Solar Eclipse 2026: సూర్యగ్రహణం అనగానే చుట్టూ ఉన్న పెద్దలు ఎన్నో హెచ్చరికలు జారీ చేస్తుంటారు.. ఆహారం తినొద్దు.. వంట చేయొద్దు.. గర్భిణులు అసలు బయటకే రావొద్దు.. సూర్యుడి వైపు అస్సలు చూడొద్దు! ఇలా ఆంక్షల జాబితా చాంతాడంత ఉంటుంది.
నేడు ఆగస్టు 12 (బుధవారం) నాడు ఆకాశంలో అరుదైన సూర్యగ్రహణం ఏర్పడుతున్న నేపథ్యంలో.. ఈ ఆంక్షల్లో నిజమెంత? శాస్త్ర సాంకేతిక పరిజ్ఞానం ఇంతగా అభివృద్ధి చెందిన ఈ రోజుల్లో కూడా గ్రహణాల చుట్టూ వ్యాపించి ఉన్న ప్రచారాలు, మూఢనమ్మకాల వెనుక ఉన్న అసలు సీక్రెట్స్ ఏంటో విశ్లేషించుకుందాం.
భారత్లో కనిపిస్తుందా?
ఈ సూర్యగ్రహణం గ్రీన్లాండ్, ఐస్లాండ్, స్పెయిన్, పోర్చుగల్, రష్యా వంటి దేశాల్లో స్పష్టంగా కనిపించనుంది. మన భారతదేశంలో ఈ గ్రహణం అస్సలు కనిపించదు. ఇది రాత్రి సమయంలో సంభవించడం వల్ల మన దేశంలో ఎలాంటి భౌగోళిక లేదా ఖగోళ ప్రభావం ఉండదు.
సూర్యగ్రహణం – 8 పెద్ద ప్రచారాలు.. అసలైన నిజాలు!
1. గ్రహణం వేళ సూర్యకిరణాలు ప్రమాదకరమా?
-
ప్రచారం: గ్రహణ సమయంలో సూర్యుడి నుంచి అత్యంత ప్రమాదకరమైన వికిరణాలు (Special Rays) వస్తాయి.
-
నిజం: ఇది అబద్ధం. గ్రహణ సమయంలో సూర్యుడు ఎలాంటి ప్రత్యేక కిరణాలను విడుదల చేయడు. కాకపోతే, పగటి వెలుతురు తగ్గిపోవడంతో జనం సూర్యుడి వైపు ఎక్కువసేపు నేరుగా చూడటానికి ప్రయత్నిస్తారు. పాక్షిక గ్రహణం సమయంలో నగ్న నేత్రాలతో చూస్తే కంటి చూపు దెబ్బతింటుంది. అందుకే ప్రత్యేక సోలార్ గ్లాసెస్ వాడాలి.
2. అసలు సూర్యగ్రహణాన్ని చూడకూడదా?
-
ప్రచారం: గ్రహణాన్ని అస్సలు చూడనే కూడదు.
-
నిజం: పాక్షికంగా ఉన్నప్పుడు చూడకూడదు. కానీ, చంద్రుడు సూర్యుడిని పూర్తిగా కప్పేసే ‘సంపూర్ణ సూర్యగ్రహణం’ (Totality) సమయంలో ఆ కొద్ది సెకన్లు/నిమిషాలు నేరుగా చూడవచ్చు. అప్పుడు సూర్యుడి వెనుక ఉండే ‘కరోనా’ వెలుగు స్పష్టంగా కనిపిస్తుంది.
3. 99% గ్రహణం కూడా సంపూర్ణ గ్రహణంతో సమానమా?
-
ప్రచారం: సూర్యుడు 99% కవర్ అయితే పూర్తి గ్రహణం చూసినట్లే.
-
నిజం: కాదు. 1% సూర్యకాంతి బయటకు వచ్చినా అది కళ్లకు తీవ్ర హాని కలిగిస్తుంది. సంపూర్ణ గ్రహణం ఏర్పడిన ప్రాంతంలో మాత్రమే ఆకాశం చీకటిమయమై అద్భుత దృశ్యం ఆవిష్కృతమవుతుంది.
4. సూర్యగ్రహణం వల్ల భూకంపాలు వస్తాయా?
