Viral Video: ఐపీఎల్ 2026లో భాగంగా సన్రైజర్స్ హైదరాబాద్ (SRH), చెన్నై సూపర్ కింగ్స్ (CSK) మధ్య జరిగిన మ్యాచ్లో ఒక వింత ఘటన చోటుచేసుకుంది. స్టేడియంలో మ్యాచ్ జరుగుతుండగా, ఒక హైదరాబాద్ అభిమాని చేతిలో నిమ్మకాయ పట్టుకుని ఏదో మంత్రాలు చదువుతున్నట్లుగా గొణుగుతున్న వీడియో ఇప్పుడు సోషల్ మీడియాలో తెగ వైరల్ అవుతోంది. విచిత్రం ఏమిటంటే, అతను అలా చేసిన తర్వాతి బంతికే క్రీజులో ఉన్న చెన్నై బ్యాటర్ శివమ్ దూబే అవుట్ అయ్యాడు. దీంతో “హైదరాబాద్ అభిమాని మ్యాజిక్ వర్కవుట్ అయింది” అంటూ నెటిజన్లు సరదాగా కామెంట్స్ చేస్తున్నారు.
ఇక మ్యాచ్ విషయానికి వస్తే.. ఉత్కంఠ భరితంగా సాగిన ఈ పోరులో హైదరాబాద్ జట్టు 10 పరుగుల తేడాతో చెన్నైపై విజయం సాధించింది. మొదట బ్యాటింగ్ చేసిన సన్రైజర్స్ నిర్ణీత ఓవర్లలో 194 పరుగులు చేసింది. ఓపెనర్ అభిషేక్ శర్మ కేవలం 22 బంతుల్లోనే 59 పరుగులు చేసి మెరుపు ఆరంభాన్ని ఇచ్చాడు. ఆ తర్వాత హెన్రిచ్ క్లాసెన్ కూడా 59 పరుగులతో రాణించడంతో హైదరాబాద్ భారీ స్కోరు సాధించగలిగింది. ఒక దశలో 220 పరుగులు దాటుతుందనిపించినా, చెన్నై బౌలర్లు జేమీ ఓవర్టన్, కంబోజ్ తలా మూడు వికెట్లు తీసి హైదరాబాద్ను కట్టడి చేశారు.
— gocvideo (@gocvideo) April 19, 2026
భారీ లక్ష్యంతో బరిలోకి దిగిన చెన్నై సూపర్ కింగ్స్ నిర్ణీత ఓవర్లలో 8 వికెట్లు కోల్పోయి 184 పరుగులు మాత్రమే చేయగలిగింది. చెన్నై బ్యాటర్లలో మాథ్యూ షార్ట్ (34), శివమ్ దూబే (21) ప్రయత్నించినప్పటికీ వేగంగా పరుగులు రాబట్టలేకపోయారు. ముఖ్యంగా హైదరాబాద్ బౌలర్ ఇషాన్ మలింగ తన బౌలింగ్తో చెన్నైని దెబ్బతీశాడు. మలింగ 4 ఓవర్లలో 29 పరుగులే ఇచ్చి 3 కీలక వికెట్లు పడగొట్టాడు. యువ స్పిన్నర్ శివాంగ్ కుమార్ కూడా పొదుపుగా బౌలింగ్ చేసి చెన్నై బ్యాటర్లను కట్టడి చేశాడు.
చివరి ఓవర్లో చెన్నై విజయానికి 18 పరుగులు అవసరం కాగా, హైదరాబాద్ బౌలర్ ప్రఫుల్ హింజ్ అద్భుతంగా బౌలింగ్ చేశాడు. అతను కేవలం 7 పరుగులు మాత్రమే ఇచ్చి తన జట్టుకు విజయాన్ని అందించాడు. ఈ ఓటమితో చెన్నైకి మరో నిరాశ ఎదురైంది. గత ఎనిమిదేళ్లుగా 190కి పైగా పరుగుల లక్ష్యాన్ని ఆ జట్టు ఛేదించలేకపోవడం గమనార్హం. ఈ విజయంతో హైదరాబాద్ పాయింట్ల పట్టికలో నాలుగో స్థానానికి చేరగా, చెన్నై ఏడో స్థానంలోనే ఉండిపోయింది. మొత్తానికి మ్యాచ్లోని మలుపుల కంటే నిమ్మకాయ పట్టుకున్న ఆ అభిమాని వీడియోనే ఇప్పుడు హాట్ టాపిక్ అయింది.