Pulse Imports: మన ఇంట్లో మార్నింగ్ టిఫిన్ ఇడ్లీ, దోశల్లోకి సాంబార్ కావాలన్నా.. మధ్యాహ్నం వేడివేడి అన్నంలో నెయ్యి వేసుకుని ముద్దపప్పు తినాలన్నా పప్పు ఉండాల్సిందే. అసలు పప్పు లేనిదే మన సౌత్ ఇండియన్ ప్లేట్ నిండదు! కానీ మార్కెట్‌కి వెళ్లి కిరాణా సరుకులు తెచ్చే వాళ్లకి, ఇంట్లో బడ్జెట్ చూసుకునే వాళ్లకి రీసెంట్‌గా ఒక పెద్ద షాక్ తగులుతోంది. అదేంటంటే.. పప్పుల ధరలు రాకెట్ లాగా దూసుకుపోతున్నాయి. దేశంలో డిమాండ్ విపరీతంగా పెరిగిపోవడంతో ప్రభుత్వం విదేశాల నుంచి భారీగా దిగుమతులు (ఇంపోర్ట్స్) చేసుకుంటున్నా సరే, మార్కెట్లో రేట్ల మంట మాత్రం చల్లారడం లేదు.
దిగుమతులు 67% అప్.. అయినా తగ్గని ప్రైస్ ట్యాగ్!
ప్రస్తుత ఆర్థిక సంవత్సరం (FY27) ఏప్రిల్ నుంచి ఆగస్టు వరకు లెక్కలు చూస్తే.. కేవలం ఈ ఐదు నెలల వ్యవధిలోనే ఇండియా ఏకంగా 2.06 మిలియన్ టన్నుల పప్పులను దిగుమతి చేసుకుంది. గత ఏడాదితో పోలిస్తే ఇది మైండ్ బ్లోయింగ్ అనేలా 67 శాతం ఎక్కువ! ఇక ఖర్చు విషయానికి వస్తే, ఏకంగా 1.18 బిలియన్ డాలర్లు (దాదాపు రూ.10 వేల కోట్ల పైమాటే) కేవలం పప్పుల కోసమే విదేశాలకు చెల్లించాల్సి వచ్చింది. అంతర్జాతీయంగా రేట్లు కాస్త కంట్రోల్‌లోనే ఉన్నప్పటికీ, మన దగ్గర డిమాండ్ పీక్స్‌లో ఉండటంతో ఇంత భారీగా ఆర్డర్లు పెట్టాల్సి వచ్చింది.
ముఖ్యంగా ఈ ఐదు నెలల్లో మసూర్ పప్పు (ఎర్ర కందిపప్పు) దిగుమతులు 200 శాతం, పసుపు బఠానీలు (ఎల్లో పీస్) 114 శాతం పెరిగాయి. మన రోజువారీ వంటల్లో వాడే కందిపప్పు దిగుమతులు 10 శాతం పెరగ్గా, మినపప్పు దిగుమతి మాత్రం 3 శాతం మేర తగ్గింది.
మార్కెట్లో రిటైల్ రేట్ల మోత: కేజీ పప్పుల ధరలు ఎంతంటే?
డిపార్ట్‌మెంట్ ఆఫ్ కన్స్యూమర్ అఫైర్స్ తాజా రిపోర్ట్ ప్రకారం సామాన్యుడి జేబుకు గట్టిగానే చిల్లు పడుతోంది.
-
కందిపప్పు (Tur Dal): సగటున కేజీ ధర రూ.133 వరకు పలుకుతోంది (గత ఏడాదితో పోలిస్తే దాదాపు 15% జంప్).
-
మినపప్పు (Urad Dal): మార్కెట్లో కిలో రూ.125 దాటేసింది (10% పెంపు).
-
శనగపప్పు (Chana Dal): కేజీ ధర రూ.93.50కి చేరింది (7.5% పెరుగుదల).
గ్లోబల్ క్రైసిస్ టూ లోకల్ ప్రాబ్లమ్స్.. అసలు ఎందుకింత ధర?
-
రష్యా-ఉక్రెయిన్ సంక్షోభం: రష్యా నుంచి రావాల్సిన సప్లై సరిగా లేకపోవడంతో కెనడా నుంచి వచ్చే బఠానీలు, పప్పుల ధరలు అంతర్జాతీయ మార్కెట్లో మళ్లీ పెరిగాయి. దీంతో రాబోయే రోజుల్లో దిగుమతులు కాస్త నెమ్మదించే సూచనలు కనిపిస్తున్నాయి.
-
ఎల్‌నినో దెబ్బ: మహారాష్ట్ర, కర్ణాటక లాంటి ప్రధాన పప్పుల సాగు ప్రాంతాల్లో వానలు మొహం చాటేశాయి. వర్షాభావ పరిస్థితుల వల్ల ఖరీఫ్ పంటపై ప్రభావం పడింది. రాబోయే శీతాకాలంలో చలి, తేమ ఎలా ఉంటుందో అన్నదానిపై శనగ, మసూర్ రబీ పంటల దిగుబడి ఆధారపడి ఉంది.
-
ఇంపోర్ట్ డ్యూటీల బాదుడు: పప్పుల రేట్లు పెరిగినా కూడా దిగుమతి సుంకాలను (Import Duties) తగ్గించే ఆలోచనలో ప్రభుత్వం లేదు. బఠానీలపై 30%, మసూర్ పప్పుపై 10% సుంకాలు కొనసాగుతుండటం వల్ల వ్యాపారులకు దిగుమతి ఖర్చులు తడిసి మోపెడవుతున్నాయి.
-
విదేశాలపై ఆధారపడటం: భారతదేశం తన వార్షిక పప్పుల అవసరాల్లో 18% నుంచి 20% వరకు కెనడా, రష్యా, బ్రెజిల్, మయన్మార్, ఆఫ్రికా దేశాల మీదే ఆధారపడుతోంది. గ్లోబల్ మార్కెట్లో చిన్న కుదుపు వచ్చినా అది నేరుగా మన వంటింటి మీదే పడుతోంది.
సామాన్యుడికి ఊరట ఏమైనా ఉందా?
ప్రస్తుతానికి ప్రభుత్వం దగ్గర దాదాపు 4.5 మిలియన్ టన్నుల బఫర్ స్టాక్ ఉండటం ఒక్కటే పాజిటివ్ పాయింట్. మార్కెట్లో మరీ దారుణంగా కొరత రాకుండా ప్రభుత్వం ఈ నిల్వలను రిలీజ్ చేసే అవకాశం ఉంది. అయితే ఖరీఫ్ దిగుబడులు మార్కెట్‌కి వచ్చేదాకా ధరలు దిగివచ్చే సూచనలు తక్కువగానే ఉన్నాయని ట్రేడ్ వర్గాలు చెబుతున్నాయి. అందుకే ప్రస్తుతం కిచెన్ బడ్జెట్‌ను జాగ్రత్తగా ప్లాన్ చేసుకోవడం, ఆహార వృథాను తగ్గించుకోవడం అందరికీ చాలా అవసరం!