-
ప్రచారం: భూమి, సూర్యుడు, చంద్రుడు ఒకే వరుసలోకి రావడం వల్ల గురుత్వాకర్షణ పెరిగి భూకంపాలు, సునామీలు వస్తాయి.
-
నిజం: దీనికి ఎలాంటి శాస్త్రీయ ఆధారం లేదు. ప్రతినెల అమావాస్యకు చంద్రుడు, సూర్యుడు ఒకే వరుసలోకి వస్తారు. గతంలో 2024 గ్రహణంపై పరిశోధన చేసిన సైంటిస్టులు.. గ్రహణం వేళ జనం వాహనాలు నిలిపివేసి గ్రహణాన్ని చూడటం వల్ల భూమిపై ‘మానవ సంబంధిత ప్రకంపనల శబ్దం’ (Seismic Noise) తగ్గిపోయిందని తేల్చారు!
5. జంతువులు వింతగా ప్రవర్తిస్తాయా?
-
ప్రచారం: గ్రహణం వస్తోందని ముందుగానే తెలిసి జంతువులు దెయ్యాల్లా ప్రవర్తిస్తాయి.
-
నిజం: పగటిపూట ఒక్కసారిగా వెలుతురు, ఉష్ణోగ్రత తగ్గిపోవడంతో చీకటి పడుతోందని భావించి పక్షులు అరవడం ఆపేస్తాయి, జీవాలు నిద్రకు ఉపక్రమిస్తాయి. అంతే తప్ప దీని వెనుక ఎలాంటి అసాధారణ లేదా వింత శక్తులు లేవు.
6. గ్రహణ సమయంలో వంట చేయకూడదా? తిండి తినకూడదా?
-
ప్రచారం: గ్రహణం సమయంలో వండిన ఆహారం విషపూరితంగా మారుతుంది.
-
నిజం: ఇది సంప్రదాయ విశ్వాసం మాత్రమే, సైన్స్ కాదు. గ్రహణం రావడం వల్ల ఆహారం పాయిజన్ అవుతుందని ఏ సైంటిఫిక్ స్టడీ కూడా నిరూపించలేదు. సంప్రదాయాలు పాటించే వారు ఉపవాసాలు ఉండటంలో తప్పులేదు, కానీ సైంటిఫిక్గా ఆహారం పాడవుతుందనడం నిజం కాదు.
7. గర్భిణులు బయటకు వస్తే కడుపులోని బిడ్డకు ముప్పా?
-
ప్రచారం: గ్రహణ సమయంలో గర్భిణులు బయట తిరిగితే బిడ్డ వైకల్యంతో పుడుతుంది.
-
నిజం: ఇది కేవలం ఒక మూఢనమ్మకం. గ్రహణం వల్ల గర్భస్థ శిశువులకు ఎలాంటి హాని జరగదు. సాధారణ పౌరులకు ఉండే కంటి భద్రతా సూచనలే గర్భిణులకు కూడా వర్తిస్తాయి.
8. సెంటర్ లైన్ దగ్గరే నిలబడి చూడాలా?
-
ప్రచారం: గ్రహణం కనిపించే మార్గంలో మధ్యలో నిలబడితేనే సరిగ్గా కనిపిస్తుంది.
-
నిజం: సంపూర్ణ గ్రహణం పడే ప్రాంతంలో ఎక్కడ ఉన్నా ఆ దృశ్యాన్ని ఆస్వాదించవచ్చు.
ఈ మూఢనమ్మకాలు ఎందుకు మిగిలిపోయాయి?
పురాతన కాలంలో ఆకాశంలో ఒక్కసారిగా సూర్యుడు మాయమై చీకటి పడటానికి కారణం తెలియక మన పూర్వీకులు రకరకాల కథలు, నమ్మకాలు అల్లుకున్నారు. కాలక్రమేణా సైన్స్ అభివృద్ధి చెంది సూర్య, చంద్రుల భ్రమణం వల్లే ఇది జరుగుతుందని తేలింది.
కాబట్టి గ్రహణాన్ని చూసి భయపడాల్సిన అవసరం లేదు. సరైన కంటి రక్షణ చర్యలు తీసుకుంటూ ఈ ఖగోళ వింతను ఆస్వాదించడమే సరైన పద్ధతి!