Chandrababu: ఆంధ్రప్రదేశ్ వ్యాప్తంగా తీవ్ర సంచలనం సృష్టించిన విజయవాడ రౌడీషీటర్ గాదె సాయికృష్ణ అదృశ్యం తో పాటు లాకప్ డెత్ ఆరోపణల కేసులో అత్యంత కీలక పరిణామం చోటుచేసుకుంది. సాయికృష్ణ తల్లి విజయలక్ష్మితో పాటు వారి కుటుంబ సభ్యులు శుక్రవారం నాడు గుంటూరు జిల్లా ఉండవల్లిలోని ముఖ్యమంత్రి క్యాంపు కార్యాలయంలో సీఎం నారా చంద్రబాబు నాయుడిని స్వయంగా కలిశారు. పెనమలూరు ఎమ్మెల్యే బోడె ప్రసాద్ నేతృత్వంలో బాధితుడి కుటుంబం ముఖ్యమంత్రిని కలిసి తమకు జరిగిన అన్యాయాన్ని వివరించింది.
ముఖ్యమంత్రికి కన్నీటి విన్నపం – అండగా ఉంటామన్న సీఎం..
సాయికృష్ణపై గతంలో అనేక కేసులు ఉన్నప్పటికీ, ఇటీవల పోలీసులు అతడిని అదుపులోకి తీసుకున్న తర్వాతే మాయమయ్యాడని కుటుంబ సభ్యులు ఆరోపిస్తున్నారు. పోలీసులే అతడిని కొట్టి చంపేసి, లాకప్ డెత్ను మిస్సింగ్ కేసుగా చిత్రీకరిస్తున్నారని సాయికృష్ణ తల్లి విజయలక్ష్మి సీఎం ఎదుట ఆవేదన వ్యక్తం చేశారు. తమకు న్యాయం జరిగేలా చూడాలని కన్నీటి పర్యంతమయ్యారు.
బాధితురాలి ఆవేదనను విన్న ముఖ్యమంత్రి చంద్రబాబు నాయుడు వారికి ధైర్యం చెప్పారు. చట్టం ముందు అందరూ సమానమేనని, ఈ విషయంలో ప్రభుత్వం బాధితులకు అన్ని విధాలా అండగా ఉంటుందని గట్టి భరోసా ఇచ్చారు. సాయికృష్ణ అదృశ్యం వెనుక ఉన్న అసలు నిజాలను బయటకు తీసేందుకు ప్రభుత్వం ఈ వ్యవహారాన్ని అత్యంత సీరియస్గా తీసుకుందని స్పష్టం చేశారు.
ఉన్నత స్థాయి దర్యాప్తు – సీఎం చంద్రబాబు కీలక వ్యాఖ్యలు..
ఈ సందర్భంగా ముఖ్యమంత్రి కేసు పురోగతికి సంబంధించి కీలక వివరాలను వెల్లడించారు:
“సాయికృష్ణ అదృశ్య ఘటనపై ఇప్పటికే ఉన్నత స్థాయిలో దర్యాప్తు చేయిస్తున్నాం. ఇందులో తప్పు చేసిన వారు ఎంతటివారైనా సరే, ఏ హోదాలో ఉన్నా సరే ఎట్టి పరిస్థితుల్లోనూ ఉపేక్షించబోం, కఠినంగా శిక్షిస్తాం” అని సీఎం చంద్రబాబు స్పష్టం చేశారు.
బాధ్యుడైన కృష్ణలంక సీఐ నాగరాజును ఇప్పటికే సస్పెండ్ చేశామని, దర్యాప్తును మరింత వేగవంతం చేయడానికి ఒక సీనియర్ ఐపీఎస్ అధికారిని ప్రత్యేక దర్యాప్తు అధికారిగా నియమించామని ముఖ్యమంత్రి తెలిపారు.
పోలీస్ వర్సెస్ లాకప్ డెత్ వివాదం:
ఈ కేసు విజయవాడ పోలీసు వ్యవస్థను డిఫెన్స్లో పడేసింది. పోలీసులు సాయికృష్ణ పీఎస్ నుండి తప్పించుకుని మిస్ అయ్యాడని చెబుతుండగా, కుటుంబ సభ్యులు మరియు ప్రతిపక్షాలు మాత్రం ఇది ముమ్మాటికీ థర్డ్ డిగ్రీ వల్ల జరిగిన లాకప్ డెత్ అని, శవం కూడా దొరకకుండా బూడిద చేశారని ఆరోపిస్తూ న్యాయపోరాటానికి దిగారు. బాధితురాలి ఫిర్యాదుతో ఇప్పటికే సీఐ నాగరాజుపై మర్డర్ కేసులు (BNS సెక్షన్ల కింద) నమోదైన తరుణంలో.. స్వయంగా ముఖ్యమంత్రి రంగంలోకి దిగి ఐపీఎస్ అధికారితో నిష్పక్షపాత విచారణకు ఆదేశించడం ఈ కేసులో నిందితులకు ఊపిరాడకుండా చేస్తోందని ట్రేడ్ వర్గాలు భావిస్తున్నాయి.