం ఆగ్రహం వ్యక్తం చేశారు.
• విశ్వ కాశ్మీరీ సమాజ్ నిరసన:
  36 ఏళ్లుగా సర్వస్వం కోల్పోయి విస్థాపనకు గురైన ఒక సమాజాన్ని టీఆర్‌పీ (TRP), వ్యూస్ కోసం కించపరచడం దుర్మార్గమని ‘విశ్వ కాశ్మీరీ సమాజ్’ కన్వీనర్ కిరణ్ వట్టల్ మండిపడ్డారు.

సమయ్ రైనా ప్రొఫైల్..

• వయస్సు & నేపథ్యం: 27 ఏళ్ల సమయ్ రైనా కాశ్మీరీ పండిట్ కుటుంబానికి చెందినవారు. హైదరాబాద్‌లో పాఠశాల విద్య, పూణేలో ఇంజనీరింగ్ పూర్తి చేసి స్టాండప్ కామెడీ, చెస్ లైవ్ స్ట్రీమింగ్‌తో గుర్తింపు పొందారు.

• పాపులారిటీ & సంపాదన: యూట్యూబ్‌లో 74 లక్షలకు పైగా సబ్‌స్క్రైబర్లు, ఇన్‌స్టాగ్రామ్‌లో 60 లక్షల మంది ఫాలోవర్లు ఉన్నారు. ‘ఇండియాస్ గాట్ లేటెంట్’ షోతో విపరీతమైన పాపులారిటీ దక్కించుకున్నప్పటికీ.. భాష, కంటెంట్ విషయంలో తరచూ విమర్శలు ఎదుర్కొంటున్నారు.